Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Xtakgalhtin 10 takgalhskinin nema tlawakgo kamanan

 TAKGALHSKININ 8

¿Tuku kilikatsit xlakata akxni nakilikgamanamputunkan?

¿Tuku kilikatsit xlakata akxni nakilikgamanamputunkan?

¿TUKU XLAKATA XLAKASKINKA?

Akgatunu kata, millones latamanin, liwaka tiku laktsujku, kalikgamanamputunkan o kalikgamanankan. *

¿TUKU XTLAWA WIX?

Tiku likgamanalh Annette lakapala akgchipamilh chu Annette nila tuku tlawalh. Annette wan: «Ktlawalh putum tuku kmatlanilh, pixlanka xakchuwinamputun, pero nila xakchuwinan. Xakmapanuputun, klaktayalh, kkgaxilh chu klhkililh... asta akxni kililhtukulh cuchillo. Akxni ktakaksli nialhla tuku ktlawalh».

¿Tuku xtlawa wix komo chuna xtitaxtu?

KALAKPUWANTI

Maski lu natakuentajtlawaya, akgtum liʼakxilhtit, akxni nataxtuya katsisni, max naʼakgspulayan tuku nitlan. Biblia wan pi min kilhtamaku, tiku lu lakapala kgosnankgo ni tlajanankgo kcarrera chu tiku lakgskgalalan ni putum kilhtamaku tlan kakitaxtuni, «xlakata kilhtamaku chu tuku xalan lay putum kalakgchin» (Eclesiastés 9:11).

Annette ni xlakgapasa tiku likgamanalh. Pero lakgachunin, tiku likgamanankgo wa tiku kalakgapaskan o asta xfamilia litaxtukgo. Noelia kajku 10 kata xkgalhi akxni chatum kgawasa tiku xtalakatsu xwanit likgamanalh. Noelia wan: «Lu xakpekuanit chu lu xakmaxanan, wa xlakata xapulana niti klitachuwinalh».

 NI LIPINA KUENTA

Annette chuntiyaku limawakakan tuku lalh. Xla wan: «Makgatunu klakapastakpara tuku lalh ama tsisni, chu klakpuwan pi wi atanu tuku tlan xaktitlawalh xlakata naktamakgtaya. Xlikana pi nialhla tuku ktlawalh akxni kililhtukuka cuchillo, pero chuntiya klakpuwan pi xtalakaskin wi atanu tuku xaktitlawalh».

Noelia na makgkatsi pi lin kuenta. Xla wan: «Lu nitlan pi ni kuenta ktlawalh. Kinatlatnikan kajwatiya xkinkamaxkiyan talakaskin nakkgamananaw kkilhtin komo ni xaktamakgatlinilh kintala tsumat, pero ni kkakgaxmatnilh. Wa xlakata, klakpuwan pi nipara tuwa kilikgamanalh kintalakatsu. Kifamilia lu patinalh xlakata uma chu kmakgkatsi pi kinkuenta. Wa tuku tlakg kinkatsani».

Komo chuna makgkatsiya la Annette chu Noelia, kalakapastakti pi akxni wi tiku likgamanankan ni xtalakaskin tuku tlawanikan. Makgapitsi lakpuwankgo pi uma ni lu xlakaskinka akxni wankgo pi tiku likgamananka xakstu putsalh. Pero niti lakgchan natitaxtu uma tuku lu nitlan. Komo wix likgamanankanita, liwana kakatsi pi ni lipina kuenta.

Ni tuwa wankan, pero tuwa kanajlakan. Makgapitsi tiku kalikgamanankan ni wankgo tuku kaʼakgspula chu xakstukan lipatinankgo xlakata lakpuwankgo pi xkuentajkan tuku lalh o atanu tuku nitlan makgkatsikgo. Pero ¿tiku tlan kitaxtuni akxni nitu wankan? ¿Wix o tiku likgamanan? ¿Ni lakpuwana pi tlakg tlan naputsaya tamakgtay?

KALICHUWINANTI TUKU LALH

Biblia lichuwinan pi akxni lu xpatinama, chatum xaʼakgstitum chixku tiku xwanikan Job, wa: «¡Kkintalipuwan naklichuwinan kintalakgaputsit!» (Job 10:1). Max namakgtayayan komo chuna natlawaya. Nalitachuwinana tiku lipawana namakgtayayan namakgamakglhtinana tuku lalh chu tlakg tlan namakgkatsiya.

¿Tuku xlakata ni tachuwinana tiku tlan namakgtayayan? Tuku makinita kminaku max lu tsinka xlakata kaj miʼakstu nakukaya.

Annette chuna tlawalh, chu makgtayalh. Annette wan: «Ktachuwinalh chatum tlan amiga chu kimakgpuwantinilh nakkawani lakgkgolotsin xalak congregación. Klipaxuwa pi chuna ktlawalh. Makglhuwa akxtum kintatawilakgolh chu kiwanikgolh tuku xakkgaxmatputun: pi nipara tsinu kinkuenta tuku xlanit».

Noelia kawanilh xnatlatni tuku lalh. Xla wan: «Kimakgtayakgolh. Nachuna, kimakgpuwantinikgolh naklichuwinan tuku xlanit, chu uma kimakgtayalh ni lu naksitsi chu ni lu naklilipuwan».

Na lu tlan mamakgkatsinilh akxni xtlawa oración. Noelia wan: «Akxni xaktachuwinan Dios lu kimakgtayalh, liwaka akxni xakmakgkatsi pi lu nila wi tiku xaklitachuwinalh uma. Akxni ktlawa oración, tlan kwani Dios putum tuku kmakgkatsi, chu uma kimaxki takaksni».

Wix na naʼakxilha pi anan “kxkilhtamaku tapaksni” (Eclesiastés 3:3). Kakuentajtlawa mimakni chu mintalakapastakni, kajaxti chuna la talakaskin. Pero tuku tlakg xlakaskinka: kaputsa Jehová tiku tlan mamakgkatsininan (2 Corintios 1:3, 4).

 ¿TLANTIYA NAKGALHIYA MILITATAWILAT?

Komo militatawilat waniyan katlawa tuku xalimaxana, lakatitum kawani: «¡Ni chuna katlawa!» o «¡Ni kakixama!». Ni kalakpuwanti nitu nawana kaj xlakata ni makgatsankgaputuna. Komo namakgxtakgan, wamputun pi ni xlakaskinka xwanit. Wix lakgchanan tuku tlakg tlan: chatum tiku namaxkiyan kakni chu namaxki kakni tuku wix kanajlaya.

¿LIKGAMANAMPUTUNKANA?

«Akxni xakkgalhi 13 o 14 kata, lakgkgawasan klhtankkgo xtirante kibrasier kkinchakgen chu xkiwanikgo tuku lixkajni, la: “Naʼakxilha pi lu nalipaxuwaya akxni akit nakintatalakgxtupiya”» (Coretta).

¿Xwanti pi umakgolh lakgkgawasan...

  1. ... xtakgalhkgamanamakgo?

  2. ... xlimasiyakgo pi xlakgatikgo?

  3. ... xlikgamanamputunkgo?

«Kʼautobús, chatum kgawasa tsukulh lixkajnit tuku kiwani chu tsukulh kixama. Kmakalasli chu kwanilh pi xtapanulh. Kaks kiʼakxilhli xtachuna la komo akit xakʼakgwiti» (Candice).

¿Xwanti pi uma kgawasa...

  1. ... xkgalhkgamanama?

  2. ... xlimasiyanima pi xlakgati?

  3. ... xlikgamanamputun?

«Chatum kgawasa putuminika kata xkiwani pi xkilakgati chu xlakaskin xtaskin xakwa. Akit ankgalhin xakwani pi ni. Xmin kilhtamaku, kxama kimakxpan. Xakwani pi nialh chuna xtlawalh. Akgtum kilhtamaku, akxni xakchima kizapato, kintalasli» (Bethany).

¿Xwanti pi uma kgawasa...

  1. ... xkgalhkgamanama?

  2. ... xlimasiyanima pi xlakgati?

  3. ... xlikgamanamputun?

Xtakgalhtin kʼakgtutu takgalhskinin wa número 3.

¿Tuku xlakata ni watiya wamputun nalikgamanamputunkana chu nalimasiyanikana pi lakgatikana o kaj takgalhkgamanampaka?

Tiku likgamanamputunkan nitlan limakgkatsi chu asta mapatini. Uma taʼakglhuwit chuntiya anan maski tiku chuna tlawanimaka wanilha tiku chuna tlawama pi nialh kamaʼakglhuwilh.

Uma lu nitlan: max asta nalikgamanankan tiku chuna titaxtuma.

^ párr. 4 Maski tuku nalichuwinanaw tlakg kakilhchanima laktsuman, tastakyaw na kakilhchanima lakgkgawasan.