Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Xtakgalhtin 10 takgalhskinin nema tlawakgo kamanan

 TAKGALHSKININ 3

¿La tlan nakkatalalin kinatlatni?

¿La tlan nakkatalalin kinatlatni?

¿TUKU XLAKATA XLAKASKINKA?

Chuna la tlakg tlan nakatalalipina minatlatni, tlakg xatapaxuwan nawan milatamat.

¿TUKU XTLAWA WIX?

Kalilakpuwanti uma: la uku miércoles katsisni, Guillermo tiku kgalhi 17 kata, tlawakgolh xtaskujut chu xlijaxata. ¡Xlakata lhuwa skujnit! Mapasi televisión chu tawila ksillón nema tlakg lakgati.

Alistalh, xtlat talakaxtuyacha kmalakcha chu xla ni paxuwa.

«¡Guillermo! ¿Tuku xlakata kaj makgatsankgapat minkilhtamaku akxilhpat televisión? ¿Ni milimakgtayat aktsu mintala natlawa xtarea? ¡Nikxni tlawaya tuku limapakgsikana!».

Xlakata nakgaxmatnikan Guillermo pixlanka wan: «Tsukuparata».

Xtlat kaks lakglakan chu wani: «Kgawasa, ¿tuku wanti?».

Guillermo matsuwi xlakgastapu chu jalhpajni kgalhtinan: «Nitu tlat».

La uku lu sitsinit xtlat chu wani: «¡Tuku xlakata chuna kinkgalhtiya!».

Komo wix Guillermo xwanti, ¿tuku xtlawa xlakata ni xkilhnin mintlat?

KALAKPUWANTI

Nakatachuwinana minatlatni xtachuna la matlawanikan putlaw: komo natekgsa akgtum carretera nema tapatapunit, naputsaya atanu tiji.

 AKGTUM LIʼAKXILHTIT:

Chatum tsumat tiku wanikan Leah wan: «Lu tuwa kmakgkatsi ktachuwinan kintlat. Min kilhtamaku, akxni ktachuwinama kaj xalan kinkgalhskin: “¿Akit kintachuwinampat?”».

LEAH TLAN PULAKTUTU TUKU NATLAWA

  1. Pixlanka naxakgatli xtlat.

    Leah pixlanka nawani xtlat: «¡Kakgaxpatti! ¡Uma lu xlakaskinka!».

  2. Nialh nalichuwinan xtaʼakglhuwit.

    Leah nialh litachuwinan xtlat taʼakglhuwit nema kgalhi.

  3. Nakgalhkgalhi atanu kilhtamaku xlakata nalichuwinan xtaʼakglhuwit.

    Alistalh Leah tachuwinan xtlat, o tsokgni maktum carta niku nawani xtaʼakglhuwit.

¿Tuku lakpuwana pi tlan xtlawalh Leah?

KALILAKPUWANTI UMA: Xtlat Leah atanu tuku xlilakpuwama chu wa xlakata ni katsilh pi xlakgaputsama. Komo Leah nalaksaka opción 1 chu pixlanka natachuwinan, xtlat ni katiʼakgatekgsli tuku xlakata lakakilhnima. Uma opción max ni natlawa pi xtlat nakgaxmata tuku nawani chu nalimasiya pi ni maxki kakni xtlat (Efesios 6:2). Xlikana, uma opción nitiku kamakgtaya.

Chuna la wix ni mastaya talakaskin namachokgoyan akgtum carretera nema tapatapunit, wix tlan natekgsa apulaktu la tlan nakatalalipina minatlatni.

Opción 2, max wa nema tlakg ni tuwa tasiya, pero ni wa nema tlakg tlan. ¿Tuku xlakata? Xlakata Leah tlan nalakkaxtlawa xtaʼakglhuwit, talakaskin natachuwinan xtlat, komo lakaskin namakgtaya, natalakaskin pi xtlat nakatsi la wi xlatamat. Komo nialh nachuwinan ni katimakgtayalh.

Opción 3, Leah ni masta talakaskin pi uma taʼakglhuwit natlawa pi nialh natachuwinan xtlat. Wa xlakata laksaka atanu kilhtamaku xlakata natachuwinan. Chu komo nalaksaka natsokgnani maktum carta, Leah max tlakg tlan namakgkatsi.

Akxni natsokga maktum carta max namakgtaya liwana nawan tuku wamputun. Akxni xtlat nalikgalhtawakga carta, naʼakgatekgsa tuku lama. Opción 3 kamakgtaya Leah chu xtlat. Komo nalaksaka natachuwinan xtlat o komo natsokgnani, uma pulaktiy wa tuku wan Biblia pi xlitatlawat, naputsayaw “tuku nakinkamakgtayayan tlan nalatalalinaw” (Romanos 14:19TNM).

¿Tuku atanu tlan natlawa Leah?

Kalakpuwanti komo anan atanu tuku tlan natlawa chu katsokgti tutsu. Alistalh katsokgti tuku lakpuwana pi tlan xtlawalh.

 LIWANA KATAʼAKGATEKGSLI TUKU NAWANA

Kalakapastakti: tuku wix wana ni wa tuku minatlatni lakpuwanankgo pi wanti.

AKGTUM LIʼAKXILHTIT:

Minatlatni kgalhskinkgoyan tuku xlakata tasiya pi sitsipat. Wix kgalhtinana: «Ni klichuwinamputun uma».

Pero xlakan max nalakpuwankgo: «Nialh lu kkalipawan kinatlatni. Kaj kiʼamigos nakkawani kintaʼakglhuwit».

Kalilakpuwanti pi titaxtupat akgtum tuwa taʼakglhuwit chu minatlatni wanikgoyan pi makgtayaputunkgoyan, pero wix wana: «Ni kalilakgaputsatit. Tlan kiʼakstu naklakkaxtlawa».

  • ¿Tuku max naʼakgatekgskgo ninatlatni?

  • ¿La tlakg tlan xkgalhtinanti?