Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 75

Akgskgawini putsanani Jesús

Akgskgawini putsanani Jesús

Akxni Jesús xtamununita, espíritu santo pulalilh kdesierto. Ni wayalh 40 kilhtamaku, chu wa xlakata xtsinksmaja. Wa xlakata Akgskgawini milh putsanani Jesús. Pulana wanilh: “Komo xlikana wix xkgawasa Dios, kakawani umakgolh chiwix pi kaxtalanchu kalitaxtukgolh”. Pero Jesús likgalhtilh tuku wan xaSanto Tatsokgni: “Tatsokgnit pi latamanin ni kajwatiya maklakaskinkgo taway xlakata nalatamakgo. Na talakaskin nakgaxmatkgo putum tuku Jehová wan”.

Akgskgawini atanu tuku litsakgsapara Jesús: “Komo xlikana xkgawasa Dios wix, katawaka niku tlakg talhman ktemplo chu lhkgen kapit. Tatsokgnit pi Dios namakamin xʼángeles xlakata nalakgmaxtukgoyan”. Pero Jesús likgalhtipa tuku wan xaSanto Tatsokgni: “Tatsokgnit pi ni miliputsananit Jehová”.

Xaʼawatiya, Satanás masiyani putum tamapakgsin xalak kakilhtamaku, tuku lhuwa xtapalh kgalhikgo chu lilanka, chu wanilh: “Nakmaxkiyan putum umakgolh tamapakgsin chu xlilanka komo nakinkakninaniya kaj makgtum”. Pero Jesús kgalhtilh: “¡Kapit Satanás! Tatsokgnit pi kajwatiya Jehová nakakninaniyaw”.

Wa xlakata Akgskgawini tapanulh chu minkgolh makgapitsi ángeles chu maxkikgolh taway Jesús. Akxni xlanita uma, Jesús tsukulh lichuwinan xalakwan tamakatsin xla Tamapakgsin. Wa uma taskujut nema Jehová xlakgayawanit natlawa kkatiyatni. Latamanin lu xlakgatikgo tuku Jesús xmasiya chu kstalanikgo niku xʼan.

«Akgskgawini [...]. Akxni lichuwinan taʼakgsanin, chuwinan kaj tuku lakpuwan, xlakata xaʼakgsanina chu xmakilhtsukina taʼakgsanin» (Juan 8:44).