Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 45

Tapitsi tamapakgsin

Tapitsi tamapakgsin

Akxni Salomón kakninanilh Jehová, analh takaksni kʼIsrael. Pero xla katatamakgaxtokgli lakpuskatin xalak atanu países tiku xkakninanikgo ídolos. Tsinu tsinu, Salomón talakgpalilh chu na tsukulh kakakninani ídolos. Jehová sitsilh chu wanilh: “Nakmakglhti tamapakgsin mifamilia chu pulaktiy naktlawa. Tlakg xalanka tamapakgsin nakmaxki chatum miskujni chu mifamilia namapakgsinan kxaʼaktsu tamapakgsin”.

Jehová wi tuku tlawalh xlakata putum xkatsikgolh tuku xwanit. Chatum kskujni Salomón, nema xwanikan Jeroboán, makgat xʼanit chu tatanokglhli ktiji palakachuwina Ahíya. Palakachuwina tamakgxtulh klhakgat, lakxtitli chu pulakkutiy tlawalh chu wanilh Jeroboán: “Jehová namakglhti xtamapakgsin Israel xfamilia Salomón chu pulaktiy natlawa. Kachipa pulakkaw xla uma lhakgat xlakata wix namapakgsinana kpulakkaw tribus”. Akxni mapakgsina Salomón katsilh tuku xlanit, xmakgniputun Jeroboán. Wa xlakata Jeroboán tsalalh kʼEgipto. Titaxtulh kilhtamaku, Salomón nilh chu xkgawasa Rehoboam tsukulh mapakgsinan. Wa xlakata Jeroboán lakpuwa pi nialh kalipekua xwi xlatamat chu taspitli kʼIsrael.

 Alistalh, lakgkgolotsin xalak Israel wanikgolh Rehoboam: “Komo tlan nalikatsiniya kachikin, kachikin nakgalhakgaxmatan”. Pero xʼamigos tiku lakgkgawasanku xwankgonit wanikgolh: “Ni kakalakgalhamanti kachikin. Tlakg kakamaskuju”. Rehoboam wa kuentajtlawalh tuku wanikgolh xʼamigos chu lixkajni likatsilh. Wa xlakata, latamanin lakatakikgolh chu tlawakgolh pi Jeroboán xmapakgsinalh kpulakkaw tribus. Uma pulakkaw tribus wanika xtamapakgsin Israel chu xaʼakgtiy tribus wanika xtamapakgsin Judá chu ni makgxtakgkgolh Rehoboam. Chuna tapitsikgolh pulakkutiy tribus xla Israel.

Jerusalén xwi kxtamapakgsin Rehoboam. Jeroboán ni xlakaskin pi kachikin anta xʼankgolh kakninanikgo Jehová. ¿Katsiya tuku xlakata? Xlakata xpekuan pi xlakgmakgankgolh chu wa xkgalhakgaxmatkgolh Rehoboam. Wa xlakata tlawalh tantiy laktsu wakax xaʼoro chu kawanilh kachikin: “Jerusalén lu makgat wi. Wata tlakg tlan unu nakakninaniyatit uma laktsu wakax”. Latamanin kuentajtlawanikgolh chu makgxtakgparakgolh Jehová.

«Ni watiya mukiwi kamaklakaskintit nema maklakaskin chatum tiku ni kanajla. Xlakata ¿la talalin tuku xaʼakgstitum chu tuku nitlan? [...] ¿O tuku akxtum katlawa chatum tiku kanajla chu chatum tiku ni kanajla?» (2 Corintios 6:14, 15).