Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 16

Katataya xaxlikana takanajla

Katataya xaxlikana takanajla
  • ¿Tuku masiya Biblia xlakata imágenes?

  • ¿La akxilhkgo kstalaninanin Cristo fiestas nema tlawakgokan xlakata takanajla?

  • ¿La liwana nakawaniya amakgapitsin tuku kanajlaya?

1, 2. ¿Tukuya takgalhskinin natlawanikana akxni makgxtakgnitata nixaxlikana takanajla, chu tuku xlakata lakpuwana pi lu xlakaskinka?

KALAKPUWANTI pi katsiya pi wi tiku tsekg makanima veneno niku xkgata. Putum chuchut nialh tlan chu milatamat kalipekua wi. ¿Tuku natlawaya? Max xlikana naputsaya alakatanu, niku chuchut ni kgalhi veneno. Pero maski natekgsa chuchut nema ni kgalhi veneno, nakgalhtinana uma lu xlakaskinka takgalhskinin: «¿Pi kawa nakimakgatatatla uma chuchut?».

2 Na chuna kinkaʼakgspulayan xlakata nixaxlikana takanajla. Biblia kinkamasiyaniyan pi talakgalhinit xtamasiy chu tuku tlawakgo xalixkajni (2 Corintios 6:17). Wa xlakata xlakaskinka nataxtuniyaw «nTlanka [...] Babilonia», tamapakgsin xlikalanka kakilhtamaku xla nixaxlikana takanajla (Apocalipsis 18:2, 4). ¿Taxtunitata wix? Lu tlan komo taxtunitata. Pero ni kajwatiya talakaskin namakgxtakga o namalakgachaya tatsokgni niku nawana pi nialh tapakgsiputuna kʼama takanajla. Na natlawanikana uma takgalhskinin:  «¿Kkgalhijku kkilatamat tuku xla nixaxlikana takanajla?». Kaʼakxilhwi makgapitsi.

IMÁGENES CHU TAKAKNIN XLAKATA FAMILIA TIKU NIKGONITA

3. 1) Kawanti tuku wan Biblia xlakata imágenes chu tuku xlakata makgapitsi lu tuwa makgkatsikgo naʼakxilhkgo imágenes chuna la kaʼakxilha Dios. 2) Komo wi tuku kgalhiya xla nixaxlikana takanajla, ¿tuku militlawat?

3 Wilakgolh latamanin tiku makgasa kgalhikgo kxchikkan imágenes o nema wanikgo pusanto. ¿Wix na kgalhiya? Komo kgalhiya, max akxni natlawaniya oración Dios chu nitu nalimaklakaskina lu tanu namakgkatsiya o nitlan naʼakxilha. Max asta lu lhuwa kapaxkiya tuku kgalhiya. Pero wa Dios tiku wan la lakaskin nakakninaniyaw, chu Biblia kinkamasiyaniyan pi Dios ni lakaskin nalimaklakaskinaw imágenes (kalikgalhtawakga Éxodo 20:4, 5; Salmo 115:4-8; Isaías 42:8; 1 Juan 5:21). Xlakata tlan natatayaya xaxlikana takanajla  talakaskin namasputuya putum tuku kgalhiya xla nixaxlikana takanajla. Kakaʼakxilhti chuna la kaʼakxilha Jehová: «tuku xalixkajni» (Deuteronomio 27:15).

4. 1) ¿Tuku xlakata nitu litaxtu nakakninaniyaw kifamiliajkan tiku nikgonita? 2) ¿Tuku xlakata Jehová kawanilh israelitas ni tsinu namakgtanukgo tuku xla skuwana?

4 Atanu tuku na tlawakgo lhuwa nixaxlikana takanajla wa pi kakninanikgo xfamilia tiku nikgonita. Akxni nina xkatsikgo tuku xlikana masiya Biblia, makgapitsi latamanin xlakpuwankgo pi tiku nikgonita xʼankgo latamakgo anta niku nila kaʼakxilhkan chu tlan kamakgtayakgo o tlan katlawanikgo tuku nitlan tiku lamakgolhku. Max wix lhuwa tuku xtlawaya xlakata ni xsitsikgolh mifamilia tiku nikgonita. Pero la katsi kcapítulo 6 xla uma libro, tiku nikgonita ni ankgo latamakgo alakatanu. Wa xlakata nitu litaxtu nakatachuwinamputunaw tiku nikgonita. Putum tamakatsin nema tawan pi wa lichuwinalh chatum tiku lu xpaxkiyaw chu ninita wa demonios chuna tlawakgo. Wa xlakata, Jehová kawanilh kachikin Israel pi ni nakatachuwinamputunkgo tiku nikgonita chu ni xlitsakgsakgolh tuku xla skuwana (kalikgalhtawakga Deuteronomio 18:10-12).

5. ¿Tuku militlawat komo la uku limaklakaskina imágenes o kakninaniya mifamilia tiku nikgonita?

5 ¿Tuku militlawat komo takanajla nema wix kgalhiya la uku limaklakaskin imágenes o kakninani familia tiku nikgonita? Liwana kalikgalhtawakga textos xalak Biblia nema masiyakgo tuku lakapastaka Dios xlakata uma talismanin. Chali chali katlawani oración Jehová, kawani pi tatayaputuna xaxlikana takanajla chu kaskini kamakgtayan xlakata nalakapastaka la lakapastaka (Isaías 55:9).

 XAPULANA KSTALANINANIN CRISTO NI XTLAWAKGO TALAKGATANKUWIT

6, 7. 1) Kawanti tuku mat xlilakapastakkgo akxni xtlawakan Talakgatankuwit chu komo xtlawakgo kstalaninanin Cristo kxapulana siglo. 2) Akxni xlamakgolh xapulana kstalaninanin Cristo, akxni latamanin xtlawakgo fiesta xlakata xmakgatsikgo xkatakan, ¿tuku na xtalakapastaka ama kilhtamaku?

6 Kintakakninkan tlan nalakglakgalhi nixaxlikana takanajla komo natlawayaw makgapitsi fiesta nema lhuwa latamanin tlawakgo. Kawiliw uma, Talakgatankuwit. Tawan pi uma fiesta lilakapastakkan akxni lakachilh Jesucristo, chu atsinu ni putum takanajla tiku wankgo pi stalanikgo Jesús chuna tlawakgo. Pero nitu anan tuku limasiya pi kstalaninanin Jesús xla xapulana siglo chuna xtlawakgo. Maktum libro Los orígenes sagrados de las cosas profundas wan: «Ama akgtiy ciento kata nema titaxtulh akxni xlakachinita Cristo niti xkatsi, chu ni lhuwa tiku xkuentajtlawakgo xlakata tukuya kilhtamaku xlakachinit Jesús».

7 Maski kstalaninanin Jesús xkatsikgolh tukuya kilhtamaku lakachilh Jesús, ni xtlawanikgolh fiesta akxni xmakgatsilh xkata. ¿Tuku xlakata? Xlakata xapulana kstalaninanin Jesús «xakxilhkgoy uma fiestas [...] la tuku xmakgxtakgkgonit xalamakgasa nixaxlikana takanajla» (Las cosas nuestras de cada día). Kajwatiya akgtiy lichuwinan Biblia xlakata tiku makgatsikgolh xkatakan, wa xla chatiy mapakgsinanin nema ni xkakninanikgo Jehová (Génesis 40:20; Marcos 6:21). Uma fiestas na xtlawakan xlakata nakamalankikan nixaxlikana dioses. Romanos xtlawakgo fiesta 24 xla mayo xlakata ama kilhtamaku xlakachin diosa Diana chu lichali Apolo, dios xla Chichini. Chuna likatsiyaw pi makgatsikan kata ni xtlawakgo tiku kstalaninanin  Cristo, wata xtlawakgo xlakata nakakninanikgo nixaxlikana dioses.

8. Kawanti la anan talismanin xla magia akxni tlawakan fiesta xlakata makgatsikan kata.

8 Kstalaninanin Cristo xla xapulana siglo wi atanu tuku xlakata ni xtlawakgo fiesta akxni lakachilh Jesús: max xkatsikgo pi akxni latamanin xtlawakgo fiesta akxni makgatsikan kata, xtalakapastaka talismanin xla magia. Lhuwa griegos chu li romanos xalamakgasa, xlakpuwankgo pi chatunu latamanin xkgalhi chatum espíritu nema xkamakgtaya chu anta xwi akxni xlakachinkgo chu xkakuentajtlawa xliputum xlatamat. «Uma espíritu xtalalin Dios nema xmakgatsi xkata, kilhtamaku akxni xmakgatsi kata lataman.» (The Lore of Birthdays [Talismanin xlakata makgatsikan kata].) Jehová nikxni xlakgatilh akgtum fiesta niku nalilakapastakkgo Jesús talismanin xla magia (Isaías 65:11, 12). Xlakata tuku akxilhwi, ¿tuku xlakata lhuwa latamanin tlawakgo Talakgatankuwit?

XLAKATSUKUT TALAKGATANKUWIT

9. ¿Tuku xlakata laksakka 25 xla diciembre xlakata natalakapastaka akxni lakachilh Jesús?

9 Akxni xtitaxtunita akglhuwa ciento kata akxni Jesús xminit kKatiyatni, laksakka 25 xla diciembre xlakata nalilakapastakkgo akxni lakachilh. Pero Jesús ni lakachilh diciembre, * xla max lakachilh octubre. Pero ¿tuku xlakata laksakka uma kilhtamaku? Max xlakata makgapitsi tiku xwankgo pi kstalaninanin Cristo «xlilakgpaliputunkgo amakgapitsi fiestas nema ni xla kstalaninanin Cristo. [...] Anta kRoma tiku ni xkanajlanikgo Jesús xlimaxtukgo 25 xla diciembre xlakata nalitlawakgo  fiesta [...] akxni xlakachin “Chichini tiku nila tlajakan”» (Enciclopedia de la Religión Católica). Akxni lhuwa lonkgnan, Chichini ni tliwakga xmakgskgo, tiku xalak nixaxlikana takanajla xtlawakgo fiesta xlakata Chichini xtaspitli niku makgat xʼanit chu xkamaskiwilh makgskgot chu lhkakna. Xtalakpuwan pi 25 xla diciembre Chichini xtsuku taspita. Xlakata tiku ni xkakninanikgo Cristo xkakninanikgolh, tiku xpulalinkgo takanajla tiyakgolh uma fiesta chu xtlawaputunkgo xlakata xtaʼakxilhli la xla «kstalaninanin Cristo». *

10. ¿Tuku xlakata makgapitsi latamanin xalamakgasa ni xtlawakgo Talakgatankuwit?

10 Makgasa takatsi pi Talakgatankuwit lakatsukulh knixaxlikana takanajla. Xlakata ni kBiblia takilhtinit, ni xmastakan talakaskin pi uma fiesta xtlawaka kʼInglaterra chu kmakgapitsi kachikinin xalak Estados Unidos, ksiglo XVII. Tiku ni xʼan skuja chu xtamakgxtakga kxchik xlakata natlawa Talakgatankuwit xlimaxokgekan tumin. Pero titaxtulh kilhtamaku tsukuparakgolh tlawakgo uma xamakgan talismanin, chu tamaknukgolh amakgapitsin talismanin. Tsukuparakgolh tlawakgo Talakgatankuwit, asta la uku klhuwa kachikinin litlawakan fiesta. Pero latamanin tiku makgapaxuwaputunkgo Dios liwana katsikgo pi Talakgatankuwit takilhtinit knixaxlikana takanajla, wa xlakata ni tlawakgo, na ni tlawakgo atanu fiestas nema lakatsukucha knixaxlikana takanajla. *

 ¿TALAKASKIN NAKATSIYAW LA LAKATSUKUKGOLH UMAKGOLH FIESTAS?

11. Kawanti tuku xlakata makgapitsi latamanin tlawakgo fiestas pero tuku tlakg xlakaskinka kiliʼakxilhatkan akinin.

11 Makgapitsi latamanin katsikgo pi wilakgolh fiestas la Talakgatankuwit nema lakatsukunit knixaxlikana takanajla, pero lakapastakkgo pi nitu wamputun maski natlawakgo. Lakpuwankgo pi la uku nialhti katsi pi lakatsukukgolh knixaxlikana takanajla, chu nachuna ama kilhtamaku familias akxtum tawilakgo. ¿Nachuna lakapastaka? Komo chuna lakapastaka, max xlakata paxkiya mifamilia tlawama pi nila natatayaya xaxlikana takanajla chu ni wa takanajla nixaxlikana paxkiya. Liwana kakatsi pi Jehová tiku tlawalh familia, lakaskin pi wix tlan kakatalalipi mimparientes (Efesios 3:14, 15). Pero wi atanu la natlawaya xlakata tlan nakatalalipina mifamilia chu na namakgapaxuwaya Dios. Apóstol Pablo lichuwinalh tuku tlakg xlakaskinka kiliʼakxilhatkan: «Katakgatankstit wa ntu lakgatiy nkimPuchinakan» (Efesios 5:10).

¿Ksakti akgtum dulce nema ma niku kalixkajni chu xwat?

12. ¿Tuku tlan liʼakxilhtit limasiya pi xlakaskinka katapanuniw talismanin chu fiestas nema lakatsukunit kxakalixkajni?

12 Max nalakapastaka pi la uku ni watiya litlawakgo fiesta nema xlitlawakgo makgasa. ¿Xlikana nitu wamputun la kilhtsukulh? Ni. Kalakpuwanti pi naʼakxilha akgtum dulce niku kalixkajni. ¿Ksakti chu  xwat? Xlikana pi ni; xlakata xalixkajni. Chuna la ama dulce, wilakgolh fiestas nema tasiya pi laktlan, pero kilhtsukukgolh anta niku kxakalixkajni. Komo tatayaputunaw xaxlikana takanajla, kililakapastakatkan chuna la xlakapastaka palakachuwina Isaías. Latamanin tiku xlikana kskujnanikgo Dios, xla kawanilh: «[¡]Ni kaxamatit tuku lixkajni!» (Isaías 52:11).

LIWANA KAKAWANI AMAKGAPITSIN TUKU KANAJLAYA

13. ¿Tuku taʼakglhuwit max nakgalhiya xlakata ni makgtlawaya makgapitsi fiestas?

13 Max nakgalhiya taʼakglhuwit akxni namakgxtakgputuna makgapitsi fiestas. Kawiliw akgtum liʼakxilhtit, ¿tuku natlawaya komo tiku kataskuja ni katsikgo tuku xlakata wix ni makgtlawaya makgapitsi fiestas? ¿Chu komo wi tiku namaxkiyan akgtum tamaskiwin xla Talakgatankuwit? ¿Tlan kawa namakglhtinana? ¿Tuku xtlawa komo minchixku o mimpuskat ni kanajla tuku wix kanajlaya? ¿Tuku tlan natlawaya xlakata minkamanan ni nalakapastakkgo pi wi tuku makgatsankgamakgolh akxni ni tlawakgo makgapitsi fiestas?

14, 15. ¿Tuku tlan natlawaya komo wi tiku nawaniyan pi tlan kakitaxtunin kfiesta o wi tuku maskiwiputunan?

14 Talakaskin liwana nalakapastaka tuku natlawaya akxni nakgalhiya uma taʼakglhuwit. Kawiliw akgtum liʼakxilhtit, max wi tiku xwanin pi tlan kakitaxtunin kʼakgtum fiesta, wix max tlan nawaniya: «paxtikatsinilh». Pero komo nawaniyan chatum tiku xlenkgalhin akxilha, max tiku taskuja, xlakaskinka liwana nawaniya tuku xlakata wix nichuna tlawaya. Liwana kalakapastakti tuku nawaniya. Biblia kinkawaniyan: «Mintachuwinkan putum kilhtamaku tlan katakgaxmatli, xtachuna kawa la akxni limakgamikanit  matsat, xlakata nakatsiyatit la milikgalhtitkan chatunu chatunu» (Colosenses 4:6TNM). Kakawani tuku lakapastaka, pero liwana kalakapastakti tuku nawana xlakata niti namakgasitsiya. Liwana kakawani pi wix tlan akxilha pi wi tuku lamaskiwikan chu tlan akxtum natawilakan, pero tlakg tlan akxilha natlawaya atanu kilhtamaku.

15 Pero ¿komo wi tiku maxkiputunan akgtum tamaskiwin? Xlakata tlan nakgalhtinanaw uma takgalhskinin, pulana kiliʼakxilhatkan tiku kinkamaxkiman chu tuku lakpuwan akxni kinkamaxkiman. Max nawaniyan: «Akit kkatsi pi ni tlawaya uma fiesta, pero kmaskiwiputunan uma». Max wix nalakpuwana pi komo namakglhtinana uma tamaskiwin ni wamputun pi na makgtlawapat ama fiesta. Pero komo chatum lataman ni lakgapasa mintakanajla, wix tlan nawaniya pi ni tlawaya ama fiestas. Wa uma nalikatsi tuku xlakata makglhtinana uma tamaskiwin pero ni maxkiya atanu. Pero wi tiku max wi tuku namaskiwiputunan kaj xlakata nalimasiyaputun pi wix nixlikana tlawaya tuku kanajlaya o kaj xlakata tuku maxkikana makgxtakga tuku kanajlaya. Ama kilhtamaku nitlan namakglhtinana.

LA NAKAWANIYAW KIFAMILIAJKAN

16. ¿La nakuentajtlawaya xlakata tuku nawana chu natlawaya akxni makgapitsi tlawakgo fiestas?

16 ¿Tuku na natlawaya komo mifamilia ni kanajlakgo tuku wix kanajlaya? Nachuna liwana nalakapastaka tuku nakawaniya. Ni xlakaskinka nalitaʼakglhuwiyatit xlakata talismanin nema amakgapitsin tlawaputunkgo o xlakata akgatunu fiesta nema tlawaputunkgo. Ni nawana tuku nitlan xlakata tuku lakapastakkgo,  chuna la wix ni lakaskina pi nitlan nalichuwinankan tuku lakapastaka (kalikgalhtawakga Mateo 7:12). Pero ni katlawa tuku nalimasiya pi na makgtayanampat kʼama fiesta. Liwana naʼakxilha tuku natlawaya xlakata alistalh ni nawankan pi na xmakgtlawapat. Xlakaskinka pi tuku natlawaya ni namaxkajwani mintalakapastakni (kalikgalhtawakga 1 Timoteo 1:18, 19).

17. ¿Tuku tlan natlawaya xlakata minkamanan ni nalakpuwankgo pi makgatsankgamakgolh tuku tlan akxni akxilhkgo pi amakgapitsin tlawakgo makgapitsi fiestas?

17 ¿Tuku tlan natlawaya xlakata minkamanan ni nalakpuwankgo pi makgatsankgamakgolh tuku tlan akxni ni tlawakgo makgapitsi fiestas nema Biblia ni lichuwinan? Wa xlakata tuku nakatatlawaya xliʼakgtuminika kata. Wilakgolh natlatni tiku putsakgo kilhtamaku xlakata wi tuku nakamaskiwikgo xkamanan. Akgtum tlakg xatlan tamaskiwin wa nalimaxtuya kilhtamaku akxtum nakatatawilaya chu nakapaxkiya.

KALILATAPA XAXLIKANA TAKANAJLA

Komo nalilatapaya xaxlikana takanajla, xalipaxuw nalatapaya

18. ¿La namakgtayayan tamakxtumit xlakata natatayaya xaxlikana takanajla?

18 Xlakata namakgapaxuwaya Dios, xlakaskinka namakgxtakga nixaxlikana takanajla chu natatayaya xaxlikana takanajla. ¿La tlan chuna natlawaya? Biblia kinkawaniyan: «Kimputumkan kalilakpuwaw amakgapitsin xlakata la nalalimasiyaniyaw tapaxkit chu natlawayaw tuku tlan, ni namakgxtakgaw kintamakxtumitkan, chuna la lismanikgonit amakgapitsin, wata kalamakgpuwantiniw kinchatunukan chu tlakg chuna katlawaw xlakata akxilhmaw pi talakatsuwima kilhtamaku» (Hebreos 10:24, 25TNM). Ktamakxtumit xla kstalaninanin Cristo kalipaxuw chu anta tlan kakninaniyaw  Dios la xla lakaskin (Salmo 22:22; 122:1). Kʼama tamakxtumit «makxtum nalamakgpuwantiniyaw» chatunu kstalaninanin Cristo (Romanos 1:12).

19. ¿Tuku xlakata xlakaskinka nakawaniya amakgapitsin tuku katsinipat xlakata Biblia?

19 Atanu tuku nalimasiyaya pi tatayaya xaxlikana takanajla wa nalichuwinana tuku katsinipat xlakata kalitakgalhtawakgapat Biblia xtatayananin Jehová. Lhuwa latamanin litakiklhmakgolh chu patinamakgolh xlakata anan lhuwa tuku nitlan unu kkakilhtamaku. Max wix kalakgapasa tiku chuna limakgkatsikgo. ¿Tuku xlakata ni kalitachuwinana tuku lichuwinan Biblia xlakata tuku aku namin? Kalichuwinanti tuku xatlan katsinita kBiblia chu kakatatamakxtupi xaxlikana kstalaninanin Cristo. Komo chuna natlawaya, naʼakxilha pi tsinu tsinu nialh natlawaputuna talismanin xla nixaxlikana takanajla. Liwana kakatsi: komo natatayaya xaxlikana takanajla, xalipaxuw natawilaya chu lhuwa tasikulunalin namakglhtinana (Malaquías 3:10).

^ párr. 9 Kaʼakxilhti tatakgatsin: «¿Diciembre lakachilh Jesús?».

^ párr. 9 Takaknin xla saturno na limaklakaskinkgolh xlakata nalilaksakkgo 25 xla diciembre. Uma fiestas xtlawakgo xlakata nakakninanikgo dios romano xla tachananat nema xtatlawa 17 asta 24 xla diciembre. Ama kilhtamaku xtlawakan liwat, lu xpaxuwakgo chu xlamaxki tamaskiwin.

^ párr. 10 Xlakata tlakg nakatsiya la akxilhkgo xaxlikana kstalaninanin Jesús amakgapitsi fiestas nema lhuwa latamanin tlawakgo, kaʼakxilhti tatakgatsin: «¿Kilitlawatkan fiestas nema tlawakgokan?».