Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Xtakgalhtin 10 takgalhskinin nema tlawakgo kamanan

 TAKGALHSKININ 1

¿Tiku akit?

¿Tiku akit?

¿TUKU XLAKATA XLAKASKINKA?

Akxni katsiya tiku wix chu la mililatamat namakgtayayan nalaksaka natlawaya tuku tlan akxni matlawiputunkana tuku nitlan.

¿TUKU XTLAWA WIX?

Kalilakpuwanti uma tuku lama: Karen wi kʼakgtum paskua chu kajku akgkaw minutos titaxtunit akxni kgaxmata pi wi tiku xakgatlima kxchakgen:

«¿Tuku xlakata kaj yat?».

Karen talakgaspita chu akxilha xʼamiga Jessica, tiku chipanit patiy xaskgawiwi cerveza. Jessica malaknuni patum chu wani: «Wix lankata, tlan napaxuwaya tsinu, ¿ni xlikana?».

Karen ni makglhtiputun xlakata aktsujku, pero na ni lakaskin xʼamiga nalakpuwan pi ni xapaxuwana. Nachuna, Jessica tlan likatsi. Wa xlakata komo xla kgotma ni talakgalhin. Karen lakpuwan: «Kaj tsinu kgotma. Ni xtachuna wakan drogas».

Komo chuna xʼakgspulan la Karen, ¿tuku xtlawa?

KALAKPUWANTI

Xlakata nakatsiya tuku natlawaya komo chuna natitaxtuya talakaskin nakatsiya tiku wix. Nakatsiya tiku wix kilhchanima tuku waniyan tiku litaxtuya chu tuku tatayaya. Akxni liwana katsiya uma namakgtayayan napulalipina milatamat chu ni atanu tiku napulalinan (1 Corintios 9:26, 27).

¿Tuku tlan natlawaya xlakata namakgantaxtiya tuku wix lakaskina? Kakgalhti umakgolh takgalhskinin xlakata tlan nalimatsukiyaw.

 1 ¿TUKU KKATSINI KTLAWA?

Akxni nakatsiya tuku tlan tlawaya chu tayat nema kgalhiya namakgtayayan tlakg nalipawankana.

LIʼAKXILHTIT XALAK BIBLIA. Apóstol Pablo tsokgli: «Maski nila liwana kchuwinan, xlikana kkgalhi takatsin» (2 Corintios 11:6TNM). Xlakata lu xlakgapasa xtachuwin Dios, tayanilh akxni amakgapitsin talalakatawakakgolh. Ni mastalh talakaskin pi tuku nitlan xwankgo xtlawalh nialh xlakapastakli tuku tlan xtlawa (2 Corintios 10:10; 11:5).

MIʼAKSTU KAPUTSANANIKA: Katsokgti tuku tlan tlawaya chu tuku katsiniya tlawaya.

Katsokgti laktlan tayat nema kgalhiya (akgtum liʼakxilhtit, komo tlan likatsiya, xamaskiwina wix, tlan lipawankana o sokg chipina).

2 ¿TUKU TUWA KMAKGKATSI NAKTLAWA?

Xtachuna la akgtum cadena talakpucha komo akgtum tuku lilakgnu ni tliwakga wi, nachuna tiku wix litaxtuya lakapala natalakgpali komo tuku nitlan tlawaya napulalin milatamat.

LIʼAKXILHTIT XALAK BIBLIA. Pablo xkatsi tuku tuwa xmakgkatsi. Wa xlakata tsokgli: «Kkintapuwan klimakgapaxuwakan xlimapakgsin Dios; wampi kukxilha yuma atipatu ntu lakgapaxtokga ntu malanan kkinchatuminika, wa ntu ntalalakgapaxtokga xtalakaskin nkintapuwan, [...] xatachin nkiliyan kxlimapakgsin ntalakgalhin» (Romanos 7:22, 23).

MIʼAKSTU KAPUTSANANIKA: ¿Tukuya tayat nema ni lu tlan kgalhiya talakaskin nalakgpaliya?

 3 ¿TUKU KTLAWAPUTUN?

¿Xtawaka kʼakgtum taxi chu xwani tiku matlawanima pi antiya niku xtamakgspitnalh asta akxni ksputli xgasolina? ¡Xatonto xlitaxtu chu tapalaxla xkitaxtunin!

¿Tuku kinkamasiyaniyan? Komo lakkaxwiliya tuku natlawaya kmilatamat makgtayayan ni kaj akglakgwa nalatapaya. Nakatsiya niku pimputuna chu la nachipina.

LIʼAKXILHTIT XALAK BIBLIA. Pablo tsokgli: «Ni kaj akglakgwa kkgosnama» (1 Corintios 9:26TNM). Pablo ni mastalh talakaskin pi tuku xtitaxtu xmalaktlawilh tuku xtlawaputun, wata lakkaxwililh tuku natlawa chu maklakaskilh xlatamat xlakata namakgantaxti (Filipenses 3:12-14).

MIʼAKSTU KAPUTSANANIKA: Katsokgti pulaktutu tuku tlawaputuna uma kata.

4 ¿TUKU KKANAJLA?

Akxni liwana katsiya tiku wix, xtachuna la kgantum kiwi nema pulhman maknunit xtankgaxekg chu tayani maski tliwakga unisen.

Komo ni liwana katsiya tuku kanajlaya ni katikatsi tuku natlawaya. Chuna la tantum camaleón, natalakgpaliya o natlawaya tuku tlawakgo mincompañeros. Tiku chuna tlawa ni katsi tiku litaxtu.

Pero akxni tuku tlawaya kilhtiyaya tuku kanajlaya, chuntiya nakatsiya tiku wix maski amakgapitsin tanu tuku natlawakgo.

LIʼAKXILHTIT XALAK BIBLIA. Akxni kgawasaku xwanit, Daniel «lakkaxwililh kxnaku» nakgalhakgaxmata xlimapakgsin Dios maski ni akxtum xkatawi xfamilia (Daniel 1:8). Ni lakgmakgalh tiku xlitaxtu chu akgstitum lilatamalh tuku xkanajla.

MIʼAKSTU KAPUTSANANIKA: ¿Tuku kanajlaya? Akgtum liʼakxilhtit: ¿Kanajlaniya Dios? Komo chuna, ¿tuku xlakata? ¿Tuku tlawa nakanajlaya pi Dios lama?

¿Kanajlaya pi nalitamakgtayaya xlimapakgsin Dios xlakata la linkan latamat? Komo chuna, ¿tuku xlakata?

Kalilakpuwanti, ¿litaxtuputuna la pakgtum tuwan nema makgosu ni tliwakga un o kgantum kiwi nema tayani tliwakga unisen? Komo litaxtuputuna la kgantum kiwi, kamatliwakglhti tuku kanajlaya. Uma namakgtayayan tlan nakgalhtiya takgalhskinin: ¿Tiku akit?