Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 25

Tabernáculo niku nakakninanikan Dios

Tabernáculo niku nakakninanikan Dios

Akxni Moisés xwi ksipi Sinaí Jehová wanilh pi xtlawalh akgtum tabernáculo. Tabernáculo akgtum aktsu chiki nema lu xlakaskinka niku israelitas tlan xkakninanikgo Dios. Na tlan xlinkgolh tabernáculo kaniwa niku xʼankgolh.

Jehová wa: “Kawani kachikin kamastakgolh tuku matlanikgo xlakata natatlawa tabernáculo”. Israelitas linkgolh oro, plata, cobre, xalakswan chiwix chu joyas. Na mastakgolh lana, lino, kxuwa animales chu atanu. Lu lhuwa tuku maskiwinankgolh, wa xlakata Moisés kawanilh: “Tlantiya. Nialhtu kalitantit”.

Lhuwa lakchixkuwin chu lakpuskatin nema wi tuku tlan xtlawakgo makgtlawakgolh tabernáculo. Jehová kamaxkilh liskgalala xlakata tlan xtlawakgolh taskujut. Makgapitsi xtlawakgo hilo, xtokgonankgo o xtsapanankgo. Makgapitsi xliskujkgo oro, xchukukgo chu xwilikgo chiwix, o wi tuku xlitlawakgo kiwi.

Kachikin tlawakgolh tabernáculo chuna la Jehová kalimapakgsilh. Tlawakgolh akgtum stlan lhman lhakgat xlakata pulaktiy xtamapapitsilh tabernáculo: Santo chu Santísimo. Anta kSantísimo xwi arca xla talakkaxlan nema xlitatlawanit acacia chu oro. Anta kSanto xwi akgtum candelabro xla oro, akgtum mesa chu niku klhkuyukan incienso. Kkilhtin xwi akgtum palangana o tina xla cobre, chu lanka pumakamastan. Akxni israelitas xʼakxilhkgo arca xla talakkaxlan, xlakapastakkgo pi xmalaknunikgonit nakgalhakgaxmatkgo Jehová.  ¿Katsiya tuku akgtum talakkaxlan? Wa tuku lu xlakaskinka malaknukan.

Jehová kalaksakli Aarón chu xkamanan xlakata sacerdotes xwankgolh chu kskujkgolh ktabernáculo. Xlimakgtakgalhatkan xwanit chu anta xtlawanikgolh tamakamastan Jehová. Kajwatiya sumo sacerdote, Aarón, tlan xtanu kSantísimo. Kaj makgtum akgatunu kata xtanu chu xtlawa akgtum tamakamastan xlakata xtalakgalhin, xla xfamilia chu xtalakgalhin kachikin Israel.

Israelitas maʼakgasputukgolh tabernáculo akxni xtitaxtunita akgtum kata lata xtaxtukgonitancha kʼEgipto. La uku xkgalhikgo niku tlan xkakninanikgolh Jehová.

Jehová wililh akgtum puklhni xakgstin tabernáculo chu limatsamalh xlilanka. Chuna limasiyalh pi xpaxuwa. Komo puklhni ni xtatsuwi xakgstin tabernáculo, israelitas xtamakgxtakgkgo niku xwilakgo. Pero komo puklhni xtatalhmani xkatsikgo pi alakatanu xliʼanatkan. Xmalakgxtukgo tabernáculo chu xʼankgo niku xʼan puklhni.

«Na kkgaxmatli, akgtum pixlanka tachuwin nema xtaxtuyacha klaktawilh nema xwan: “¡Kaʼakxilhti! Xchik Dios katawi latamanin, xla nakatalatama, chu xlakan xkachikin nalitaxtukgo. Chu Dios nakatatawila”» (Revelación 21:3).