Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 28

Tantum burra nema chuwinan

Tantum burra nema chuwinan

Atsinu ni 40 kata israelitas lamakgo kdesierto. Lhuwa laklanka kachikinin xkaʼakgchipakgonit. La uku xwilakgo niku kaxtum kxtiyat Moab, lakatsu kkgalhtuchokgo Jordán chu nialh makgas xʼamakgo tanukgo kTiyat nema xKawanikanit pi Nakamaxkikan. Balac, mapakgsina xalak Moab, xpekuan pi israelitas xkamakglhtikgolh xtiyat. Wa xlakata skinilh chatum chixku nema xwanikan Balaam xʼalh kMoab xlakata wi tuku nitlan kskilh xkalakgmilh israelitas.

Pero Jehová wanilh Balaam: “Ni naskina kakalakgmilh tuku nitlan israelitas”. Wa xlakata Balaam ni amputulh kMoab. Mapakgsina Balac xlimakgtiy wanipa xʼalh, chu malaknunilh namaxki putum tuku xla xlakaskilh, pero Balaam ni amputumpa. Dios wanilh: “Kmaxkiyan talakaskin napina. Pero kajwatiya nawana tuku akit nakwaniyan”.

Balaam kgetawi xburra chu alh kMoab, ksur. Xla xlakpuwanit naskin kaʼakgspulalh tuku nitlan Israel maski Jehová xwaninit ni chuna xtlawalh. Xʼángel Jehová makgtutu tasiyanilh ktiji. Balaam ni xʼakxilha ángel pero xburra xʼakxilha. Xapulana, burra patanulh ktiji chu tanulh kkakiwin. Alistalh burra lu talakatsuwilh kpatsaps chu asta tsukulh lakxkitiwakani xtantun Balaam. Xaʼawatiya xburra tamalh kxitat tiji. Putum uma kilhtamaku, Balaam xlimakgsnokgma kgantum kiwi.

Alistalh Jehová tlawalh pi burra xchuwinalh. Burra kgalhskilh Balaam: “¿Tuku xlakata kimakgsnokgpat?”. Balaam kgalhtilh: “Xlakata tlawaya pi xatonto naklitaxtu, komo xakkgalhilh akgtum espada xakmakgnin”. Xburra wanilh: “Akglhuwata kata kinkgetawilanita. ¿Minit kilhtamaku chuna xaktlawanitan?”.

Jehová mastalh talakaskin pi Balaam xʼakxilhli ángel. Ángel wanilh: “Jehová wanin pi ni naskina kalakgmilh tuku nitlan Israel”. Balaam kgalhtinalh: “Nitlan tuku ktlawalh. Naktaspita kkinchik”. Pero ángel  kgalhtilh: “Tlan napina kMoab, pero kajwatiya nawana tuku Dios nawaniyan”.

¿Lakpuwana pi Balaam wi tuku katsinilh? Nichuna, xlakata alistalh makgtutu limawakaputulh tuku nitlan Israel. Pero uma pulaktutu, Jehová tlawalh pi tuku nitlan tasikulunalin xlitaxtulh. Xaʼawatiya, israelitas talachipakgolh Moab chu Balaam nilh. Tlakg tlan xtiwa komo Balaam xkgaxmatnilh Jehová, ¿nichuna?

«Ni kakgalhipututit tuku tapakgsini achatum, xlakata akxni chatum lataman lhuwa tuku kgalhi, tuku kgalhi ni maxki latamat» (Lucas 12:15).