Akxni faraón kgaxmatli pi israelitas xtaxtukgonit kʼEgipto, lakpuwa pi ni xlilat xlakata kamakgxtakgli. Kalimapakgsilh ksoldados: “Kamakaxtit putum carros nema litlawakan guerra chu kakaputsastalaw. Ni xtikamakgxtakgwi”. Wa xlakata, faraón chu ksoldados tsukukgolh kaputsatalanikgo.

Jehová xkalipulalima xkachikin akgtum puklhni kakuwani chu lhkuyat katsisni. Kalilh kxaSpinini pupunu chu kawanilh pi anta xtachokgokgolh.

Alistalh, israelitas akxilhkgolh pi xkastalanimakgo faraón chu xsoldados. Israelitas nila niku xʼankgo xlakata kxlakatinkan xwi pupunu chu xkastalanimakgo egipcios. Tsukukgolh taʼakglhuwikgo chu wanikgolh Moisés: “¡Naniyaw! ¿Tuku xlakata kilamaxtuw kʼEgipto?”. Pero Moisés kakgalhtilh: “Ni kapekuantit. Kakgalhkgalhitit chu kaʼakxilhtit la nakalakgmaxtuyan Jehová”. ¿Nixlikana pi Moisés lu xlipawan Jehová?

Alistalh Jehová kawanilh israelitas pi xtakaxparakgolh. Uma tsisni, Jehová malakxilhli puklhni chu itat wililh anta niku xwilakgo israelitas chu egipcios. Anta niku xmimakgo egipcios kapuskwa xwanit pero niku xwilakgo israelitas xkaxkgakga.

 Alistalh Jehová wanilh Moisés pi kstonkgli xmakan anta kpupunu. Uma tlawalh pi tantaskaka tliwakga xmilh un. Pupunu tapitsilh chu tamalh akgtum tiji. Lhuwa israelitas kxakaskakni niku patakutkgolh chu xtachaxkgonit chuchut lata niku xyakgo asta xaʼakilhtutu.

Xsoldados faraón kaputsastalanikgolh israelitas kxʼitat pupunu. Pero Jehová tlawalh pi soldados nialh xkatsikgolh tuku natlawakgo. Xtaxtunikgo xllanta xcarrojkan. Wa xlakata soldados pixlanka wankgolh: “¡Kataspitwi! Jehová kamakgtayama xkachikin”.

Jehová wanilh Moisés: “Kastonkgti mimakan kpupunu”. Kaj xalan, chuchut kaʼaktamakgolh soldados xalak Egipto. Faraón chu putum xsoldados nikgolh. Nipara chatum lakgtaxtulh.

Kxakilhtutu pupunu, putum latamanin limalankikgolh Jehová akgtum takilhtlin: “Nakkilhtlini Jehová, xlakata lu tamalankilh. Kawayu chu tiku xpulalin kamakaʼalh kpupunu”. Akxni kachikin xkilhtlimakgo, lakpuskatin xtantlimakgo chu xtlakgmakgo xpanderetaskan. Xputumkan xpaxuwamakgo xlakata la uku xlikana xlakgtaxtukgonit.

«Wa xlakata tlan natatliwakglhaw chu nawanaw: “Jehová kimakgtayana; ni ktipekualh. ¿Tuku nakintlawani chixku?”» (Hebreos 13:6).