Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 18

Ni lu xalanka kiwi lakgpasama

Ni lu xalanka kiwi lakgpasama

Moisés latamalh kMadián 40 kata. Ama kilhtamaku, tamakgaxtokgli chu kgalhilh kamanan. Akgtum kilhtamaku, xkakuentajtlawama xborregos lakatsu ksipi Sinaí chu akxilhli tuku nila takanajla. Xlakgpasama kgantum ni lu xalanka kiwi, ¡pero ni klhku! Akxni Moisés talakatsuwilh xlakata naʼakxilha tuku xlama, kgaxmatli pi taxtulh tachuwin kʼaktsu kiwi. Tiku xchuwinama wanilh: “¡Moisés! Nialh katalakatsuwi. Katatuxtunanti xlakata yat kxasanto tiyat”. Wa Jehová tiku xmaklakaskima chatum ángel xlakata natachuwinan Moisés.

Moisés pekualh, wa xlakata talakgatlapalh. Tiku xchuwinama wanilh: “Kakxilhnit pi israelitas lu patinamakgo. Nakkalakgmaxtu kxmakan egipcios chu nakkalin kxatlan tiyat. Chu akit klakaskin pi wix nakamaxtuya kinkachikin anta kʼEgipto”. ¿Lakpuwana pi Moisés kaks lilakawa?

Moisés kgalhskilh: “¿Tuku nakwan akxni nakinkgalhskinkan tiku kimalakgachalh?”. Dios kgalhtilh: “Kakawani pi Jehová, xDios Abrahán, xDios Isaac chu xDios Jacob malakgachanitan”. Moisés wa: “¿Chu komo kachikin ni nakinkanajlanikgo?”. Jehová wi tuku limasiyanilh pi xʼama makgtaya. Wanilh pi xmakgalh xlixtokgo kkatutsu chu akxni chuna tlawalh, ¡xlixtokgo tantum luwa wa! Alistalh, Moisés lichipalh kstajan chu xlixtokgo wampa. Chu Jehová wanilh: “Akxni natlawaya uma milagro, nalimasiya pi akit kmalakgachan”.

Pero Moisés wa: “Akit nila kchuwinan kxlakatin amakgapitsi”. Jehová malaknunilh: “Akit nakwaniyan tuku miliwanat, chu nachuna, nakmalakgacha mintala Aarón xlakata namakgtayayan”. Xlakata la uku Moisés xkatsi pi Jehová xʼama makgtaya, taspitli kʼEgipto chu kalilh xpuskat chu xkamanan.

«Ni kalilakgaputsatit la nachuwinanatit o tuku nawanatit, xlakata ama hora nakamakatsinikanatit tuku nawanatit» (Mateo 10:19).