Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 94

Kstalaninanin Jesús makglhtinankgo espíritu santo

Kstalaninanin Jesús makglhtinankgo espíritu santo

Xtitaxtunita 10 kilhtamaku lata Jesús xtaspitnit kʼakgapun. Kstalaninanin makglhtinankgolh espíritu santo. Xtlawamaka Pascua xla Pentecostés kkata 33, chu latamanin xalak lakalhuwa kachikinin xminkgonit kJerusalén xlakata namakgtlawakgo Pascua. Max 120 kstalaninanin Jesús xtamakxtumikgonit kʼakgtum cuarto xlikilhmaktiy chiki, kaj xalan wi tuku lalh nema kaks malakawaninan. Xakgxakgakan kstalaninanin Cristo tasiyalh laktsu lhkuyat, chu xputumkan tsukukgolh chuwinankgo tanu tanu tachuwin. Na wi tuku takgaxmatli la akgtum lanka un kxpulakni chiki.

Tiku xminkgonit kJerusalén xalak atanu países kgaxmatkgolh tuku makasanalh chu lakapala ankgolh xlakata nakatsikgo tuku xlama. Kaks lilakawankgolh akxni kgaxmatkgolh pi kstalaninanin Cristo xchuwinamakgolh kʼatanu tachuwin. Xwankgo: “Umakgolh latamanin xalak Galilea, ¿tuku xlakata tlan chuwinankgo kkintachuwinkan?”.

Pedro chu amakgapitsi apóstoles tayakgolh kxlakatin putum  latamanin. Pedro kawanilh: “Wixin makgnitit Jesús, pero Jehová malakastakwanilh. Uku Jesús wilacha kʼakgapun kxpakgastakat Dios. Chu kinkamaxkinitan espíritu santo nema xkinkamalaknuninitan. Wa xlakata akxilhnitantit chu kgaxpatnitantit umakgolh milagros”.

Latamanin lu kaks lilakawankgolh. Xtachuwin Pedro kalakgchalh xnakujkan, wa xlakata kgalhskininankgolh: “¿Tuku kilitlawatkan?”. Xla kakgalhtilh: “Kamakgxtakgtit mintalakgalhinkan chu katamunutit kxtukuwani Jesús. Alistalh na namakglhtinanatit espíritu santo”. Max 3,000 tiku tamunukgolh uma kilhtamaku. Chu lata ama kilhtamaku, kJerusalén tsukulh talhuwi kstalaninanin Jesús. Apóstoles tsukukgolh lakkaxwilikgo congregaciones xlakata xtamakgtay espíritu santo. Chuna tlan kamasiyanikgolh amakgapitsi stalaninanin putum tuku Jesús xkalimapakgsinit.

«Komo kxlakatin amakgapitsin minkilhni wan pi Jesús Malana, chu kminaku kanajlaya pi Dios malakastakwanilh kkalinin, nalakgtaxtuya» (Romanos 10:9).