Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 5

Xʼarca Noé

Xʼarca Noé

Titaxtulh kilhtamaku, analh lhuwa latamanin kkatiyatni. Atsinu ni putum nitlan xlikatsikgo. Asta makgapitsi ángeles nitlan likatsikgolh. Makgxtakgkgolh akgapun, anta niku xlamakgolh chu minkgolh kkatiyatni. ¿Katsiya tuku xlakata chuna tlawakgolh? Xlakata tlan xkgalhikgolh xmaknikan la lakchixkuwin chu tlan xkatatamakgaxtokgkgolh lakpuskatin.

Umakgolh ángeles katakgalhikgolh kamanan lakpuskatin. Umakgolh kamanan lu lakgtliwakga wankgolh akxni stakkgolh chu lixkajni xlikatsikgo. Chu nitlan tuku xkatlawanikgo latamanin. Jehová ni xʼama masta talakaskin chuntiya chuna xlalh. Wa xlakata lakpuwa nakalimasputu akgtum munkaklat tiku nitlan xlikatsikgo, lu palha senalh chu chuchut litatsamalh katiyatni.

Pero xwi chatum chixku tiku tanu xlikatsi, xlakata xpaxki Jehová. Xwanikan Noé. Xkgalhi xpuskat chu kgalhtutu xkamanan: Sem, Cam, chu Jafet chu chatunu xkamanan xkgalhikgo xpuskatkan. Jehová wanilh Noé pi xtlawalh akgtum arca, akgtum lanka caja xakiwi nema tlan xlatawakalh kchuchut. Chuna Noé chu xfamilia tlan xlakgtaxtukgolh kMunkaklat. Nachuna, Jehová limapakgsilh pi xkatamaknulh kʼarca lhuwa animales xlakata na xlakgtaxtukgolh.

Noé tunkun tsukulh tlawa arca. Xla chu xfamilia max 50 kata litlawakgolh arca chu tlawakgolh chuna la Jehová xkawaninit. Ama kilhtamaku, Noé kamakatsinilh latamanin pi xʼama min Munkaklat, pero nipara chatum kgalhakgaxmatli.

Chalh kilhtamaku akxni xtanukgolh kʼarca. ¿Katsiputuna tuku lalh alistalh?

«Chuna la xwanit kxkilhtamaku Noé, nachuna nawan akxni xKgawasa chixku katawilan nawan» (Mateo 24:37).