Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Xtakgalhtin 10 takgalhskinin nema tlawakgo kamanan

 TAKGALHSKININ 4

¿La naklakkaxtlawa tuku nitlan ktlawa?

¿La naklakkaxtlawa tuku nitlan ktlawa?

¿TUKU XLAKATA XLAKASKINKA?

Komo litayaya tuku nitlan tlawaya, makgtayayan tlakg tlan nalikatsiya chu nalipawankana.

¿TUKU XTLAWA WIX?

Kalilakpuwanti uma: Tim katakgamanama xʼamigos, makgosu xpelota chu pakglha xvidrio xputlaw xtalakatsu.

Komo wix Tim xwanti, ¿tuku xtlawa?

KALAKPUWANTI

PULAKTUTU TUKU TLAN XTLAWA:

  1. Nakgosnana.

  2. Atanu tiku nalimawakaya.

  3. Nawaniya mintalakatsu tuku tlawa chu nawaniya pi naxokgoniya.

Max lakpuwana natlawaya opción 1. Pero tlakg tlan putum kilhtamaku nawanaw tuku nitlan tlawayaw kaxatukawa xwa.

 PULAKTUTU TUKU XLAKATA NALITAYAYA TUKU NITLAN NATLAWAYA

  1. Wa tuku xlitatlawat.

    Biblia wan: «Xaliʼankgalhin akgstitum tlan klatamaputunaw» (Hebreos 13:18).

  2. Latamanin tlakg katapatikgo tiku litayakgo tuku nitlan tlawakgo.

    Biblia wan: «Tiku matsekga xtalakgalhin nitlan kitaxtuniyacha, pero tiku wan chu nialh chuna tlawa nalakgalhamankan» (Proverbios 28:13).

  3. Tuku tlakg xlakaskinka, namakgapaxuwa Jehová.

    Biblia wan: «Jehová ni akxilhputun tiku katsini la akgskgawinan, pero lu tlan katalalin tiku xaʼakgstitum» (Proverbios 3:32).

Karina tiku kgalhi 20 kata, ni wanilh xtlat pi xmultarlikanit xlakata lu lakapala xmatlawanima xputlaw, pero nila matsekgli putum kilhtamaku. Karina wan: «¡Akxni xtitaxtunita max akgtum kata kintlat katsilh pi xakkgalhi akgtum multa chu kkgalhilh lhuwa taʼakglhuwit!».

¿Tuku katsinilh? Karina wan: «¡Akxni ni nawana tuku nitlan tlawanita tlakg nitlan kitaxtu. Nachan kilhtamaku akxni nalakgaxokgoya!».

WI TUKU KAKATSINIW AKXNI WI TUKU NITLAN TLAWAYAW

Biblia wan: «Kimputumkan makglhuwa akgchakgxaw» (Santiago 3:2TNM). Chuna la katsimaw, limasiyayaw pi lakapastaknanaw chu taktujuyaw akxni litayayaw tuku nitlan tlawayaw chu lakapala chuna tlawayaw.

Xlipulaktiy tuku tlan natlawayaw: wi tuku nakatsiniyaw. Chatum tsumat tiku wanikan Vera wan: «Akxni ktlawa tuku nitlan wi tuku kimasiyani nema kimakgtaya tlakg tlan naklikatsi chu atanu la naklakkaxtlawa komo chuna naktitaxtupala». Kaʼakxilhwi la tlan chuna natlawaya.

Makgsakwaya xbicicleta mintlat chu lakgalhiya. ¿Tuku xtlawa?

  • Nitu nawaniya mintlat chu nakgalhkgalhiya ni nakatsi.

  • Liwana nawaniya mintlat putum tuku lalh.

  • Nawaniya mintlat tuku lalh pero atanu tiku nalimawakaya.

Reprobarli examen xlakata ni kgalhtawakga. ¿Tuku xtlawa?

  • Nawana pi lu tuwa xwanit examen.

  • Nalitayaya pi minkuenta xlakata reprobarli.

  • Nawana pi wa mi makgalhtawakgena reprobarlin.

Chuntiya nalilakpuwana tuku tlawanita xtachuna akxni akxilha espejo retrovisor akxni matlawanipat putlaw.

 Chu kalilakpuwamparaw uma akgtiy liʼakxilhtit chu kalilakpuwanti pi wix 1) xatlat 2) makgalhtawakgena. ¿Tuku nalakpuwan mintlat chu mimakgalhtawakgena komo lakapala nalitayaya tuku nitlan tlawa? ¿Tuku nalakpuwankgo komo namatsekga tuku nitlan tlawa?

Kalilakpuwanti tuku nitlan tlawanita katata chu kakakgalhti umakgolh takgalhskinin.

¿Tuku nitlan tlawa?¿La lakkaxtlawa uma?

  • Kmatsekgputulh.

  • Atanu tiku klimawakalh.

  • Tunkun klitayalh.

Komo ni litaya tuku xtlawanita, ¿la makgkatsi alistalh?

  • ¡Lu tlan! Ktlawalh tuku xaklakaskin.

  • Lu nitlan. Xaktiwa tuku xaxlikana.

¿La tlakg tlan liwana xlakkaxtlawa uma?

¿Tuku masiyanin tuku nitlan tlawa?

¿TUKU LAKPUWANA?

¿Tuku xlakata makgapitsi latamanin ni litayakgo tuku nitlan tlawakgo?

¿Tuku nalakpuwanikgoyan latamanin komo putum kilhtamaku matsekgputuna tuku nitlan tlawaya? Pero ¿tuku nalakpuwankgo latamanin komo nalitayaya tuku nitlan tlawaya? (Lucas 16:10).