Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 46

Kaliʼakxilhkan ksipi Carmelo

Kaliʼakxilhkan ksipi Carmelo

Tamapakgsin xapulakkaw tribus xalak Israel kgalhilh lhuwa mapakgsinanin tiku lixkajni xlikatsikgo, pero Acab wa tiku tlakg nitlan likatsilh. Tatamakgaxtokgli chatum puskat tiku lixkajni xlikatsi chu xkakninani dios Baal. Xwanikan Jezabel. Acab chu Jezabel tlawakgolh pi latamanin xkakninanikgolh Baal. Na kamakgnikgolh lhuwa xpalakachuwinanin Jehová. ¿Tuku tlawalh Jehová? Malakgachalh palakachuwina Elías xlakata wi tuku xmakatsinilh Acab.

Elías wanilh Acab pi ni xʼama senan kʼIsrael xlakata lu nitlan xlikatsi. Liwaka akgtutu kata nitu stakli kkapukuxtun, chu latamanin lu xtsinksmakgolh. Alistalh, Jehová malakgachalh Elías xlakata natachuwinampara Acab. Mapakgsina wanilh Elías: “Wix kaj wiliya taʼakglhuwit. Putum uma minkuenta”. Elías kgalhtilh: “Ni kinkuenta pi ni senan. Ni senan xlakata wix kakninaniya Baal. Kakamamakxtupi kachikin chu xpalakachuwinanin Baal kxʼakgstin sipi Carmelo. Wi tuku naliʼakxilhaw”.

Kachikin tamakxtumikgolh ksipi chu Elías kawanilh: “Mililaksakatkan. Komo Jehová xaxlikana Dios, wa kastalanitit. Pero komo Baal xaxlikana, wa kastalanitit. Wi tuku naliʼakxilhaw: 450 xpalakachuwinanin Baal xlilakkaxwilitkan xtamakamastankan chu natasanikgo xdioskan. Akit nachuna naktlawa chu naktasani Jehová. Tiku namakamin lhkuyat, wa xaxlikana Dios”. Kachikin wa pi tlan.

Wa xlakata, xpalakachuwinanin Baal lakkaxwilikgolh xtamakamastankan. Tantaku tasanikgolh xdioskan: “¡Baal, kakilakgalhtiw!”. Pero xlakata Baal ni xkgalhtinan, Elías xkalikgalhkgamanan chu xkawani: “Xliputum militliwakgakan kachuwinantit. Max lhtatatamalh chu lakaskin pi wi tiku namastakwani”. Tsukulh tsiswan chu xpalakachuwinanin Baal chuntiya tasanikgolh, pero niti xkakgalhti.

Elías wililh xtamakamastan kpumakamastan chu mawakanilh lhuwa chuchut. Alistalh tlawalh oración: “Oh, Jehová, kaʼakxilhli kachikin pi wix xaxlikana Dios”. Jehová tunkun malakgachalh lhkuyat xlakata klhkuyulh  tamakamastan. Latamanin wankgolh: “¡Jehová wa xaxlikana Dios!”. Chu Elías wa: “Ni kamastatit talakaskin pi natsalakgo xpalakachuwinanin Baal”. Ama kilhtamaku, kamakgnika 450 xpalakachuwinanin Baal.

Alistalh, tasiyalh aktsu puklhni kpupunu chu Elías wanilh Acab: “Mima lanka sen. Kamakaxti mimputlaw chu kapit kminchik”. Akgapun tsukulh litatsama xalakgtsitsakga puklhni, tsukulh min un chu lu palha tsukulh senan. Ksputnita lhkakna. Acab lu lakapala alh anta kxputlaw. Jehová makgtayalh Elías xlakata tlakg lakapala xʼalh nixawa putlaw. Pero ¿ksputnit putum xtaʼakglhuwit Elías? Kaʼakxilhwi.

«Xlakata latamanin nakatsikgo pi wix, tiku wanikan Jehová, kajwatiya wix tiku tlakg Lanka xlikalanka katiyatni» (Salmo 83:18).