Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 TATAKGATSIN

Taway xla kiMalanakan: nema litamalanki Dios

Taway xla kiMalanakan: nema litamalanki Dios

KSTALANINANIN Cristo makgamakglhtinankgonit limapakgsin natamakxtumikgo xlakata Nalilakapastakkgo akxni tinilh Cristo, nema na wanikan «xTaway kiMalanakan» (1 Corintios 11:20TNM). ¿Tuku xlakata lu xlakaskinka natlawayaw uma? ¿Tuku kilhtamaku chu la xlitatlawat?

Jesucristo lakkaxwililh uma taway katsisni akxni judíos xtlawakgo Pascua, kata 33 akxni xminita Jesús. Pascua akgtum fiesta, nema kaj makgtum akgatunu kata xtlawakan, xtlawakan 14 xla nisán (papaʼ xla calendario judío). Chuna la takatsi, judíos max xlilhkakgo tuku kilhtamaku akxni nalakgchan Pascua chu  xtsukukgo putlekgenankgo akxni xchan kilhtamaku nema wanikan equinoccio xla primavera akxni kilhtamaku kgalhi akgkutiy hora chu katsisni na akgkutiy hora kgalhi. Papaʼ nema wanikan nisán, xtsuku akxni xapulana tlan xtaʼakxilha xaskgata papaʼ nema tlakg lakatsu xtaxtu akxni xtsuku equinoccio xla primavera. Chu xliʼakgkututu kilhtamaku xtsuku Pascua.

Ama katsisni, Jesús katatlawalh Pascua xʼapóstoles, chu akxni Jesús xwaninita Judas Iscariote kaʼalh, lakkaxwililh xlakata natatlawa uma Taway xla kiMalanakan. Uma taway tawilalh xlakgxokgo Pascua nema xtlawakgo judíos chu wa xlakata kaj makgtum xlitatlawat akgatunu kata.

Evangelio nema tsokgli Mateo wan tuku lalh: «Tiyalh nkaxtalanchu Jesús; tisikulanatlawalh; chu na lakgchakgalh; maxkikgolh xlimakgalhtawakgat; wanikgolh: “Katiyatit; kawatit; wa yuma nkintiyatliwa”. Akxni nchu tiyalh npukgotnu; mastalh mpaxkatsinit; na maxkikgolh; wanikgolh: “Kapukgotnantit milipakskan. Xampi wa yuma nkinkgalhni xla xasasti talakkaxlan, wantu xpalakatakan lhuwa nalistajtamakgan, lakimpi nalitamatsankgananiy xtalakgalhinkan” (Mateo 26:26-28).

Makgapitsi lakpuwankgo pi Jesús xlikana kaxtalanchu tlawalh xtiyatliwa, chu vino kxkgalhni tlawalh. Pero akxni Jesús kamaxkilh kaxtalanchu nitu xtsankgani xtiyatliwa. ¿Tlan nawanaw pi apóstoles xlikana wakgolh xliwa Jesús chu likgotnankgolh xkgalhni? Nila chuna nawanaw, xlakata komo chuna xtlawakgolh, xlitaxtulh la chatum tiku wa xtalataman chu uma nitlan, xlakata lakatsala xlimapakgsin Dios (Hechos 15: 29; Levítico 17:10). Anta kLucas 22:20, Jesús wa: «Wa yuma ntu tajuma npukgotnu, wa yuma xasasti talakkaxlan wantu lilakkaxlay kinkgalhni, wantu wixin mimpalakatakan nalistajtamakgan». ¿Lu xaxlikana ama pokgotnu o copa «xasasti talakkaxlan wa»? Nila chuna nawanaw, xlakata uma akgtum talakkaxlan chu nila akxilhkan.

Wa xlakata, kaxtalanchu chu vino kaj liʼakxilhtit. Kaxtalanchu kilhchani xtiyatliwa Cristo nema ni kgalhi talakgalhin. Jesús limaklakaskilh kaxtalanchu nema xʼakgataxtunit ktaway xla Pascua, nema ni xkgalhi levadura o limaxkutin (Éxodo 12:8). Min kilhtamaku Biblia tamalakxtumi levadura talakgalhin o tuku  nitlan. Tlan nawanaw, pi kaxtalanchu xkilhchanima xtiyatliwa Jesús nema makamastalh nema ni xkgalhi tuku nitlan. Uma xtiyatliwa ni xkgalhi talakgalhin (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vino tinto, na watiya wamputun vino xaspinini, xkilhchanima xkgalhni Jesús, nema tlawa pi kakgalhilh xtapalh uma xasasti talakkaxlan. Jesús tiwa pi xʼama makgan xkgalhni «xlakata nakinkatapatikanan kintalakgalhinkan». Xlakata tastajtamakgalh uma kgalhni, Jehová kaʼakxilha makgapitsi latamanin la ni xataxkajwani chu makgtanukgo kxasasti talakkaxlan nema tatlawakgo Jehová (Hebreos 9:14; 10:16, 17). Uma talakkaxlan tlawa pi 144,000 kstalaninanin Cristo nema ni makgatsankgananikgo naʼankgo kʼakgapun. Anta, mapakgsinanin chu sacerdotes nawankgo xlakata nakamakgtayakgo putum latamanin (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Tiku tlan wakgo kaxtalanchu chu tlan likgotnankgo vino nema limaklakaskinkan akxni lakapastakkan akxni tinilh Cristo? Chuna la akxilhnitawa, kaj tlan wakgo chu likgotnankgo uma, tiku makgtanukgo kxasasti talakkaxlan, uma wamputun tiku kalaksakkanit xlakata naʼankgo kʼakgapun. Xʼespíritu santo Dios kamakgtaya xlakata nakatsikgo pi wa kalaksakkanit xlakata mapakgsinanin nawankgo kʼakgapun (Romanos 8:16). Uma latamanin na makgtanukgonit ktalakkaxlan xlakata natamapakgsinankgo Jesús (Lucas 22:29).

Pero ¿tuku tlawakgo tiku nalatamakgo kxakalipaxuw Katiyatni chu nikxni nanikgo? Chuna la Jesús wa, ankgo tamakxtumikgo akxni tatlawa Taway xla kiMalanakan chu kaks tawilakgo, maski ni wakgo kaxtalanchu chu vino nema limaklakaskinkan. Xtatayananin Jehová kaj makgtum akgatunu kata tlawakgo uma Taway xla kiMalanakan, akxni tsankganita Chichini nema litsuku 14 xla nisán. Maski xlikalanka Katiyatni ni lhuwa wilakgolh tiku wankgo pi naʼankgo kʼakgapun, uma taway lu xlakaskinka akxilhkgo putum kstalaninanin Cristo. Akgtum kilhtamaku nema lilakapastakkgo la xlilhuwa kinkapaxkiyan Jehová Dios chu Jesucristo (Juan 3:16).