Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 60

Tamapakgsin nema nikxni katisputli

Tamapakgsin nema nikxni katisputli

Akgtum tsisni, mapakgsina Nabucodonosor lu tanu tuku limanixnalh. Kajwatiya xlakapastaka tuku limanixnalh asta nila klhtata. Katasanilh xtlawananin magia chu kawanilh: “Kakilawaniw tuku klimanixnalh”. Xlakan wanikgolh: “Kakilawaniw mintamanixni, mapakgsina”. Pero Nabucodonosor kawanilh: “¡Ni! Wixin kawantit tuku klimanixnalh. Komo ni nakilawaniyaw nakkamakgniyan”. Amakgtum waniparakgolh: “Pero kakilawaniw tuku limanixnanti chu alistalh nakkawaniyan tuku wamputun”. Xla kakgalhtilh: “Kaj kilaʼakgskgawiputunaw. ¡Kakilawaniw tuku kmanixnalh!”. Xlakan kgalhtikgolh: “Ni anan tiku tlan natlawa tuku wix lakaskina. Nila chuna tlawakan”.

Nabucodonosor lu xsitsinit, wa xlakata limapakgsinalh pi xkamakgnika putum xalakgskgalalan lakchixkuwin xalak país. Na xʼamaka kamakgnikan Daniel, Sadrac, Mesac chu Abednego. Pero Daniel skinilh kilhtamaku mapakgsina. Alistalh, xla chu xʼamigos tlawanikgolh oración Jehová xlakata xkamakgtayalh. ¿Tuku tlawalh Jehová?

Jehová maʼakxilhnilh Daniel xtamanixni Nabucodonosor chu wanilh tuku xkilhchani. Lichali, Daniel alh tachuwinan kskujni mapakgsina chu wanilh: “Ni kakamakgnitit tiku lakgskgalalan. Akit nakwani mapakgsina tuku kilhchani xtamanixni”. Skujni linilh Daniel Nabucodonosor. Daniel wanilh mapakgsina: “Dios waninitan tuku aku nala. Wa uma mintamanixni: akxilhti lanka imagen nema kgalhi xʼakgxakga xaʼoro, xkuxmun chu xmakxpanin xaplata, xpan chu xʼakglhtantun xacobre, xchaxpan o xchan xahierro chu xtantun xahierro nema tatlawakanit tiyat. Alistalh, akgtum chiwix taxtucha kʼakgtum sipi chu  tliwakga talalh xtantun uma imagen. Imagen talakgpakglhli chu pokgxni wa chu alistalh un lilh. Chiwix lanka sipi litaxtulh nema limatsamalh putum katiyatni”.

Alistalh, Daniel wa: “Tamanixni uma kilhchanima: mintamapakgsin wa xʼakgxakga xaʼoro. Tuku litatlawanit plata, wa tamapakgsin nema natawila akxni nasputa mila. Cobre kilhchanima akgtum tamapakgsin nema alistalh natawila chu namapakgsinan xlikalanka katiyatni. Tamapakgsin nema nastala lu tliwakga nawan la hierro. Xaʼawatiya, natawila akgtum tamapakgsin nema natapitsi, tliwakga nawan la hierro chu na nakgalhi niku ni lu tliwakga la tiyat. Chiwix nema litaxtu akgtum sipi, wa xTamapakgsin Dios nema nikxni katisputli chu nakamasputu putum uma tamapakgsin”.

Nabucodonosor tatsokgostalh kxlakatin Daniel, takilhputalh chu wa: “Wa miDios wanin tamanixni. Ni anan achatum Dios la xla”. Ni makgnilh Daniel, wata xapuxku tlawalh xliputum lakgskgalalan lakchixkuwin chu xmapakgsina akgtum aktsu kachikin xalak Babilonia limaxtulh. ¿Akxilhti la Jehová kgalhtilh xʼoración Daniel?

«Kamamakxtumika mapakgsinanin anta niku xahebreo litapakuwi Armagedón» (Revelación 16:16).