Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 38

Jehová maxki litliwakga Sansón

Jehová maxki litliwakga Sansón

Lhuwa Israelitas kakninaniparakgolh ídolos, wa xlakata Jehová mastalh talakaskin pi filisteos naʼakgchipakgo kachikin Israel. Pero xwilakgo makgapitsi israelitas tiku xpaxkikgo Jehová, la Manóah. Xla chu xpuskat ni xkgalhikgo kamanan. Akgtum kilhtamaku, Jehová malakgachalh xʼángel xlakata nawani xpuskat Manóah: “Nakgalhiya chatum kgawasa tiku nakalakgmaxtu israelitas kxmakan filisteos. Nazareo nawan”. ¿Katsiya tiku nazareos? Wa latamanin tiku xkalakgayawakan tuku lu xlakaskinka xlakatin Jehová chu nila xkachukunikan xchixitkan.

Titaxtulh kilhtamaku, lakachilh xkgawasa Manóah chu wanika Sansón. Akxni stakli, Jehová maxkilh lhuwa litliwakga. ¡Tlan xlimakgni xmakan tantum león! Akgtum kilhtamaku, makgnilh 30 filisteos chu niti makgtayalh. Wa xlakata filisteos xsitsinikgo chu xkatsiputunkgo la tlan namakgnikgo. Akgtum tsisni akxni Sansón klhtatama kʼGaza, xtalamakgasitsin ankgolh kxmalakcha uma kachikin chu anta kgalhkgalhikgolh xlakata tsisa xmakgnikgolh. Pero kxitat tsisni, Sansón takilh chu alh niku xlaktanukan kkachikin chu maktinilh xmalakcha patsaps chu alistalh kukalilh asta kxʼakgstin sipi lakatsu kHebrón.

Alistalh, filisteos ankgolh tachuwinankgo Dalila, xtaskin Sansón, chu wanikgolh: “Nakkaxokgoniyan lhuwa miles tumin xaplata komo nakatsiya niku tiya xlitliwakga Sansón. Xlakata kchipaputunaw chu ktamaknuputunaw kpulachin”. Dalila xlakaskin tumin, wa xlakata tlawalh tuku wanika. Xapulana, Sansón ni xwaniputun Dalila niku xminacha putum xlitliwakga. Pero xla lhuwa xlimaʼakglhuwi uma chu xla wanilh niku xminacha. Wanilh: “Nikxni kiʼakchukukanit xlakata akit nazareo. Komo xkiʼakchukuka, nakmakgatsankga kilitliwakga”. Lu nitlan pi Sansón wanilh Dalila, ¿nichuna?

 Dalila tunkun kawanilh filisteos: “¡Kkatsiya niku minacha xlitliwakga!”. Tlawalh pi Sansón klhtatalh kxtsokgosni chu wi tiku tasanilh xlakata xchukunilh xchixit. Alistalh Dalila pixlanka wa: “¡Sansón, filisteos unu wilakgolh!”. Xla lakastakwanalh, pero makgkatsilh pi nialh xkgalhi litliwakga. Filisteos chipakgolh, maxtunikgolh xlakgastapu chu tamaknukgolh kpulachin.

Akgtum kilhtamaku, lhuwa mil filisteos tamakxtumikgolh kxtemplo xdioskan Dagón. Pixlanka xwankgo: “Kidioskan kinkamakamaxkinitan Sansón. Kamaxtutit puntsu xlakata nakinkamakgapaxuwayan”. Yawaka kxitat akgtiy talayaw chu tsukukgolh likgalhkgamanankgo. Sansón pixlanka wa: “Jehová, katlawa litlan, amakgtum kimaxki litliwakga”. Kstakninita xchixit, wa xlakata xliputum xlitliwakga makaʼalh kgantiy talayaw chu templo talaktilh chu kamakgnilh putum tiku anta xtanumakgo. Sansón na nilh.

«Kkgalhi litliwakga nema putum kmatlani, xlakata tiku kimaxki litliwakga» (Filipenses 4:13).