Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 54

Jehová ni litlakgwalh Jonás

Jehová ni litlakgwalh Jonás

Kʼakgtum kachikin xalak Asiria nema xwanikan Nínive, latamanin lu lixkajni xlikatsikgo. Jehová wanilh xpalakachuwina Jonás pi xʼalh kNínive chu xkawanilh latamanin pi xlitalakgpalitkan. Pero Jonás ni alh kNínive, wata alh alakatanu chu tajulh kbarco nema xʼama kTarsis.

Akxni barco xwi kpupunu, milh tliwakga unisen chu tiku xʼankgo kbarco lu pekuankgolh. Tlawanikgolh oración xdioseskan chu kakgalhskinka: “¿Tuku xlakata chuna kinkaʼakgspulaman?”. Chu Jonás kawanilh: “Kinkuenta. Ktsalama xlakata ni ktlawaputun tuku kilimapakgsinit Jehová. Kakilamakaw kchuchut xlakata natakaksa unisen”. Xlakan ni xmakaʼamputunkgo Jonás kpupunu, pero xla xafuerza kawanilh pi chuna xtlawakgolh. Wa xlakata makaʼankgolh kpupunu chu takaksli unisen.

Jonás lakpuwa pi xʼama niy. Pero akxni tlakg xtsankgatilhama kpupunu, tlawanilh oración Jehová. Wa xlakata Jehová malakgachalh tantum lu lanka skiti o tamakgnin nema kgotwalh Jonás, pero ni makgnilh. Kxpulakni skiti, Jonás tlawanilh oración Jehová: “Kmalaknuniyan pi putum kilhtamaku nakkgalhakgaxmatan”. Jehová tlawalh pi akgtutu kilhtamaku xastakna xtanulh Jonás kxpulakni skiti chu alistalh tlawalh pi xkilhtaxtulh kxkilhtun pupunu.

Jehová lakgmaxtulh Jonás, pero ¿xwamputun uma pi nialh xliʼanat  kNínive? Ni. Jehová malakgachapa chu Jonás kgalhakgaxmatli. Alh chu kawanilh latamanin xala anta tiku lixkajni xlikatsikgo: “Tipuxam kilhtamaku tsankga chu Jehová namasputu kachikin”. Pero wi tuku lalh nema ni xlakpuwanit. Ninivitas kgaxmatkgolh chu talakgpalikgolh. Mapakgsina xalak Nínive wanilh kachikin: “Katasaskinitit Dios chu katalakgpalitit, max chuna ni kintikamasputun”. Akxni Jehová akxilhli pi latamanin xmakgxtakgkgonit tuku xtlawamakgo, ni kamasputulh.

Jonás lu sitsilh xlakata Jehová ni masputulh kachikin. Kalakpuwanti tsinu: Jehová ni litlakgwalh Jonás chu lakgalhamalh. Pero Jonás ni kalakgalhamalh latamanin xalak Nínive. Wata tawilalh kxkilhpan kachikin, kxtampin kgantum mayak xtachuna puwa xlakata naliskgekgnan chu tasiyalh pi lakasitsilh. Alistalh, uma mayak skakli chu Jonás lu sitsilh. Wa xlakata Jehová wanilh: “Tlakg xlakaskinka akxilha uma mayak nixawa ninivitas. Akit kkalakgalhamalh chu wa xlakata lakgtaxtukgolh”. ¿Tuku xmasiyaniputun Dios Jonás? Pi latamanin xalak Nínive tlakg xlakaskinka nixawa katuwa tuwan.

«Jehová [...] kakgalhkgalhiyan xlakata lakaskin pi nipara chatum kalakgsputli; wata, lakaskin pi putum kamakgxtakgkgolh tuku nitlan tlawamakgo» (2 Pedro 3:9).