Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 48

Latamapara xkgawasa tiku xninita xchixku

Latamapara xkgawasa tiku xninita xchixku

Akxni xʼanan tatsinksni, Jehová wanilh Elías: “Kapit kSarepta. Anta namawiyan chatum tiku ninita xchixku”. Kxkilhtin kachikin, akxilhli pi ksakima kiwi chatum puskat tiku nitu xkgalhi chu skinilh tsinu chuchut. Akxni puskat alh putsa, Elías wanilh: “Katlawa litlan, na kakintawa aktsu kaxtalanchu”. Pero puskat kgalhtilh: “Nitu kkgalhi kaxtalanchu, nila tuku kmaxkiyan. Kajwatiya kkgalhi harina chu aceite xlakata naktlawa tuku nakwa akit chu kinkgawasa”. Elías wanilh: “Jehová wanit pi komo wix nakintlawaniya tsinu kaxtalanchu, nakgalhiya aceite chu harina asta akxni nasenampara”.

Wa xlakata puskat tanulh kxchik chu tlawanilh kaxtalanchu xpalakachuwina Jehová. Uma puskat chu xkgawasa kgalhikgolh tuku nawakgo asta akxni mimpa sen, chuna la xmalaknunit Jehová. Xalu niku xtajuma harina chu aceite nikxni sputkgolh.

Alistalh lalh tuku lu nitlan. Xkgawasa puskat lu tatatlalh chu nilh chu xla tasaskinilh Elías pi xmakgtayalh. Wa xlakata Elías  tiyalh kgawasa kxmakxpan xtse. Lilh kʼakgtum cuarto nema xwi kxlikilhmaktiy chiki. Alistalh, mamilh kputama chu tlawanilh oración Jehová: “Jehová, katlawa litlan, kamaspitnipara xlatamat uma aktsu kgawasa”. ¿Katsiya tuku xlakata lu nila xtakanajla pi chuna xtlawalh Jehová? Xlakata uma kilhtamaku, ni chatum nin xlakastakwananit. Chu nachuna, xlakata uma puskat chu xkgawasa ni israelitas xwankgonit.

Uma kgawasa tsukulh jaxanan chu latamapa. Elías wanilh puskat: “¡Kaʼakxilhti! Minkgawasa staknan”. Xla lu paxuwalh chu wanilh Elías: “La uku kkatsi pi xlikana wix kskujni Dios. Tuku lichuwinana wa xtachuwin Jehová, wa xlakata putum kilhtamaku kgantaxtu”.

«Kalilakpuwantit cuervos: Xlakan ni chananankgo chu ni makikgo xtamakgalankan; ni kgalhikgo niku namakikgo xtamakgalankan; pero Dios kamawi. ¿Ni tlakg xtapalh wixin nixawa umakgolh tsiktsi?» (Lucas 12:24).