Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 59

Kgalhtati lakgkgawasan kgalhakgaxmatkgo Jehová

Kgalhtati lakgkgawasan kgalhakgaxmatkgo Jehová

Nabucodonosor kalilh príncipes xalak Judá kBabilonia chu lakgayawalh puxku Aspenaz xlakata xkakuentajtlawalh. Nachuna, limapakgsilh Aspenaz pi xkaputsalh lakgkgawasan tiku ni xatatatlanin chu lakgskgalalan xliputum príncipes. Umakgolh lakgkgawasan xʼamaka kamakgalhtawakgekan akgtutu kata xlakata wi tuku lu xlakaskinka xlitaxtukgolh kBabilonia. Xkatsinikgolh likgalhtawakgakgo, tsokgkgo chu xchuwinankgolh tachuwin acadio xalak Babilonia. Na xwakgolh liwat nema xwa mapakgsina. Umakgolh lakgkgawasan xkawanikan Daniel, Hananías, Misael chu Azarías. Pero Aspenaz kawilinilh tukuwani xalak Babilonia: Beltsasar, Sadrac, Mesac chu Abednego. ¿Lakpuwana pi tuku xkamasiyanika xtlawalh pi xtamakgatlinikgolh Jehová?

 Umakgolh lakgkgawasan xkgalhakgaxmatputunkgo Jehová. Xkatsikgo pi ni xliwatkan xliwat mapakgsina xlakata xLimapakgsin Jehová xwan pi nitlan xwakgolh makgapitsi liwat. Wa xlakata skinikgolh Aspenaz: “Katlawa litlan, ni xafuerza kakilamawiw uma liwat”. Pero Aspenaz kawanilh: “Komo ni liwana nawayanatit chu komo mapakgsina naʼakxilha kmilakankan pi tatatlayatit, nakimakgni”.

Daniel wi tuku lakpuwa. Wanilh tiku xkakuentajtlawa: “Katlawa litlan, kaj verduras, talhtsi chu chuchut kakilamawiw akgkaw kilhtamaku. Chu alistalh nakilatamalakxtumiyaw lakgkgawasan tiku nawakgo xliwat mapakgsina”. Tiku xkakuentajtlawa akxilhli pi tlan.

Akxni titaxtulh akgkaw kilhtamaku, Daniel chu kgalhtutu xʼamigos tlakg tlan xtasiyakgo nixawa amakgapitsi lakgkgawasan. Xmakgapaxuwakgonit Jehová xlakata xkgalhakgaxmatkgonit. Jehová na maxkilh liskgalala Daniel xlakata xkatsilh tuku xwamputun tuku xmaʼakxilhnika chu tamanixni.

Akxni sputli akgtutu kata la xkamakgalhtawakgemaka, Aspenaz kalilh lakgkgawasan xlakatin Nabucodonosor. Mapakgsina katachuwinalh chu akxilhli pi Daniel, Hananías, Misael chu Azarías tlakg lakgskgalalan xwankgonit nixawa amakgapitsi. Wa xlakata kalaksakli xlakata kskujkgolh kxtamapakgsin. Alistalh, mapakgsina makglhuwa kaskinilh tastakyaw xlakata tuku lu xlakaskinka. Jehová tlakg kamaxkilh liskgalala nixawa xalakgskgalalan lakchixkuwin chu xtlawananin magia nema xkgalhi mapakgsina.

Daniel, Hananías, Misael chu Azarías ni kxkachikin xwilakgo, pero putum kilhtamaku lakapastakkgolh pi xmakgtapakgsikgo kxkachikin Jehová. Akxni ni natatawilakgoyan minatlatni, ¿na putum kilhtamaku nalakapastaka Jehová?

«Nikxni wi tiku nalakgmakgan xlakata kgawasaku wix. Wata, akgtum tlan liʼakxilhtit kakalitaxtuni tiku ni makgxtakgnankgo xpalakata mintachuwin, mintayat, mintapaxkit, mintakanajla, chu xlakata nitu lixkajwana» (1 Timoteo 4:12).