Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 81

Taʼakgchuwin xalak Sipi

Taʼakgchuwin xalak Sipi

Akxni xkalaksaknit 12 xʼapóstoles, Jesús mincha ksipi chu alh niku lhuwa latamanin xwilakgolh. Xminkgonitancha kʼGalilea, kJudea, kTiro, kSidón, kSiria chu kxakilhtutu kgalhtuchokgo Jordán. Liminkgolh tatatlanin o tiku xkamakgapatinamakgo demonios, chu Jesús putum kamapaksalh. Tawilalh ksipi chu tsukulh katachuwinan latamanin. Kawanilh tuku kilitlawatkan komo xʼamigo Dios litaxtuputunaw. Kiliʼakxilhatkan pi maklakaskinaw Jehová chu kilikatsinitkan la napaxkiyaw. Pero nila katipaxkiw Dios komo ni kapaxkiyaw amakgapitsin. Tlan kilikatsitkan chu xalakatitum kakalikatsiniw putum latamanin asta maski tiku ni kinkaʼakxilhputunkgoyan.

Jesús wa: “Ni kajwatiya talakaskin napaxkiya tiku tlan talalipina, na milipaxkit tiku mintalamakgasitsin chu natapatinana xliputum minaku. Chu komo wi tiku nasitsiniyan, tunkun kapit skiniya katapatin. Kakalikatsini amakgapitsin chuna la xlakaskinti xlikatsinika”.

 Jesús na mastalh lakwan tastakyaw xlakata tuku kgalhiyaw. Wa: “Tlakg xlakaskinka natalalipina Jehová nixawa lhuwa tumin nakgalhiya. Xlakata chatum kgalhana tlan namakglhtiyan tumin, pero nila tiku katimakgkgalhan la talalipina Jehová. Wa xlakata, ni kalilakgaputsa liwat, tuku nalikgotnana o tuku nalhakgaya. Kaʼakxilhti laktsu tsiktsi. Dios ankgalhin kakuentajtlawa xlakata nakgalhikgo tuku nawakgo. Maski nalilakgaputsaya, ni lhuwa kilhtamaku katilatapa. Kalakapastakti: Jehová ankgalhin katsi tuku maklakaskina”.

Latamanin nikxni xkgaxmatkgonit pi wi tiku xchuwinalh la Jesús. Xpulalinanin takanajla ni xkamasiyanikgonit uma. ¿Tuku xlakata Jesús lu tlan makgalhtawakgena xwanit? Xlakata putum tuku xmasiya wa xmasiyaninit Jehová.

«Kalipitit kimukiwi chu nachuna katlawatit la akit, xlakata akit ni xaluku chu ktaktuju, komo chuna natlawayatit natatliwakglhatit» (Mateo 11:29).