Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 8

¿Tuku xTamapakgsin Dios?

¿Tuku xTamapakgsin Dios?
  • ¿Tuku kinkawaniyan Biblia xlakata xTamapakgsin Dios?

  • ¿Tuku natlawa ama Tamapakgsin?

  • ¿Tukuya kilhtamaku uma Tamapakgsin natlawa katatlawalh xtalakaskin Dios unu kKatiyatni?

1. ¿Tukuya oración naʼakxilhaw nema lhuwa latamanin lakgapaskgo?

LHUWA millón latamanin xlikalanka Katiyatni lakgapaskgo oración nema lhuwa wanikgo, padrenuestro. Akgtum oración nema Jesucristo wililh xaliʼakxilhtit chu lu xlakaskinka tuku wamputun. Kaʼakxilhwi pulaktutu tuku anta taskin, chu chuna tlakg liwana nakatsiya tuku masiya Biblia.

2. Kawanti pulaktutu tuku Jesús kamasiyanilh kstalaninanin xlakata naskinkgo akxni xtlawakgolh xʼoracionkan.

2 Akxni tsuku uma oración, Jesús kawanilh tiku xkgaxmatnimakgolh: «Wixin chuna militlawatkan oración: “KinTlatikan tiku wilapi kʼakgapun, katamasantujlilh mintukuwani. Kamilh minTamapakgsin. Katatlawalh mintalakaskin, chuna la kʼakgapun, nachuna kkatiyatni”» (Mateo 6:9-13TNM). ¿Tuku wamputun uma akgtutu tuku taskin kʼuma oración?

3. ¿Tuku lu xlakaskinka kilikatsitkan xlakata xTamapakgsin Dios?

3 Lhuwa tuku katsinitawa xlakata xtukuwani Dios,  Jehová. Nachuna lichuwinanitawa xlakata xtalakaskin Dios, tuku xla tlawanit chu tuku aku natlawa xlakata latamanin. Pero ¿tuku xwamputun Jesús akxni skilh «Kamilh minTamapakgsin»? ¿Tuku xTamapakgsin Dios? ¿La nasantujtlawa xtukuwani Dios akxni namin uma Tamapakgsin? Xlakata namin xTamapakgsin Dios, ¿la namakgantaxti xtalakaskin?

¿TUKU XTAMAPAKGSIN DIOS?

4. ¿Tuku xTamapakgsin Dios, chu tiku xMapakgsina nawan?

4 Wa xTamapakgsin Dios akgtum tamapakgsin nema wilinit Jehová. Chu xla laksaknit tiku namapakgsinan kxtamapakgsin. ¿Tiku uma Mapakgsina? Jesucristo. Xla tlakg xalanka ni la amakgapitsi mapakgsinanin; wa xlakata wankan pi xla «xpuxkukan laktlanka napuxkun; chu xReykan laktlanka reyes» (Apocalipsis 17:14). Jesús kgalhi litliwakga xlakata lhuwa tuku tlan natlawa, ni la atanu mapakgsina xalak kakilhtamaku, chu asta tlakg tlan tlawa tuku tlan nixawa tlakg xatlan mapakgsina xala unu kKatiyatni.

5. ¿Niku wilacha xTamapakgsin Dios chu tuku namapakgsi?

5 ¿Niku natawilayacha xTamapakgsin Dios? ¿Niku wi Jesús? Chuna la katsinitawa, akxni nina lhuwa kilhtamaku xtitaxtunit akxni kxtokgowakakgonita chu makgnika kkgantum kiwi chu akxni xlakastakwananita, Jesús ampa kʼakgapun (Hechos 2:33). Wa xlakata anta wilacha xTamapakgsin Dios: kʼakgapun. Wa xlakata Biblia limapakuwi «kxTamapakgsin kʼakgapun» (2 Timoteo 4:18). Pero maski kʼakgapun wi, namapakgsinan unu kKatiyatni (kalikgalhtawakga Apocalipsis 11:15).

6, 7. ¿Tuku xlakata Jesús chatum Mapakgsina tiku niti xtachuna?

6 Jesús Mapakgsina tiku niti xtachuna. ¿Tuku xlakata  chuna wanaw? Tlan chuna wanaw xlakata xla nikxni katinilh. Mapakgsinanin xalak kakilhtamaku nila malakgchanikgo xlakata Biblia wan pi xla «ni kgalhi xlisputni xlatamat» (Hebreos 7:16). Wa xlakata putum tuku xatlan natlawa, putum kilhtamaku natawila. Chu xlikana natlawa lhuwa tuku xatlan.

7 Kaʼakxilhti tuku xwanita Biblia xlakata Jesús: «Nakgalhi xʼEspíritu Jehová, xʼespíritu liskgalala chu xʼespíritu taʼakgatekgsni, xʼespíritu tastakyaw chu litliwakga, xʼespíritu takatsin chu nakgalhini Jehová tapekua, chu nalipaxuwa xlakata kgalhini tapekua Jehová. Ni katiputsananinalh kaj xlakata tuku akxilha, chu ni katistakyawanalh kaj xlakata tuku kgaxmatnit. Xalakatitum nakaputsanani tiku lakglimaxkgan, chu xaʼakgstitum nakamakgtaya tiku tlan likatsikgo unu kkatiyatni» (Isaías 11:2-4). Uma tachuwin masiya pi Jesús xalakatitum namapakgsinan chu xalakgalhamana nawan. ¿Ni xkgalhiputu chatum mapakgsina la uma?

8. ¿Tiku natamapakgsinankgo Jesús?

8 Kaʼakxilhwi atanu tuku na naʼanan kxTamapakgsin Dios: Jesús ni xakstu katimapakgsinalh, na natamapakgsinankgo atanu mapakgsinanin. Kaʼakxilhwi tuku wanilh apóstol Pablo Timoteo: «Wa lapi paxuwanaliyanaw ntapatin, na natamapakgsinanaw» (2 Timoteo 2:12). Chuna xla, Pablo, Timoteo chu amakgapitsi latamanin nema Dios kalaksaknit natamapakgsinankgo Jesús kTamapakgsin xalak akgapun. ¿Niku kgalhlit nakamaxkikan talakaskin natamapakgsinankgo Jesús?

9. ¿La kgalhlit latamanin natamapakgsinankgo Jesús, chu tukuya kilhtamaku tsukulh kalaksakka Dios?

9 Chuna la akxilhwi kcapítulo 7 xla uma libro, apóstol Juan akxilhli «nkalhnilu [Jesucristo] xya kxokgspun  nkgastin wa ntu wanikan Sión [anta kxpumapakgsin kʼakgapun], na anta xtawilakgo akgtum ciento atipuxumatati mil chixkuwin, wa cha nti xkgalhikgo xtukuwini, chu xtukuwini xTlat ntu xtatsokgnit kxmunkan». ¿Tiku uma 144,000? Juan kinkawaniyan: «Wa yuma wa nti stalanikgo nkalhnilu nkani kawa ntani an. Wa yuma wanti ntilakgmaxtukgoka kxlakgstipankan ntachixkuwitat xtachuna ntu xakgasiya nti lilaksakkgoka natapakgsinikgoy Dios, chu na wa xla kalhniluj nawan» (Apocalipsis 14:1, 4). Xlikana, xlakan kstalaninanin Jesús tiku ni makgxtakgkgo wa tiku kalaksakkanit xlakata natamapakgsinankgo kʼakgapun. Akxni nikgo lakastakwanankgo xlakata nalatamakgo kʼakgapun, “anta natamapakgsinankgo Jesús kKatiyatni” (Apocalipsis 5:10). Kilhtamaku akxni xwilakgolhku apóstoles, Dios tsukulh kalaksakka kstalaninanin Cristo tiku ni makgxtakgnankgo xlakata nakamakgatsi 144,000.

10. ¿Tuku xlakata tasiya pi Jehová xapaxkina xlakata laksakli Jesús chu na kalaksakli 144,000 xlakata nakamapakgsikgo latamanin?

10 Jehová litasiya pi xapaxkina akxni laksakli Jesús chu 144,000 nema nakamapakgsikgo latamanin. Laksakli Jesús chu Jesús latamalh la chatum lataman wa xlakata katsi la patinan chatum lataman. Pablo lichuwinalh xlakata Jesús: «Ni kgalhiyaw xapuxku sacerdote tiku ni naʼakgatekgsa kintaxlajwanitkan, pero akinin kgalhiyaw tiku na liʼakxilhka chuna la akinin, pero xla ni xkgalhi talakgalhin» (Hebreos 4:15; 5:8TNM). Tiku natamapakgsinankgo na tayanikgonit takatsanajwat nema kgalhikgo latamanin. Chu katsikgo la xlituwa ni natlawayaw tuku nitlan chu na patikgonit tajatat. Xlikana naʼakgatekgskgo xtaʼakglhuwitkan latamanin.

 ¿TUKU NATLAWA XTAMAPAKGSIN DIOS?

11. ¿Tuku xlakata Jesús kawanilh kstalaninanin pi xliskinitkan Dios xlakata xtatlawalh xtalakaskin kʼakgapun?

11 Jesús ni kaj kalimapakgsilh kstalaninanin natlawakgo oración xlakata namin xTamapakgsin Dios, na kawanilh pi xliskinatkan xlakata xtatlawalh xtalakaskin Jehová «chuna la kʼakgapun, nachuna kkatiyatni». Anta kʼakgapun niku wi Dios, ángeles tiku ni makgxtakgkgo, xlenkgalhin tlawakgo xtalakaskin Dios. Pero kcapítulo 3 xla uma libro katsiw pi chatum ángel tiku lixkajni likatsi nialh tlawalh xtalakaskin Dios chu tlawalh pi Adán chu Eva kalakgalhinankgolh. Kcapítulo 10 tlakg nakatsiyaw tuku masiya Biblia xlakata uma ángel wanikan Satanás. Dios mastalh talakaskin katamakgxtakgkgolh kʼakgapun ni makgas kilhtamaku Satanás chu espíritus tiku laksakkgolh nastalanikgo, nema kawanikan demonios. Wa xlakata akxni xlama Jesús unu kKatiyatni, ni putum tiku xwilakgolh kʼakgapun xtlawamakgolh xtalakaskin Dios. Pero uma xʼama talakgpali akxni Jesucristo xʼama tsuku mapakgsinan kxTamapakgsin Dios chu xtalachipalh Satanás (kalikgalhtawakga Apocalipsis 12:7-9).

12. ¿Tuku pulaktiy lu xlakaskinka lichuwinan Apocalipsis 12:10?

12 Umakgolh tachuwin nema xwankanit, kinkawanikgoyan tuku xʼama la: «Kkgaxmatli akgtum pixlanka tachuwin kʼakgapun nema xwan: “¡La uku kalimininit lakgtaxtut latamanin chu tasiyalh xlitliwakga chu xTamapakgsin kiDioskan tawilalh chu litliwakga nema maxkika Jesucristo maklakaskimaja, xlakata lhkgen tamakaktaka tiku nitlan kalichuwinan kinatalankan xla chuna tlawa tantaku chu tantaskaka kxlakatin kiDioskan!”» (Apocalipsis 12:10TNM). ¿Akxilhti pi kʼuma versículo pulaktiy tuku lu xlakaskinka lichuwinan? Xapulana, tsuku mapakgsinan xTamapakgsin Dios nema pulalin  Jesucristo. Xlipulaktiy, Satanás maxtuka kʼakgapun chu makaminka kKatiyatni.

13. ¿Tuku kitaxtulh xlakata Satanás tamakxtuka kʼakgapun?

13 Chuna la naʼakxilhaw alistalh, uma pulaktiy kgantaxtukgonita. ¿Tuku kitaxtulh xlakata uma tuku lalh? Kalikgalhtawakgaw kBiblia tuku lalh kʼakgapun: «Wa yuma nkalipaxuwatit wix akgapun, chu xlipaks nti anta wilatit» (Apocalipsis 12:12). Chuna xla, ángeles tiku ni makgatsankgananikgo Dios, lipaxuwakgo xlakata Satanás chu xdemonios katamakxtuka kʼakgapun, la uku putum tiku anta wilakgolh ni makgatsankgananikgo Jehová Dios, chu anan takaksni chu tlan latalalin. Wa xlakata la uku kʼakgapun tatlawamaja xtalakaskin Dios.

Akxni tamakxtuka Satanás chu xdemonios kʼakgapun limilh taʼakglhuwit kKatiyatni. Pero nialh makgas uma nasputa

14. ¿Tuku kitaxtulh xlakata Satanás makaminka kKatiyatni?

14 ¿Tuku tlan nawanaw xlakata Katiyatni? Biblia kinkawaniyan: «Kgoxotanin wa nti lamakgo nkatuxawat, chu wa nti lama ktakgayawana, xampi wa akgskgawini, kalakgminitan, na lhuwa lanka tasitsin nkgalhiy, xpalakata mpi katsiy mpi kaj tsinu kilhtamaku nkgalhiy» (Apocalipsis 12:12). Satanás lu sitsinit xlakata tamakxtuka kʼakgapun chu nialh lhuwa kilhtamaku kgalhi. Xlakata lu sitsinit, tlawa pi kaʼanalh taʼakglhuwit unu kKatiyatni. Kcapítulo 9 tlakg nakatsiyaw xlakata umakgolh taʼakglhuwit. Pero xlakata tuku akxilhnitawa, taxtu akgtum takgalhskinin: ¿la natlawa uma Tamapakgsin xlakata nakgantaxtu xtalakaskin Dios unu kKatiyatni?

15. ¿Tuku xtalakaskin Dios xlakata Katiyatni?

15 Kalakapastakti tuku xtalakaskin Dios xlakata Katiyatni. Chuna la katsi kcapítulo 3, Jehová masiyalh kJardín xaʼEdén pi lakaskin xlikalanka Katiyatni xakalipaxuw kawa chu kalitatsamalh xalaktankswa latamanin chu nikxni nanikgo. Akxni Satanás tlawalh pi  Adán chu Eva kalakgalhinankgolh, tlawalh pi xtalakaskin Dios xlakata Katiyatni katalakgsakgalilh, pero xtalakaskin Dios ni talakgpalilh. Jehová tlawaputunku pi kakgantaxtulh uma tachuwin: «Tiku xaʼakgstitum xlakan nawan katiyatni, chu putum kilhtamaku nalatamakgo anta» (Salmo 37:29). Chu xTamapakgsin Dios natlawa uma. ¿La chuna natlawa?

16, 17. ¿Tuku kinkawaniyan Daniel 2:44 xlakata xTamapakgsin Dios?

16 Anta kDaniel 2:44 wi uma tuku xwankanit nala: «Kxkilhtamaku ama mapakgsinanin wa Dios xalak akgapun nawili akgtum tamapakgsin nema nikxni katimalakgsputuka. Chu ama tamapakgsin ni katimatitaxtinika atanu kachikin. Nakalakxpula chu nakamasputu putum umakgolh tamapakgsin chu ama tamapakgsin xliputum kilhtamaku natawila». ¿Tuku kinkawaniyan xlakata xTamapakgsin Dios uma tuku xwankanit pi nakgantaxtu?

17 Pulana, kinkawaniyan pi ama tamapakgsin natawila «kxkilhtamaku ama mapakgsinanin», uma wamputun akxni wilakgolhku makgapitsi mapakgsinanin. Xlipulaktiy wan pi xTamapakgsin Dios nikxni katisputli. Ni anan atanu tamapakgsin nema natlaja chu natawila xlakgxokgo. Xlipulaktutu, kinkawaniyan pi naʼanan akgtum guerra chu nalachipakgo xTamapakgsin Dios chu mapakgsinanin xalak kakilhtamaku pero xTamapakgsin Dios natlajanan. Alistalh, kaj akgtum tamapakgsin nakgalhikgo latamanin chu uma tlakg xatlan tamapakgsin nila atanu nema tawilakgonit.

18. ¿La wanikan guerra nema nakatatlawa xTamapakgsin Dios mapakgsinanin xalak kakilhtamaku?

18 Biblia lhuwa tuku kinkawaniyan xlakata ama guerra nema natatlawa xTamapakgsin Dios tamapakgsin xalak kakilhtamaku. Kinkawaniyan pi akxni natalakatsuwi  lisputni, nixatlan espíritus namalakgatumikgo taʼakgsanin xlakata nakaʼakgskgawikgo «reyes lantla xlikatlanka nkatuxawat». ¿Tuku xlakata chuna natlawakgo? «Lakimpi makxtum natlawakgo natalatlawanankgoy akxni ntlanka kilhtamaku xliminat Dios nti paks kgalhi xlitliwakga.» Ama mapakgsinanin nakamamakxtumikan «lakatum ntani wanikan hebreo Armagedón» (Apocalipsis 16:14, 16). Xlakata tuku wan uma versículos, ama guerra nema natatlawa mapakgsinanin chu xTamapakgsin Dios wanikan Armagedón.

19, 20. ¿Tuku tlawa pi ni katatlawalh la uku xtalakaskin Dios unu kKatiyatni?

19 ¿Tuku namakgantaxti xTamapakgsin Dios xlakata nalimin guerra xla Armagedón? Kalakapastakparaw xlakata xtalakaskin Jehová xlakata Katiyatni: xla lakaskin pi xakalipaxuw kawa chu kalitatsamalh latamanin tiku xalakatitum chu kaskujnikgolh. ¿Tuku tlawa pi xtalakaskin Dios ni katatlawalh la uku? Xapulana, akinin makglakgalhinanin, wa xlakata tatatlayaw chu niyaw. Pero, kcapítulo 5 katsiw pi Jesús nilh kimpalakatakan xlakata tlan xliputum kilhtamaku xlatamaw. Max lakapastaka uma tachuwin xla Evangelio xla Juan: «Xampi luwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliʼankgalhin» (Juan 3:16).

20 Atanu taʼakglhuwit wa pi anan lhuwa latamanin tiku nitlan likatsikgo. Akgsaninankgo, akgskgawinankgo chu kgalhikgo xalimaxana xlatamatkan. Ni tlawaputunkgo xtalakaskin Dios. Pero tiku tlawakgo tuku nitlan nakamasputukan kʼArmagedón, xguerra Dios (kalikgalhtawakga Salmo 37:10). Atanu tuku xlakata ni tatlawama xtalakaskin Dios unu kKatiyatni wa xlakata  mapakgsinanin ni makgpuwantinikgo latamanin katlawakgolh xtalakaskin Dios. Lhuwa mapakgsinanin ni lhuwa litliwakga kgalhikgo, ni lakgalhamanankgo o xaʼakgsaninanin. Biblia liwana kinkawaniyan: «Chixku akgchipanit chixku xlakata natlawani tuku nitlan» (Eclesiastés 8:9).

21. ¿La natlawa Tamapakgsin xlakata natatlawa xtalakaskin Dios unu kKatiyatni?

21 Pero akxni nakgalhsputa Armagedón, putum latamanin kaj akgtum tamapakgsin nakgalhikgo, xTamapakgsin Dios. Ama Tamapakgsin namakgantaxti xtalakaskin Dios chu nalimin lu xalaktlan tasikulunalin. Namasputu Satanás chu xdemonios (Apocalipsis 20:1-3). Na natlawa pi katamakgantaxtilh xtapalh xtamakamastan Jesucristo, chu xlakata uma latamanin tiku ni makgatsankgananikgo Dios nialh katitatatlakgolh chu nialh katinikgolh wata tlan putum kilhtamaku nalatamakgo (kalikgalhtawakga Apocalipsis 22:1-3). Nachuna, natlawa pi kakilhtamaku xakalipaxuw nawan. Chuna, Tamapakgsin natlawa pi katatlawalh xtalakaskin Dios unu kKatiyatni chu katasantujtlawalh xtukuwani. ¿Tuku wamputun uma? Pi xlakata Tamapakgsin, putum latamanin nalakgachixkuwilikgo chu namalankikgo xtukuwani Jehová.

¿TUKUYA KILHTAMAKU CHUNA NATLAWA XTAMAPAKGSIN DIOS?

22. ¿La katsiyaw pi xTamapakgsin Dios ni milh akxni Jesús xwi kKatiyatni chu na ni milh akxni xmalakastakwanikanita?

22 Akxni Jesús kawanilh kstalaninanin pi kaskinikgolh Dios «kamilh minTamapakgsin», liwana katsiyaw pi ama kilhtamaku Tamapakgsin nina xminit. ¿Milh akxni Jesús taspitpa kʼakgapun? Na ni milh, xlakata Pedro chu Pablo wankgolh pi akxni Jesús lakastakwanalh,  makgantaxtilh tuku xlichuwinankanit kSalmo 110:1: «Jehová wanilh kiMalana: “Katawila kkimpakgastakat asta akxni nakkawili mintalamakgasitsin la xlaktay mintantun”» (Hechos 2:32-35; Hebreos 10:12, 13). Chuna, Jesucristo xʼama kgalhi asta akxni xchalh kilhtamaku.

Tamapakgsin natlawa pi katatlawalh xtalakaskin Dios kKatiyatni chuna la kʼakgapun

23. 1) ¿Tukuya kilhtamaku tsukulh mapakgsinan xTamapakgsin Dios? 2) ¿Tuku naʼakxilhaw kcapítulo 9?

23 ¿La xlimakgas xʼama kgalhi? Ksiglo XIX, ni lhuwa xlikgalhtawakgananin Biblia laklhkawilikgolh pi ama kilhtamaku nema xkgalhima xʼama kgalhsputa kkata 1914. (Komo tlakg katsiputuna xlakata uma kilhtamaku, kaʼakxilhti tatakgatsin, «1914: kata lu xlakaskinka nema xlichuwinanit Biblia».) Kkata 1914 asta uku putum tuku lanita kkakilhtamaku kinkamasiyaniyan pi tuku laklhkawilikgolh uma xlikgalhtawakgananin Biblia xlikana. Chuna la kgantaxtuma tuku xlichuwinanit Biblia pi nala limasiya pi kata 1914 Jehová Mapakgsina tlawalh Cristo chu xTamapakgsin Dios xalak akgapun tsukulh mapakgsinan. Wa xlakata, la uku lamaw ama «tsinu kilhtamaku nkgalhiy» Satanás (Apocalipsis 12:12; Salmo 110:2). Nachuna tlan wanaw pi Tamapakgsin  nialh makgas natlawa pi unu kKatiyatni katatlawalh xtalakaskin Dios. ¿Ni lakpuwana wix pi akgtum tlan tamakatsin? ¿Lakpuwana pi xlikana nawan? Kcapítulo 9 naʼakxilhaw tuku masiya Biblia xlakata uma.