Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 52

Xsoldados Jehová xla lhkuyat

Xsoldados Jehová xla lhkuyat

Mapakgsina xalak Siria Ben-Hadad makglhuwa talachipalh Israel. Pero palakachuwina Eliseo putum kilhtamaku xmakatsini xmapakgsina Israel xlakata tlan xtsalalh. Wa xlakata Ben-Hadad lakpuwa pi nachipa Eliseo. Katsilh pi xwi kkachikin Dotán chu malakgachalh xsoldados xlakata xchipakgolh.

Sirios katsisni chankgolh kDotán. Lichali tsisa, xmakgtayana Eliseo taxtulh chu akxilhli pi lhuwa soldados kstiliwilikgonit kachikin. Lu pekualh chu pixlanka wa: “Eliseo, ¿tuku natlawayaw?”. Eliseo kgalhtilh: “Tlakg lhuwa soldados kinkatawilakgon nixawa xlakan”. Uma kilhtamaku, Jehová tlawalh pi xmakgtayana Eliseo x’akxilhli pi sipi nema xlistilikgo kachikin xlitsamakgo kawayu chu putlaw xla lhkuyat nema litlawakan guerra.

Akxni soldados xalak Siria xchipaputunkgo Eliseo, xla tlawalh oración: “Jehová, katlawa litlan, nialh kalakawanankgolh”. Kaj xalan, soldados ni xkatsikgo niku xwilakgolh maski xlakawanankgo. Wa xlakata Eliseo kawanilh: “Lakatanu kachikin wilatit. Kakilastalaniw,  nakkalinan niku wi chixku nema putsapatit”. Xlakan stalanikgolh Eliseo asta kSamaria. Anta xlama mapakgsina xalak Israel.

Anta kSamaria soldados katsikgolh niku xwilakgolh, pero nialhla tuku xtlawakgo. Mapakgsina xalak Israel kgalhskilh Eliseo: “¿Kkamakgni?”. Sirios xtlawaniputunkgonit tuku nitlan Eliseo, ¿x’ama kamalakgaxokge? Ni. Xla kgalhtilh mapakgsina: “Ni kakamakgni. Kakamawi chu kakamakgxtakgti”. Wa xlakata mapakgsina kamawilh chu kamaxkilh talakaskin nataspitkgo kxchikkan.

«Wa uma talipaw nema kgalhiniyaw, pi kaxatukawa tuku naskiniyaw chuna la xtalakaskin, xla nakinkakgaxmatniyan» (1 Juan 5:14).