Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 57

Jehová malakgachalh Jeremías xlakata xpalakachuwinalh

Jehová malakgachalh Jeremías xlakata xpalakachuwinalh

Jehová laksakli Jeremías xlakata palakachuwina xwa kJudá. Limapakgsilh pi xkamakatsinilh tiku anta xlamakgolh chu xkawanilh pi nialh xtlawakgolh tuku nitlan. Pero Jeremías kgalhtilh Jehová: “Kajku kgawasa akit, nila kchuwinan kxlakatin latamanin”. Jehová malaknunilh: “Ni kapekuanti, akit nakmakgtayayan chu nakwaniyan tuku nawana”.

Jehová wanilh Jeremías pi xkamamakxtumilh lakgkgolotsin xalak kachikin, xlakgpakglhli xalu kxlakatinkan chu xkawanilh: “Wa uma tuku naʼakgspula Jerusalén”. Akxni chuna tlawalh, lakgkgolotsin lu sitsikgolh. Chatum sacerdote xwanikan Pasjur kgaxilh Jeremías chu wililh kʼakgtum cepo xla kiwi, uma wamputun, kʼakgtum pakglhat o lhtakgala tamaknunilh xtantun chu xmakan. Jeremías nila tatsuwilh tantaskaka. Pasjur makgxtakgli lichali. Wa xlakata Jeremías wa: “Nialh ktayani. Nialh ktilichuwinalh Dios”. Pero ¿xlikana chuna tlawalh? Ni. Jeremías tlakg liwana lakapastakli chu wa: “Xtamakatsin Jehová xtachuna lhkuyat kkimpulakni. Nila nialh naklichuwinan Dios”. Wa xlakata, chuntiya kamakatsinilh latamanin.

Titaxtulh lhuwa kata, xasasti mapakgsina tsukulh mapakgsinan kJudá. Sacerdotes chu nixaxlikana palakachuwinanin ni xkgaxmatputunkgo xtamakatsin Jeremías. Wa xlakata kawanikgolh príncipes: “Uma chixku lakgchan namakgnikan”. Jeremías wa: “Komo nakilamakgniyaw, namakgniyatit tiku nitu tlawanit. Akit kwan tuku kilimapakgsi Jehová, ni wa tuku klakpuwan”. Akxni príncipes kgaxmatkgolh uma, wankgolh: “Uma chixku ni lakgchan namakgnikan”.

 Jeremías chuntiya lichuwinalh Dios, pero príncipes lu sitsikgolh chu skinikgolh mapakgsina pi xmakgnika. Mapakgsina kawanilh pi tlan xtlawanikgolh tuku xlakaskinkgolh. Wa xlakata chipakgolh chu mujukgolh kʼakgtum pulhman pozo nema xlitsama putlun chu anta xnilh. Tsinu tsinu, Jeremías tsukulh tsankga kputlun.

Chatum puxku xla tamapakgsin, xwanikan Ébed-Mélec, wanilh mapakgsina: “Príncipes mujukgolh Jeremías kʼakgtum pozo. Komo anta namakgxtakgaw, nani”. Mapakgsina wanilh Ébed-Mélec pi xlilh 30 lakchixkuwin chu xmakutulh kpozo. Jeremías putum kilhtamaku lichuwinalh Dios. ¿Nixlikana pi nachuna wamputuna la Jeremías?

«Putum latamanin ni katikaʼakxilhputunkgon kaj xlakata kintukuwani, pero tiku natayani asta akxni namin lisputni nalakgtaxtu» (Mateo 10:22).