Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 79

Jesús tlawa lhuwa milagro

Jesús tlawa lhuwa milagro

Jesús milh kkatiyatni xlakata nalichuwinan xalakwan tamakatsin xla xTamapakgsin Dios. Nachuna, Jehová maxkilh espíritu santo xlakata xtlawalh milagros chu xlimasiyalh tuku natlawa akxni Mapakgsina nawan. Akgtum liʼakxilhtit, Jesús tlan xmapaksa kaxatukawa tajatat. Kanikawa niku xʼan, tatatlanin kskinikgo tamakgtay, chu xla putum xkakuchi. Tiku nila xʼakxilhkgo tlan xʼakxilhkgo, tiku ni xkgaxmatkgo tlan xkgaxmatkgo chu tiku nila xtlawan xtlawankgo. Asta maski kaj kxkilhpan klhakgat kxamakgo tlan xpakskgo. Jesús na xkamaxtu demonios. Latamanin kstalanikgo niku xʼan, chu xla nikxni xkalakgmakgan, asta akxni kaj xakstu xtawilaputun.

Akgtum kilhtamaku, liminka tiku nila xtlawan kchiki niku xwi Jesús. Pero lhuwa latamanin xwilakgolh chu nila tanukgolh, wa xlakata akgstixwakgkgolh chiki xlakata tlan xlakgchaʼankgolh Jesús. Wa xlakata Jesús wanilh tiku nila xtlawan: “Kataki chu katlawanti”. Akxni tsukulh tlawan, latamanin lu kaks lilakawankgolh.

Atanu kilhtamaku, Jesús xchaʼama kʼakgtum kachikin chu 10 lakchixkuwin tiku xkgalhikgo lepra lakgamakgat kilhminikgocha: “¡Jesús, kakilamakgtayaw!”. Uma kilhtamaku, tiku xkgalhikgo lepra ni xkamaxkikan talakaskin nalakgtalakatsuwikgo atanu latamanin. Nachuna, xLimapakgsin Jehová xwan pi tiku xkgalhikgo lepra xliʼanatkan xwanit ktemplo akxni xpakskgolh. Wa xlakata, Jesús kawanilh pi  anta xʼankgolh. Akxni xʼamakgolh ktemplo pakstayakgolh. Akxni chatum akxilhli pi xpaksnita, taspitli xlakata napaxtikatsini Jesús chu namalanki Dios. Maski 10 lakchixkuwin xkgalhikgo lepra, kaj chatum paxtikatsinilh Jesús.

Xwi chatum puskat tiku 12 kata lata xtatatla chu xpaksputun xlakata nialh xtayani. Wa xlakata kalakgstipatanulh latamanin xlakata nalakgtalakatsuwi Jesús kxchakgen chu xamalh xkilhpan xlhakgat. Watiya uma kilhtamaku, paksli. Wa xlakata Jesús kgalhskininalh: “¿Tiku kixamalh?”. Puskat xpekuama, pero lakgtalakatsuwilh chu putum wanilh. Jesús tlan mamakgkatsinilh chu wanilh: “Kintsumat, tlan kapit”.

Chatum mapakgsina tiku xwanikan Jairo tasaskinilh Jesús: “Katat kkinchik. Aktsu kintsumat lu tatatla”. Pero akxni Jesús nina xchaʼan xchik Jairo, aktsu tsumat nilh. Akxni Jesús chaʼalh, akxilhli pi lhuwa latamanin xkatatasamakgolh xfamilia Jairo. Jesús kawanilh: “Ni katasatit, kaj lhtatama”. Chu makgachipalh aktsu tsumat chu wa: “Tsumat, ¡kataki!”. Aktsu tsumat takilh, chu Jesús kawanilh xnatlatni pi xmaxkikgolh tuku xwalh. ¡Kalilakpuwanti la makgkatsikgolh xnatlatni!

«Dios lilaksakli espíritu santo chu litliwakga, chu alh tlawa tuku tlan kxlikalanka katiyatni chu xkakuchima putum tiku xkamakgapatinama Akgskgawini; xlakata Dios xtawi» (Hechos 10:38).