Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tlan liʼakxilhtit xtakanajlakan

Carta xla Lakgkgolotsin tiku Pulalinkgo xTatayananin Jehová

Carta xla Lakgkgolotsin tiku Pulalinkgo xTatayananin Jehová

Kinatalankan tiku kkapaxkiyan:

Nina lhuwa kata, krevista Makatsinina nema tamaʼakgpitsi tsukulh taxtu lu lakstlan artículos nema kawanikan: «Tlan liʼakxilhtit xtakanajlakan». Lata ama kilhtamaku tsukulh taxtu kmakgapitsi papaʼ, xlakata xatapaxuwan nalikgalhtawakgayaw.

¿La akxilhkgonit tiku likgalhtawakgakgonit? Xlakata artículo xla Marta, chatum puskat wa: «Kintachuna Marta chu asta klilitsilh; putum kilhtamaku wi tuku xaktlawa xlakata tlan natawilakgo tiku kilakgapaxialhnankgo. Chu min kilhtamaku ni kmakgxtakgputun kintaskujut chu nakkatachuwinan kiʼamigos». Chatum tsumat tiku likgalhtawakgalh xlakata Ester wa: «Uma kimalakapastakli pi kaj lakapala lhuwa lhakgat natamawaputuna chu tuku aku taxtutilhama. Maski talakaskin liwana natakaxtayayaw pero ni namalakatsaliyaw». Na wa: «Tuku xlakaskinka akxilha Jehová wa la likatsiyaw». Chu chatum tala puskat akxni likgalhtawakgalh artículo niku lichuwinan apóstol Pedro, chu wa: «Akxni xaklikgalhtawakgama, ¡xakmakgkatsi pi anta xaklama! Ni kaj xaklikgalhtawakgama tuku xlama: na tlan xakakxilha, xakkgaxmata chu xakmakgkatsi».

Tuku wankgo xlakata napaxtikatsininankgo tiku aku lichuwinaw chu amakgapitsin tiku na likgalhtawakgakgo, limasiya pi xlikana tuku tsokgli apóstol Pablo makgasa: «Sampi wa nkatuwa ntu xapulana ntatsokgli, wa litsokgka mpi chuna nalikatsiniyaw wa ntu ntlan» (Rom. 15:4). Jehová tlawalh pi kBiblia xtatsokgli uma, xlakata xkinkamasiyanin tuku lu xlakaskinka. Wa xlakata maski lhuwata o nina lhuwa kata lakgapasaw tuku xlikana masiya Biblia, putum tlan wi tuku nakatsiniyaw.

Xatapaxuwan kkawaniyan pi tunkun kalikgalhtawakgatit uma libro. Tlan xlikgalhtawakgatit akxni nakakninaniyatit Dios kfamilia. ¡Laktsu kamanan lu nalakgatikgo! Chu akxni natalikgalhtawakga uma libro kTakgalhtawakga nema takilhtinit kBiblia kCongregación, nipara akgtum tamakxtumit namakgatsankgayatit. Akxni nalikgalhtawakgayatit uma libro, liwana chu kuenta natlawayatit, kalimaxtutit kilhtamaku xlakata natlawayatit la akxilhpatit tuku likgalhtawakgapatit chu na kamakgtanutit xlakata tuku anta talichuwinan. Kalilakapastaktit xlakata tlan naʼakxilhatit chu namakgkatsiyatit tuku titaxtukgolh tiku talichuwinan, chu kalakpuwantit tuku xtlawatit komo nachuna xtitaxtutit.

Lu klipaxuwayaw xlakata kkamaxkiyan uma libro. Klakaskinaw pi lu kakamakgtayalh putum familia. ¡Mimputumkan lu kkapaxkiyan!

Lakgkgolotsin tiku Pulalinkgo xTatayananin Jehová