Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 86

Jesús malakastakwani Lázaro

Jesús malakastakwani Lázaro

Jesús xkgalhi kgalhtutu lu tlan xʼamigos tiku xlamakgo kBetania. Xkawanikan Lázaro, María chu Marta chu xkgalhtutukan linatalan xwankgonit. Akgtum kilhtamaku, Jesús xwi kxakilhtutu kgalhtuchokgo Jordán, pero María chu Marta malakgachanikgolh akgtum tamakatsin: “Lázaro lu tatatla. Katlawa litlan, lakapala katat”. Pero Jesús ni alh uma kilhtamaku. Kgalhkgalhilh akgtiy kilhtamaku chu alistalh kawanilh kstalaninanin: “Kaw kBetania. Lázaro lhtatama, chu nakan kmastakwani”. Apóstoles wanikgolh: “Komo Lázaro lhtatama, natatlani”. Wa xlakata Jesús liwana kawanilh: “Lázaro ninit”.

Akxni Jesús chaʼalh kBetania, Lázaro akgtatita kilhtamaku xʼaknu. Lhuwa latamanin xʼankgonit makgoxamixikgo Marta chu María. Marta katsilh pi Jesús xminit chu lakapala alh xlakata natachuwinan. Wanilh: “Malana, komo unu xtawila, kintala ni xtinilh”. Jesús kgalhtilh: “Mintala nalatamapara. ¿Kinkanajlaniya, Marta?”. Xla kgalhtilh. “Akit kkanajla pi nalatamapara akxni naʼanan talakastakwanat”. Wa xlakata, Jesús wanilh: “Akit talakastakwanat chu latamat”.

Alistalh Marta alh wani María: “Jesús unu wi”. María lakapala alh niku xwi Jesús chu latamanin stalanikgolh. Akxni lakgchaʼalh Jesús, María tatsokgostalh chu tsukulh tasa. Wanilh: “Malana, komo unu xtawila, kintalakan uku xlatamalh”. Jesús akxilhli pi lu xpatima chu na tsukulh tasa. Tiku xwilakgolh anta akxilhkgolh Jesús pi xtasama chu tsukukgolh wankgo: “Jesús lu xlikana xpaxki Lázaro”. Pero makgapitsi xlakpuwankgo: “¿Tuku xlakata ni lakgmaxtulh xʼamigo?”. ¿Tuku xʼama tlawa Jesús?

Jesús alh niku xmaknukanit, kʼakgtum lhuku, chu xwi akgtum chiwix nema xlilakgatalakanit. Xla wa: “Kamapanutit chiwix”. Marta wanilh: “Max puksamaja xlakata akgtatita kilhtamaku aknu”. Maski chuna, mapanuka chiwix, chu Jesús tlawalh oración: “Tlat, kpaxtikatsiniyan xlakata kinkgaxpatni. Akit katsi pi ankgalhin kinkgaxpatniya, pero  pixlanka kchuwinan xlakata latamanin nakanajlakgo pi wix kimalakgachanita”. Alistalh pixlanka wa: “¡Lázaro, kataxtu!”. Kaj xalan wi tuku lu tlan lalh, Lázaro taxtulh, xlitamakgswitnitku vendas. Jesús wa: “Kamakglhtitit vendas chu kamaxkitit talakaskin kaʼalh”.

Lhuwa akxilhkgolh tuku lalh chu kanajlanikgolh Jesús, pero makgapitsi ankgolh wanikgo fariseos. Chu lata uma kilhtamaku, lakputsakgolh la namakgnikgo Lázaro chu Jesús. Chatum apóstol, Judas Iscariote, xatsekg kakgalhskin fariseos: “¿La xlilhuwa nakilaxokgoniyaw komo nakkamakgtayayan natekgsatit Jesús?”. Malaknunika 30 monedas xaplata, chu Judas wa pi tlan chu lakputsalh la namakamasta Jesús.

«Dios xaxlikana, kinkalitaxtuniyan chatum Dios tiku lakgmaxtunan, chu Jehová Tiku lakgchan namapakgsinan, tlan lakgmaxtunan kkalinin» (Salmo 68:20).