Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tuku tlan nakatsiniya kBiblia

 TAKGALHTAWAKGA 62

Akgtum tamapakgsin xtachuna lanka kiwi

Akgtum tamapakgsin xtachuna lanka kiwi

Akgtum tsisni, Nabucodonosor lu makgapekualh tuku limanixnalh. Katasanilh xalakgskgalalan kskujnin xlakata xwanikgolh tuku xkilhchanima xtamanixni, pero nipara chatum tlan wanilh. Xaʼawatiya, mapakgsina tachuwinalh Daniel.

Nabucodonosor wanilh Daniel: “Kkintamanixni kakxilhli kgantum kiwi nema stakli asta chalh kʼakgapun. Tlan xtaʼakxilha kputum katiyatni. Xkgalhi lu lakswan xtuwan chu lhuwa tawakat. Animales xliskgekgnankgo chu laktsu tsiktsi kxʼakgan xtlawakgo xmasakgakan. Alistalh, chatum ángel taktalh kʼakgapun chu pixlanka wa: «¡Kakatit kiwi chu kamakglhtitit xʼakgan! Pero kamakgxtakgtit xkgalhan o xʼakgxkgolh chu xtankgaxekg. Chu kawilinitit cinturón xla hierro chu cobre. Natalakgpali xnaku kiwi. Nialh xnaku chatum chixku katiwa, wata xla tantum lapanit. Chu natitaxtu pulaktujun kilhtamaku. Putum nakatsikgo pi Dios wa Mapakgsina chu xla tlan maxki tamapakgsin tiku namaxkiputun»”.

Jehová wanilh Daniel tuku xkilhchanima tamanixni. Akxni Daniel katsilh tuku xwamputun tamanixni, pekualh. Wa: “Oh, mapakgsina, lu tlan xwa komo chuna xkaʼakgspulalh mintalatlawananin tuku akxilhti kmintamanixni, pero wix chuna naʼakgspulayan. Wix lanka kiwi nema kaka. Namakgatsankgaya mintamapakgsin chu nawaya tuwan kkakiwin chuna la tantum animal. Pero ángel wa pi xʼamaka makgxtakgkan xkgalhan chu xtankgaxekg. Uma wamputun pi mapakgsina nawamparaya”.

Akgtum kata alistalh, Nabucodonosor xtlawama kxʼakgstin xchik chu tsukulh akxilha Babilonia. Xla wa: “¡Lu stlan kachikin nema ktlawanit! ¡Ni anan atanu la akit!”. Akxni chuna xkilhwama, akgtum tachuwin xalak akgapun wanilh: “¡Nabucodonosor! Makgatsankganita mintamapakgsin”.

Ama kilhtamaku, Nabucodonosor akgwitilh chu tsukulh likatsi la tantum animal. Wa xlakata maxtuka kxchik chu tsukulh katalatama animales xalak kakiwin. Lhman stakli xchixit chu xtasiya la xmakchixit  tantum águila chu ksiyan lu lhman wa la xla tantum tsiktsi.

Akxni titaxtulh akgtujun kata, Nabucodonosor nialh akgwitilh chu Jehová mapakgsina xalak Babilonia tlawapa. Wa xlakata Nabucodonosor wa: “Kmalanki Jehová, Mapakgsina xalak akgapun. Xla kamamaxani tiku laktlankajwa. La uku kkatsi pi Jehová wa Mapakgsina chu maxki akgtum tamapakgsin tiku namaxkiputun”.

«Pulana wi tatlankit chu alistalh nitlan kitaxtu; chu tlanka tamakgkatsit, wi akxni nina akgchakgxkan» (Proverbios 16:18).