Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Xtakgalhtin 10 takgalhskinin nema tlawakgo kamanan

 TAKGALHSKININ 7

¿Tuku naktlawa komo kimatlawiputunkan talakgxtumit?

¿Tuku naktlawa komo kimatlawiputunkan talakgxtumit?

¿TUKU XLAKATA XLAKASKINKA?

Tuku wix nalaksaka natlawaya la uku xlakata talakgxtumit alistalh nalakgpali milatamat.

¿TUKU XTLAWA WIX?

Kalilakpuwanti uma: Heather chu Mike kajku akgtiy papaʼ lalakgapasma; pero Heather makgkatsi xtachuna la komo makgasa lakgapasa. Tantaku lamalakgachani mensaje chu latachuwinan kteléfono, chu asta katsikgo tuku nawan achatum maski nina masputu xtachuwin. Pero la uku Mike nialh kaj chuwinamputun, wi atanu tuku tlawaputun.

Asta la uku, Mike chu Heather kajwatiya lamakgachipanit chu minit kilhtamaku latsuknit o lasputnit. Heather ni malakatsaliputun tuku natlawa, pero na ni makgatsankgaputun xlitatawilat. Ni anan atanu tiku tlakg lilakgatit chu tlakg stlan mamakgkatsini. Heather lakpuwan: «Mike chu akit klapaxkiyaw, ¿ni chuna?».

Komo tlantiya nakgalhiya militatawilat chu chuna xtitaxtu la Heather, ¿tuku xtlawa?

KALAKPUWANTI

Talakgxtumit akgtum tamaskiwin nema Dios kamaxki kajwatiya tiku tamakgaxtokgkgonit. Talakgxtumikan akxni nina tamakgaxtokgkan xtachuna la lakgmakgankan uma tamaskiwin. Xtachuna la komo wi tiku xmaxkin maktum lu stlan lhakgat chu wix xlimaklakaskinti xlakata nalikaxakaya.

Komo nalakatsalaya akgtum limapakgsin xla física, la komo ley de la gravedad, nitlan tuku katikitaxtunin. Nachuna nala komo nalakatsalaya limapakgsin xlakata la kililatamatkan, la tuku wan pi ni natlawayaw talakgxtumit xalimaxana, uma na kilhchanima talakgxtumit nema tlawakan akxni nina tamakgaxtokgkan (1 Tesalonicenses 4:3).

¿Tuku kitaxtu akxni ni kgalhakgaxmatkan uma limapakgsin? Biblia wan: «Tiku tlawa talakgxtumit nema ni xlitatlawat akstu tlawanikan talakgalhin» (1 Corintios 6:18TNM).

 Taputsan nema tlawakanit masiya pi lhuwa lakgkgawasan chu laktsuman tiku talakgxtumikgonita akxni nina xtamakgaxtokgkgo, wa uma makgapitsi tuku patikgo:

  • NITLAN LIMAKGKATSIKGO. Atsinu ni putum lakgkgawasan chu laktsuman tiku talakgxtumikgolh akxni nina xtamakgaxtokgkgo wankgo pi alistalh nitlan limakgkatsikgolh xlakata chuna xtlawakgonit.

  • NIALH LALIPAWANKAN. Akxni talakgxtumikgonita, makgapitsi kakgalhskinkan tiku atanu tatalakgxtuminit xlitatawilat.

  • LILIPUWANKGO. Lhuwa laktsuman lakaskinkgo chatum kgawasa tiku nakakuentajtlawa, chu ni chatum tiku kaj nakalikgamanan. Chu lhuwa lakgkgawasan nialh lakgatikgo laktsuman tiku lakapala tlawakgo tuku kawanikan.

  • Xaʼawatiya: komo natalakgxtupiya akxni nina tamakgaxtokga, nalakgmakgana tuku lu xtapalh: milikakni (Romanos 1:24). Mimakni lu xtapalh. ¡Ni paxkat katlawa!

Tliwakga kawanti chu ni katalakgxtupi akxni nina tamakgaxtokga (1 Tesalonicenses 4:3). Akxni natamakgaxtokga nakgalhiya talakgxtumit. Tlan nalipaxuwaya chu ni katimakpuwanti, ni katililakgaputsa, chu ni katilakpuwanti pi ni chuna militlawat xwanit; chuna makgkatsikgo tiku latatalakgxtumikgo akxni nina tamakgaxtokgkgo (Proverbios 7:22, 23; 1 Corintios 7:3).

 ¿TUKU LAKPUWANA?

  • Komo wi tiku paxkiyan, ¿ni xlikana pi nalakaskin tlan natawilaya kmimakni chu kmintalakapastakni?

  • Chu komo wi tiku xlikana lilakgaputsayan, ¿naskiniyan natlawaya tuku nalakxtlawa la talalipina Dios? (Hebreos 13:4).