Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tlan liʼakxilhtit xtakanajlakan

 CAPÍTULO 7

«Chuna la kstaktilhama kskujnanima Jehová»

«Chuna la kstaktilhama kskujnanima Jehová»

1, 2. ¿Tuku kskimakgo israelitas akxni katachuwinalh Samuel chu tuku xlakata talakaskin nialh chuna nalakpuwankgo?

SAMUEL ya kxlakatin latamanin chu kaks kalakaʼakxilha. Samuel tiku ni makgatsankganani Dios, akglhuwa kata akxni palakachuwina chu juez tlawaka, kamamakxtuminit Israel anta kʼGuilgal. Chuna la calendario xala uku, uma kilhtamaku lakgchan mayo o junio. Lakgchanita kilhtamaku akxni nialh min sen chu trigo tlantiya namakikan. Kaj xalan nialhti chuwinan chu Samuel lakpuwan la natlawa xlakata nalakgchan kxnakujkan tuku nakawani.

2 Israelitas ni akgatekgskgo pi lu nitlan tuku tlawamakgo. Kajwatiya lakpuwankgonit pi kgalhiputunkgo chatum mapakgsina. Ni akgatekgskgo pi uma limasiya pi ni maxkikgo kakni Jehová chu xpalakachuwina. Uma wamputun pi ni lakaskinkgo pi Jehová wa xmapakgsinakan nawan. ¿Tlan nakamakgtaya Samuel xlakata naʼakxilhkgo pi nitlan tuku lakaskinkgo chu nialh chuna nalakpuwankgo?

Akxni Samuel aktsinajku xwanit kinkamasiyaniyan pi tlan namatliwakglhaw kintakanajlakan maski lhuwa tiku tlawakgo tuku nitlan

3, 4. 1) ¿Tuku xlakata Samuel lichuwinalh akxni aktsujku xwanit? 2) ¿Tuku xlakata nakinkamakgtayayan komo naʼakxilhaw xlatamat Samuel?

3 Akxni Samuel katachuwinalh kawanilh: «Kkgolonita chu kkgalhiya kiʼaktsasat». Xlakata aktsasawata xlilat namaxkikan kakni chu tlakg nakgaxmatnikan. Na kawani: «Akxni kgawasaku xakwanit asta la uku chuntiya kkapulalinitan» (1 Sam. 11:14, 15; 12:2). Maski akglhuwata kata titaxtunit, lakapastakaku akxni kgawasa xwanit. Xlakata lu tlan tuku laksakli natlawa akxni kgawasaku xwanit, la uku lhuwa takanajla kgalhi chu ni makgatsankganani Dios.

 4 Samuel putum kilhtamaku matliwakglhli chu kuentajtlawalh xtakanajla chu ni mastalh talakaskin pi tiku ni xkgalhakgaxmatkgo Jehová chu lixkajni xlikatsikgo xmatlawikgolh tuku nitlan. Xlakata lamaw niku tlawakgokan tuku xalixkajni chu niku tamakgatlinikanit Dios, tuwa makgkatsiyaw tliwakga nakgalhiyaw kintakanajlakan (kalikgalhtawakga Lucas 18:8). Kaʼakxilhwi la nakinkamakgtayayan xliʼakxilhtit Samuel. Kalichuwinaw akxni aktsujku xwanit.

«Kskujnima Jehová akxni aktsujku xwanit»

5, 6. ¿Tuku xlakata Samuel ni stakli la amakgapitsi kamanan chu tuku xlakata liwana xkatsikgo xnatlatni pi liwana nakuentajtlawakan?

5 Samuel ni stakli la amakgapitsi kamanan. Akxni xtse nialh matsikilh, max akxni xkgalhi akgtutu kata o liwaka, tsukulh skuja kSiló, max 30 kilómetros xlimakgat chuna la xwi Ramá, kxkachikin. Anta xʼama makgtayanan ktabernáculo (o niku xkakninanikan Dios). Xtlat chu xtse xmakamaxkikgonit Jehová xlakata putum kilhtamaku naskujnani: nazareo xʼama wan xliputum kxlatamat. * ¿Tuku xlakata lu makgat kixtakgkgolh? ¿Pi ni xpaxkikgo?

6 ¡Xlakan xpaxkikgo xkgawasakan! Xkatsikgo pi liwana xʼamaka kuentajtlawakan kSiló. Elí, xapuxku sacerdote, wa xʼakxilha pi liwana xkuentajtlawaka, xlakata wa xtaskuja Samuel. Nachuna, xwilakgo lakpuskatin tiku kskujkgo ktabernáculo (Éx. 38:8; Juec. 11:34-40).

7, 8. 1) ¿La xmatliwakglhkgo kata kata xnatlatni Samuel? 2) ¿Tuku kamasiyani natlatni xala uku tuku tlawakgolh Ana chu Elqaná?

7 Ana chu Elqaná ni patsankgakgolh xkgawasakan tiku lu xpaxkikgo, tiku xapulana lakachilh. Wa tiku Jehová likgalhtilh xʼoración Ana akxni skinilh pi xkgalhiputun skgata chu wanilh pi xʼama makamaxki xlakata kskujnanilh. Kata kata, akxni xlakgankgo, Ana xlini maktum lhakgat xapakgaxtulu nema xtlawani xlakata xlhakgalh akxni kskujli ktabernáculo. Max Samuel lu xatapaxuwan xkakgalhkgalhi xnatlatni, tiku kstakyawakgo, xmatliwakglhkgo chu xmakgtayakgo xlakata lu xlakaskinka xʼakxilhli xlakata kskujma kxtabernáculo Jehová.

8 Ana chu Elqaná wi tuku lu xlakaskinka kamasiyani tiku kgalhikgo kamanan. Lhuwa natlatni tlakg xlakaskinka akxilhkgo nakamaxkikgo xkamanankan tuku maklakaskinkgo pero ni kamasiyanikgo xlakata Dios. Ana chu Elqaná tlakg xlakaskinka xʼakxilhkgo pi tliwakga xtawi xtakanajla xfamilia, chu wa xlakata Samuel lu tlan kskujni Dios wa (kalikgalhtawakga Proverbios 22:6).

9, 10. 1) ¿La xwanit tabernáculo chu la xliʼakxilha Samuel? (Na kaʼakxilhti nota.) 2) ¿Tuku xtlawa Samuel ktabernáculo chu la natlawakgo lakgkgawasan xala uku chuna la Samuel?

 9 Max akxni kstaktilhama Samuel xʼan kkasipijni nema xlistili Siló. Anta kxakgspun sipi tlan xakxilha kachikin chu putum tuku xʼanan lakatsu. Xlikana pi max lu xmakgapaxuwa chu tlan xlimakgkatsi pi anta kskujma akxni xakxilha xtabernáculo Jehová. Kʼuma tabernáculo nema xasanto, xtitaxtunita akgtati ciento kata akxni titlawaka chu Moisés pulalilh uma taskujut chu xlikalanka katiyatni kaj unu tlan xkakninanikan Jehová. *

10 Samuel paxkilh taskujut nema xlakgayawakanit ktabernáculo. Tuku tsokgli Samuel alistalh wan pi «kskujnima Jehová akxni kgawasaku xwanit chu xlhakganit maktum efod nema xlitatlawanit lino» (1 Sam. 2:18). Xlakata Samuel klhakganit maktum efod, lhakgat xapakgaxtulu, masiya pi kaj xkamakgtaya sacerdotes. Maski xla ni sacerdote xwanit wi tuku xlakgayawakanit ktabernáculo, xmalakki tsisa malakcha nema xwi kpatio chu xmakgtaya Elí, xlakata xlina kata. Samuel lu xpaxuwa xlakata kskuja kxchik Jehová pero wi tuku nitlan xlama anta nema tsukulh lilakgaputsa. ¿Tuku xlama?

Ni maxkajwilh xlatamat maski lixkajni xlikatsikan

11, 12. 1) ¿Tuku nitlan tayat xkgalhikgo Hofní chu Finehás? 2) ¿Tuku lu nitlan xtlawakgo Ofní chu Finehás anta ktabernáculo? (Na kaʼakxilhti nota.)

11 Akxni aktsinajku xwanit Samuel xʼakxilha akxni xtlawakan tuku lixkajni chu tuku ni xaʼakgstitum. Biblia lichuwinan pi chatiy xkamanan Elí, Hofní chu Finehás, «uma lakchixkuwin ni tsinu xtlawakgo tuku tlan; chu nitu xliʼakxilhkgo Jehová» (1 Sam. 2:12). Uma tachuwin kaj pulaktum tuku kilhchanima. Hofní chu Finehás «ni tsinu xtlawakgo tuku tlan» (wamputun «xkamanan tiku nitu xlilaka»), xlakata «nitu xliʼakxilhkgo» o ni xmaxkikgo kakni Jehová. Xlakgmakgankgo xaʼakgstitum xlimapakgsin Dios chu uma nitlan tayat kamatlawilh laklanka talakgalhin.

12 Xlimapakgsin Jehová xwan tuku xlitlawatkan sacerdotes chu la xlitamastat xwanit tamakamastan. Chu uma limapakgsin lu tlan  xlakata tamakamastan wa tuku xkalitapati Dios xtalakgalhinkan latamanin. Tlan xaskulunku xkaliʼakxilhli chu xkapulalilh chu xkasikulunatlawalh. Pero xlakata Hofní chu Finehás xtlawakgo tuku nitlan, amakgapitsi sacerdotes na ni xmaxkikgo kakni xtamakamastankan israelitas. *

13, 14. 1) ¿Tuku xkatlawanikan ktabernáculo tiku nitu xkgalhikgo? 2) ¿La limasiyalh Elí pi nitlan sacerdote xwanit chu na nitlan tlat xwanit?

13 Kaj kalakpuwaw la xmakgkatsi Samuel akxni xʼakxilha pi kxchik Jehová xtlawakan tuku nitlan chu niti xlakkaxtlawa. ¡Max xkaʼakxilha lhuwa tikux lipuwankgo akxni xkitaxtukgo ktabernáculo! Chuna xkatlawakan tiku nitu xkgalhikgo, tiku nitu xkaliʼakxilhkan, tiku xlakgaputsamakgolh chu xʼankgonit putsakgo tamakgtay chu xlakaskinkgo pi xkamatliwakglhnika xtakanajlakan. Chu tuku tlakg nitlan, katsilh pi Hofní chu Finehás xkatatalakgxtumikgo makgapitsin lakpuskatin tiku kskujkgo xkilhtin tabernáculo. ¡Ni xlakamaxanankgo chu nipara tsinu xmaxkikgo kakni xlimapakgsin Dios xlakata talakgxtumit! (1 Sam. 2:22.) Max Samuel xlakpuwan pi Elí xlakkaxtlawalh tuku nitlan xlama.

Max Samuel lu lilakgaputsalh tuku nitlan xtlawamakgolh xkamanan Elí

14 Wa xlakgchan Elí xmasputulh tuku nitlan xlama. Xlakata xapuxku sacerdote xwanit, wa xlin kuenta putum tuku xlama. Chu xlakata xkamanan xwanit, xlakgchan xkastakyawalh. Nachuna, ni kaj xakstukan xkatlawanikan tuku nitlan, na lhuwa tiku xkamakgapatinamakgo. Pero Elí ni tlawalh tuku xlitlawat xapuxku sacerdote chu tuku xlitlawat chatum tlat: ¡kaj tsinu kakilhnilh! (kalikgalhtawakga 1 Samuel 2:23-25). Xtalakaskin pi xkamalakgaxokgeka. ¡Xkalakgchan xkamakgnika xlakata xtalakgalhinkan!

15. ¿Tuku wanilh Jehová Elí pi xʼama kaʼakgspula, chu tuku tlawakgolh?

15 Tlakg nitlan tuku tsukulh tatlawa wa xlakata Jehová malakgachalh chatum «xlakskujni Dios», chatum palakachuwina nema ni wankan xtukuwani, xlakata xmakatsinilh Elí tuku nitlan xʼama lakgmin. Pulana, Jehová wanilh Elí: «Tlakg xlakaskinka kaʼakxilha minkamanan nixawa akit». Alistalh, wanilh pi xkamanan tiku lixkajni xlikatsikgo kaj akgtum kilhtamaku nalinikgo chu xfamilia lhuwa xʼama patinan chu asta nialh sacerdotes xʼamakgo litaxtukgo. ¿Kamakgtayalh Elí chu xkamanan tuku kawanika? Biblia wan pi ni (1 Sam. 2:27–3:1).

16. 1) ¿Tuku wan Biblia xlakata la stakli xtakanajla Samuel? 2) ¿Tuku xlakata lakpuwana pi matliwakgalhnan tuku wankan xlakata Samuel akxni aktsinajku xwanit?

 16 Chu Samuel, ¿xmastalh talakaskin pi xmatlawika tuku nitlan? Ni. Maski lu nitlan tuku xtlawamaka uma kilhtamaku wi tuku lu tlan xlichuwinankan: pi Samuel lu tlan kstakma xtakanajla. Kalakapastakwi pi 1 Samuel 2:18 wan pi maski xtlawakgokan tuku nitlan, xla «chuntiya kskujnima Jehová akxni aktsujku xwanit». Akxni aktsujku xwanit lhuwa skujnilh Dios. Chu versículo 21 wi tuku lichuwinan nema matliwakglhnan: «Kgawasa Samuel chuna la kstaktilhama kskujnanima Jehová». Xlikana, chuna la titaxtutilhalh kilhtamaku, tlakg tlan talalilh Dios. ¡Tlakg nakinkamakgtayayan ni natlawayaw tuku nitlan komo lu tlan natalalinaw Jehová!

17, 18. 1) ¿La tlan natlawakgo lakgkgawasan la Samuel maski amakgapitsi tlawakgo tuku nitlan? 2) ¿Tuku likatsiyaw pi lu tlan tuku laksakli natlawa Samuel?

17 Samuel tlan xlakpuwa: «Xapuxku sacerdote chu xkamanan lakgalhinamakgo kxlakatin Jehová, akit na tlan naktlawa tuku naktlawaputun». Maski tiku lakgaya xlakaskinka taskujut natlawa tuku nitlan, ni wamputun pi nachuna natlawayaw. La uku, lhuwa lakgkgawasan na tlawakgo la Samuel chu chuntiya “skujnanikgo Jehová akxni laktsujku” maski lhuwa tiku tlawamakgo tuku nitlan.

18 ¿Chu la kitaxtulh xlakata tuku tlawalh Samuel? Biblia wan: «Chu kgawasa Samuel kstaktilhama chu Jehová tlakg tsukulh paxki chu nachuna latamanin» (1 Sam. 2:26). Uma kgawasa lu tlan xʼakxilhkgo amakgapitsin, wantiku xtalakaskin pi tlan xʼakxilhkgolh. Jehová lu xlakaskinka xʼakxilha  xlakata ni makgxtakgli. Pero, maski Samuel liwana xkatsi pi Jehová xʼama masputu tuku nitlan xtlawamaka kSiló, max xlakpuwan tukuya kilhtamaku chuna nala. Pero nialh makgas xʼama katsi.

«Kachuwinanti, xlakata miskujni kgaxmatma»

19, 20. 1) ¿Tuku kgaxmatli Samuel akgtum katsisni? 2) ¿La xlikatsini Samuel Elí? 3) ¿La katsilh Samuel tiku xtachuwinama?

19 Akgtum tsisa akxni kapukswaku xwanit. Xpasamajku candelabro nema xwi ktabernáculo. Samuel kgaxmatli pi wi tiku kxakgatlima chu lakpuwa pi wa Elí, xla xlina kata chu nialh xʼakxilha, wa xlakata xtalakaskin pi xmakgtayalh. Samuel takilh chu «lakapala alh» niku klhtata kgolotsin. Kaj kalakpuwaw uma kgawasa, lakapala ama chu nipara tatununalh xlakata namakgtaya Elí. ¡Lu tlan kinkamamakgkatsiniyan xlakata Samuel lu tlan likatsini Elí! Xla xkatsi pi maski Elí xtlawama tuku nitlan, chuntiya xapuxku ksacerdote Jehová xwanit (1 Sam. 3:2-5).

20 Samuel mastakwanilh Elí chu wanilh: «Unu kwi, xlakata kixakgatli». Elí wanilh pi ni wa xakgatlilh chu wanilh pi xʼampa tama. Amakgtiy xakgatliparaka Samuel. Pero akxni xlimakgtutu xakgatlika, Elí akgatekgsli tuku xlama. Ama kilhtamaku akxni lu lixkajni xlikatsikgokan, Jehová nitu xkamaʼakxilha latamanin chu na ni xkamakatsini tuku aku xʼama la. Pero, Elí xkatsi pi Jehová xlakaskin pi uma aktsu kgawasa xmastalh xtamakatsin. Wa xlakata, wanilh pi xtaspitpa kxputama chu na wanilh la xkgalhtinalh. Kaj xalan xakgatliparaka: «¡Samuel, Samuel!». Chu xla chuna tlawalh la wanilh Elí, kgalhtinalh: «Kachuwinanti, xlakata miskujni kgaxmatma» (1 Sam. 3:1, 5-10).

21. ¿La tlan nakgaxmatniyaw Jehová la uku, chu tuku xlakata tlan nakitaxtu komo chuna natlawayaw?

21 Xwi chatum tiku xkgalhakgaxmata Dios kSiló. Uma kilhtamaku, Jehová tsukulh tachuwinan Samuel chu xla xkgalhakgaxmata. ¿Nachuna tlawayaw akinin? Xlakata nakgaxmatniyaw Jehová, ni nalakpuwanaw pi nakinkatachuwinanan katsisni. La uku, kgalhiyaw xTachuwin Dios xamaktuminika chu akxni likgalhtawakgayaw xtachuna la chali chali xkgaxmatniw. Akxni tlakg nakgaxmatniyaw Dios chu nakgalhakgaxmataw, tlakg natatliwakglha kintakanajlakan. Chuna tlawalh Samuel.

Samuel ni pekualh, kgalhakgaxmatli Jehová chu makatsinilh Elí tuku xʼamaka malakgachanikan

22, 23. 1) ¿La kgantaxtulh tuku Samuel makatsinilh Elí? 2) ¿Tuku xlakata Samuel xaʼakgstitum palakachuwina lilakgapaska?

22 Ama katsisni talakgpalilh xlatamat Samuel, tlakg lakgapasli Jehová xlakata xpalakachuwina wa, chu tsukulh masta xtamakatsin. Xapulana tamakatsin nema mastalh wa akxni wanilh Elí pi xʼamaja kgantaxtu tuku xwanikanit pi xʼama akgspula xfamilia. Max tuwa makgkatsilh Samuel namakatsini Elí pi xʼamaka malakgaxokgekan, pero ni pekualh chu wanilh. ¿Tuku wa Elí? Elí tlan tlawalh xtalakaskin  Dios. Chu titaxtulh tsinu kilhtamaku, kgantaxtulh putum tuku xwanit Dios: kaj akgtum kilhtamaku nikgolh Hofní chu Finehás akxni israelitas xtatlawamakgo guerra filisteos chu Elí na nilh akxni katsilh pi xʼarca Jehová xlinkgonit xtalamakgasitsinkan (1 Sam. 3:10-18; 4:1-18).

23 Pero Samuel tlakg lakgapaska pi lu akgstitum palakachuwina xwanit. Biblia wan pi «Jehová xmakgtayama Samuel» chu putum kilhtamaku makgantaxtilh tuku xwan pi nala (kalikgalhtawakga 1 Samuel 3:19).

«Samuel skinilh xtamakgtay Jehová»

24. ¿Tuku skinkgolh israelitas chu tuku xlakata lu nitlan xwanit tuku xtlawamakgolh?

24 ¿Kgalhakgaxmatkgolh israelitas Samuel chu ni makgatsankgananikgolh Jehová? Ni. Milh kilhtamaku akxni kachikin nialh lakaskinkgolh pi kaj chatum palakachuwina xkapulalilh. Xlakaskinkgo chatum mapakgsina la amakgapitsi kachikinin. Samuel kawanilh pi tlan pero akxni Jehová xwaninita pi chuna katlawalh. Pero, xtalakaskin xkawanilh pi lu nitlan tuku xtlawamakgo: ni wa Samuel xlakgmakgamakgo wata wa Jehová. Wa xlakata kamamakxtumilh israelitas kʼGuilgal.

Akxni Samuel skinilh Jehová pi xmalakgachalh un chu sen limasiyalh xtakanajla chu Jehová kgalhtilh tuku skinilh

25, 26. ¿Tuku tlawalh Samuel xlakata israelitas xkatsikgolh pi lu nitlan tuku kskimakgolh?

25 Kalichuwinamparaw lu xlakaskinka kilhtamaku akxni Samuel katachuwinalh israelitas. Anta ya kxlakatinkan putum israelitas. Lu taʼakglhuwimakgo. Palakachuwina tiku lina kata, tsuku kalitachuwinan xtakanajla chu xlakata ni makgatsankgananinit Dios xliputum xlatamat. Chu tsuku «skini xtamakgtay Jehová» chu wanilh pi xmalakgachalh un chu sen (1 Sam. 12:17, 18).

26 Nila namin un chu sen akxni lu lhuwa chichinama. Pero kaj xalan nialhti wi tuku wa o nialh la xlikgalhkgamananka Samuel. Kaj xalan lhuwa milh xalakgtsitsakga puklhni chu lipekua tsukulh unan niku xtachanit trigo. Tliwakga tsukulh jilinan chu tsukulh senan. ¿Tuku lakpuwa kachikin? «Pekuanikgo Jehová chu Samuel.» ¡La uku katsikgolh pi lu nitlan tuku kskinimakgolh! (1 Sam. 12:18, 19.)

27. ¿La kalikatsini Jehová tiku kgalhikgo xtakanajlakan la Samuel?

27 Uma milagro Jehová likgalhtilh xʼoración Samuel chu chuna kamakgatekgsnilh uma kachikin. Chu putum kilhtamaku sikulunatlawalh xtakanajla Samuel lata akxni aktsinajku xwanit asta akxni kgololh. Jehová nitu talakgpalima: komo nakgalhiyaw kintakanajlakan la Samuel, na nakinkamakgtayayan chu nakinkasikulunatlawayan.

^ párr. 5 Tiku nazareos xlitaxtukgo nipara tsinu xwakgo tuku likgachikan chu na ni xtaʼakgsitkgo. Makgapitsi xwanikgo Dios pi nazareo nawankgo pero ni putum kilhtamaku chu Samuel xliputum xlatamat nazareo wa chuna la Sansón chu Juan Tiku xMununan.

^ párr. 9 Uma tabernáculo nema xlitatlawanit pakglhat akgkututu metro xlilhman xwanit chu xlitilanka akgtati metro a itat. Pero, lu xalakwan tuku xlitlawakanit: kxuwa foca, xalakswan lhakgat nema xkgalhi bordados chu xalaktapalaxla pakglhat nema xkgalhi oro chu plata. Na xlistili patio nema tipuxamatati a itat metro xwanit xlilhman chu xlitilanka puxamatiy metros chu anta xwi pumakamastan nema lu stlan xwanit. Alistalh katlawaka cuartos kxpaxtun tabernáculo, xlakata xlimaklakaskinkgolh sacerdotes. Chu max kʼakgtum cuarto klhtata Samuel.

^ párr. 12 Biblia pulaktiy tuku lichuwinan. Limapakgsin lakatanks xwan tuku tlan xwakgo sacerdotes akxni xmastakan tamakamastan (Deut. 18:3). Pero sacerdotes tiku lixkajni xlikatsikgo wilikgolh atanu limapakgsin: xtlawakgo pi tiku xkaskujnanikgo ktabernáculo xmakutukgolh liway akxni xchama kʼolla chu xtiyakgo liway nema tlakg xatlan. Nachuna, akxni israelitas xlinkgo xtamakamastankan, tiku kskujkgo ktabernáculo xafuerza xkamakglhtikgo ni xachan liway maski nina xmakamaxkikgo Jehová xamanteca kpumakamastan, chuna xtlawakgo xlakata sacerdotes xkalimapakgsikgo (Lev. 3:3-5; 1 Sam. 2:13-17).