Jesús tlan xkamapaksa tatatlanin chu xkamalakastakwani ninin. Nachuna, tlan xmapakgsi un chu sen. Akxni xtlawakgonita oración ksipi, Jesús akxilhlakachaʼalh kpupunu xla Galilea chu akxilhli unisen. Xʼapóstoles xtajumakgolh kbarco chu fuerza xlimakgolh maski lu xʼunama. Wa xlakata Jesús taktalh chu tsukulh kgalhtlawan chuchut asta niku xtatekgsa barco. Akxni apóstoles akxilhkgolh pi wi tiku xkgalhtlawama chuchut, lu pekuankgolh. Pero Jesús kawanilh: “Akit Jesús. Ni kapekuantit”.

Pedro wa: “Kimalana, komo wix, kakilimapakgsi pi kaklakgan”. Jesús limapakgsilh: “¡Katat!”. Wa xlakata Pedro takutli kbarco chu tsukulh kgalhtlawan chuchut niku xyacha Jesús maski lu xʼunisenama. Pero akxni Pedro xlakgtalakatsuwima Jesús, akxilhli unisen, chu pekualh. Makgkatsilh pi xtsukuma lakgtsankga chu pixlanka wa: “¡Malana, kakilakgmaxtu!”. Jesús pakgachipalh chu wanilh: “¿Tuku xlakata makpuwanti? ¿Ni kanajlaya?”.

Jesús chu Pedro tawakakgolh kbarco, chu unisen tunkun takaksli. ¿Lakpuwana la makgkatsikgolh apóstoles? Wankgolh: “Lu xlikana, wix xKgawasa Dios”.

Ni kajwatiya ama kilhtamaku Jesús makaksalh tuku anan kkakilhtamaku. Alimakgtum, akxni Jesús chu xʼapóstoles xʼamakgolh kbarco kxakilhtutu pupunu, Jesús lhtatatawi kxchakgen barco. Akxni klhtatama, tsukulh tliwakga unisen. Takgayawana lu tliwakga ksnokgma barco, chu barco tsukulh litatsama chuchut. Apóstoles mastakwanikgolh Jesús chu pixlanka wanikgolh: “¡Makgalhtawakgena, nakniyaw! ¡Kakilamakgtayaw!”. Jesús takilh chu wanilh pupunu: “¡Katakaksti! ¡Nialh kamakasananti!”. Ama kilhtamaku, un chu pupunu tunkun takakskgolh. Alistalh, Jesús kakgalhskilh apóstoles: “¿Ni kgalhiyatit takanajla?”. Chu xakstukan lawanikgolh: “¡Asta un chu pupunu kgalhakgaxmatnikgo!”. Apóstoles katsinikgolh pi komo xlipawankgolh Jesús, nituku xlipekuanitkan xwanit.

«¿Niku xaktawi komo ni xakkgalhilh takanajla, pi tlan xakakxilhli xtalakgalhaman Jehová kxtiyat tiku staknankgo?» (Salmo 27:13).