Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 87

Akxni xaʼawatiya katawayalh Jesús

Akxni xaʼawatiya katawayalh Jesús

Judíos xtlawakgo Pascua akgatunu kata, kilhtamaku 14 xla nisán. Chuna xlakapastakkgo pi Jehová xkalakgmaxtunit kʼEgipto chu xkapulalinit kTiyat nema xKawanikanit pi Nakamaxkikan. Kkata 33, Jesús chu apóstoles tlawakgolh Pascua kʼakgtum cuarto xlikilhmaktiy chiki kJerusalén. Akxni xtawayankgonita, Jesús wa: “Chatum tiku wi unu, nakistamakgan”. Apóstoles kaks lilakawankgolh chu kgalhskinkgolh: “¿Tiku?”. Jesús kakgalhtilh: “Wa tiku nakmaxki uma aktsu kaxtalanchu”. Chu maxkilh aktsu kaxtalanchu Judas Iscariote. Judas, lakapala tayalh chu alh.

Alistalh Jesús tlawalh oración, mapitsilh kaxtalanchu chu kamaxkilh xʼapóstoles tiku tatamakgxtakgkgolh. Kawanilh: “Kawatit uma kaxtalanchu. Kilhchanima kintiyatliwa nema nakmakamasta mimpalakatakan”. Alistalh, tlawalh akgtum oración xpalakata vino, kamatitaxtinilh apóstoles chu kawanilh: “Kalikgotnantit uma vino. Kilhchanima kinkgalhni nema nakmakamasta xlakata natapatinankan talakgalhin. Kkawaniyan pi wixin nakilatamapakgsinanaw kʼakgapun. Akgatunu kata katlawatit uma xlakata nakililakapastakatit”. Kstalaninanin Jesús chuntiya tamakxtumikgo kata kata watiya uma kilhtamaku akxni tsiswamaja. Uma tamakxtumit wanikan xTaway kiMalanakan.

 Akxni xwayankgonitata, apóstoles tsukukgolh litaʼakglhuwikgo tiku tlakg xlakaskinka. Pero Jesús kawanilh: “Tiku tlakg xlakaskinka wixin kmilakgstipankan talakaskin nalikatsi la tiku tlakg xaʼaktsujku o ni lu xlakaskinka”.

Jesús na kawanilh: “Wixin kiʼamigos. Wa xlakata kkawaniyan putum tuku kinTlat lakaskin nakatsiyatit. Nialh makgas naktaspita kʼakgapun, niku wi kinTlat. Pero wixin natamakgxtakgatit unu, chu latamanin nakatsikgo pi wixin kistalaninanin komo nalapaxkiyatit. Milalipaxkitkan chatunu chatunu chuna la akit kkapaxkinitan”.

Xaʼawatiya, Jesús tlawalh akgtum oración niku skinilh Jehová pi xkakuentajtlawalh putum kstalaninanin chu xkamakgtayalh akxtum kskujkgolh chu ni xlatataʼakglhuwikgolh. Na tlawalh oración xlakata xtukuwani Jehová xtasantujlilh. Alistalh, Jesús chu xʼapóstoles kilhtlinikgolh Jehová chu taxtukgolh. La uku atsinu tsankga nachipakan Jesús.

«Ni kapekuantit, ni xalhuwa borregos, xlakata minTlatkan xatapaxuwan nakamaxkiyan Tamapakgsin» (Lucas 12:32).