Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 97

Cornelio makgamakglhtinan espíritu santo

Cornelio makgamakglhtinan espíritu santo

Anta kCesarea xwi lu xlakaskinka oficial xalak Roma, tiku xwanikan Cornelio. Maski ni judío xwanit, judíos xmaxkikgo kakni. Lu tlan xlikatsi, xlakata lhuwa tuku xkamaxki tiku ni xkgalhikgo tumin. Cornelio xkanajlani Jehová chu ankgalhin xtlawani oración. Akgtum kilhtamaku, tasiyanilh chatum ángel chu wanilh: “Dios kgaxmatnit miʼoraciones. Kakamalakgacha miskujni kkachikin Jope, niku wi Pedro, xlakata nawanikgo pi kalakgmin”. Cornelio tunkun kamalakgachalh kgalhtutu lakchixkuwin kJope, nema xwi 50 kilómetros xlimakgat anta ksur.

Anta kJope, Pedro wi tuku makxilhnika. Akxilhli animales nema judíos ni xkamaxkikan talakaskin nawakgo. Alistalh kgaxtmatli pi wi tiku xwanima pi xwalh. Pedro ni lakaskilh chu wa: “Nikxni kwanit tantum animal xataxkajwani”. Pero kgalhtika: “Ni kawanti pi umakgolh animales xataxkajwani, la uku Dios wan pi nialh xataxkajwani”. Na wanika: “Kgalhtutu lakchixkuwin yakgolh kmimalakcha, kakatapi”. Pedro alh kmalakcha chu kakgalhskilh lakchixkuwin tuku xlakgminkgonit. Xlakan kgalhtikgolh: “Cornelio, chatum oficial xalak Roma, kinkamalakgachanitan. Lakaskin nakilataʼanaw kxchik  kCesarea”. Pedro kawanilh lakchixkuwin pi anta xtamakgxtakgkgolh ama katsisni. Lichali, kataʼalh kCesarea. Makgapitsi natalan xalak Jope na stalakgolh.

Akxni Cornelio akxilhli pi chalh Pedro, tatsokgostalh. Pero Pedro wanilh: “Kataya. Akit na kaj chatum chixku la wix. Dios kiwanilh pi xakmilh kminchik, maski judíos ni ktanuyaw kxchikkan tiku ni judíos. La uku, katlawa litlan, kakiwani tuku xlakata kintasaninita”.

Cornelio wanilh Pedro: “Akgtatita kilhtamaku titaxtunit la xaktlawanima oración Dios, chu chatum ángel kiwanilh pi xaktasanin. Katlawa litlan, kakilamasiyaniw tuku wan Jehová”. Pedro kgalhtinalh: “La uku liwana kʼakgatekgsa pi Dios ni laksakpaxkinan, xla makgamakglhtinan putum tiku kakninaniputun”. Pedro lhuwa tuku kamasiyanilh xlakata Jesús. Cornelio chu tiku anta xwilakgo makgamakglhtinankgolh espíritu santo chu tamunukgolh.

«Kputum kachikinin tiku pekuani chu tlawa tuku xaʼakgstitum xla makgamakglhtinan» (Hechos 10:35).