Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mifamilia tlan napaxuwa

 PULAKTUM

Kaputsatit Dios napaxuwayatit ktamakgaxtokgat

Kaputsatit Dios napaxuwayatit ktamakgaxtokgat

“Nti ntimalakatsukunalh kxkilhtsukut, chixku chu xawa mpuskat ntitlawakgolh.” (Mateo 19:4)

Jehová * Dios kamamakgaxtokgli xapulana puskat chu chixku. Biblia wan pi tlawalh xapulana puskat chu «liminilh chixku». Adán lu paxuwalh chu wa: «Uma lu xlikana kilukut chu kiliwa. Nawanikan Puskat, xlakata lakmaxtuka chixku» (Génesis 2:22, 23). Jehová chuntiya lakaskin pi tiku tamakgaxtokgkgonit kapaxuwakgolh.

Akxni wi tiku tamakgaxtokgkgo, max lakpuwankgo pi ni katiʼanalh taʼakglhuwit. Pero asta tiku lu lapaxkikgo na nakgalhikgo taʼakglhuwit (1 Corintios 7:28). Kʼuma folleto natekgsa xtastakyaw Biblia, chu komo namakgantaxtiya naʼanan tapaxuwan kmintamakgaxtokgat chu kmifamilia (Salmo 19:8-11).

 1 KATLAWA TUKU JEHOVÁ LAKGAYAWANITAN

TUKU WAN BIBLIA: Xachixku wa xakgxakga familia (Efesios 5:23).

Komo wix xachixku, Jehová lakaskin pi kakuentajtlawa chu kapaxki mimpuskat (1 Pedro 3:7). Tlawalh xlakata mintatakgatsin nawan, lakaskin pi tlan nalikatsiniya chu napaxkiya (Génesis 2:18). Lu napaxkiya, asta tuku xla lakaskin tlakg xlakaskinka nawan nixawa tuku lakaskina (Efesios 5:25-29).

Komo wix xapuskat, Jehová lakaskin pi lu namaxkiya kakni minchixku chu namakgtayaya tlan namakgantaxti tuku lakgayawakanit (1 Corintios 11:3; Efesios 5:33). Katataya tuku nalakkaxwili chu xatapaxuwan kamakgtaya (Colosenses 3:18). Komo chuna natlawaya lu tlan naʼakxilhan chu Jehová nachuna (1 Pedro 3:1-6).

TUKU TLAN XTLAWA:

  • Kakgalhskinti tiku tamakgaxtokga tuku tlan natlawaya xlakata tlakg tlan chixku o puskat nawana. Liwana kakgaxpatti tuku nawaniyan chu chuna katlawa

  • Kakgalhkgalhinanti. Natlawaya tuku lakgati tiku tamakgaxtokga lin kilhtamaku

2 LU XLAKASKINKA KAʼAKXILHTI TUKU MAKGKATSI TIKU TAMAKGAXTOKGA

TUKU WAN BIBLIA: Lu xlakaskinka kaʼakxilhti tuku lakaskin tiku tamakgaxtokga (Filipenses 2:3, 4). Tlan kalikatsini tiku tamakgaxtokga, kalakapastakti pi Jehová lakaskin xlakskujnin putum kilhtamaku tlan kalikatsikgolh (2 Timoteo 2:24). Liwana kalakpuwanti la nachuwinana, Biblia wan: «Akxni wankan ni lakwan tachuwin lhtukunan la kgantum espada, xtachuwin chatum tiku skgalala namapaksa» (Proverbios 12:18, La Biblia Latinoamérica, 2011). Xʼespíritu Jehová namakgtayayan naputsaya laktlan tachuwin (Gálatas 5:22, 23; Colosenses 4:6).

TUKU TLAN XTLAWA:

  • Kaskini Dios kamakgtayan ni nasitsiya chu ni nalakkaxwiliya la nakgalhtinana akxni nina litachuwinana tuku lu xlakaskinka tiku tamakgaxtokga

  • Liwana kalakpuwanti tuku nawana chu la nawana

 3 KALAKAPASTAKTI PI AKXTUM SKUJATIT

TUKU WAN BIBLIA: Tiku tamakgaxtokgkgo «watiya akgtum liwa nawankgoy» (Mateo 19:5). Pero chuntiyaku chatiy lataman litaxtukgo chu max ni lakxtum tuku nalakpuwankgo. Wa xlakata talakaskin pi nakatsiniyatit akxtum tuku nalakapastaknanatit chu namakgkatsiyatit (Filipenses 2:2). Lu xlakaskinka akxtum nalayatit akxni wi tuku nalaksakatit. ¿La tlawakan? Biblia wan: «Akxni lakgalhskinkan liwana tamakgantaxti tuku talakapastaknit natatlawa» (Proverbios 20:18). Xtastakyaw Biblia kakapulalin akxni akxtum nalaksakatit tuku lu xlakaskinka (Proverbios 8:32, 33).

TUKU TLAN XTLAWA:

  • Ni kaj katuwa kalitachuwinanti tiku tamakgaxtokga; kawani tuku makgkatsiya

  • Akxni wi tuku nalitayaya pi natlawaya pulana kalitachuwinanti tiku tamakgaxtokga

^ par. 4 Biblia wan pi xtukuwani Dios wa Jehová.