Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 10

¿Tuku kilikatsitkan xlakata espíritus?

¿Tuku kilikatsitkan xlakata espíritus?
  • ¿Kamakgtayakgo ángeles latamanin?

  • ¿La kamakgtanu kxlatamatkan makgapitsi latamanin nixatlan espíritus?

  • ¿Xlilat nakapekuaniyaw nixatlan espíritus?

1. ¿Tuku xlakata tlakg kililakgapasatkan ángeles?

AKXNI wi tiku lakgapasaw, lakgachunin na wi tuku katsiyaw xlakata xfamilia. Nachuna, tiku lakgapasa Jehová Dios na talakaskin nalakgapasa xfamilia xalak akgapun. Ángeles xfamilia Dios, xlakata Biblia kawani «xkaman Dios» (Job 38:7). Pero ¿la kalimaklakaskin ángeles Jehová xlakata nalimakgantaxti xtalakaskin? ¿Wi tuku tlawakgonit ángeles putum uma kilhtamaku nema latamakgonit latamanin? ¿Kinkamakgtayakgoyan ángeles? Chu komo kinkamakgtayakgoyan, ¿la tlawakgo?

2. ¿Tiku kamalakatsukilh ángeles, chu la kgalhlit anankgo?

2 Anta kBiblia akglhuwa ciento lichuwinan xlakata ángeles. Kaʼakxilhwi tuku wan Biblia xlakata ángeles, chu chuna tlakg tlan nakalakgapasaw. ¿Tiku kamalakatsukilh ángeles? Colosenses 1:16 kinkawaniyan: «Xampi wa xpalakata [Jesucristo], litamalakatsukulh xlipaks ntu anan nkʼakgapun, chu ntu anan kkatiyatna». Uma likatsiyaw pi putum espíritus nema kawanikan ángeles, Jehová Dios kamalakatsukilh chu akxni katlawalh kalimalakatsukilh xapuxku xKgawasa. ¿La kgalhlit ángeles anan? Biblia kinkawaniyan pi “anan lhuwa ciento millones ángeles”  chu putum lakgtliwakga (Apocalipsis 5:11; Salmo 103:20).

3. ¿Tuku kinkamasiyaniyan Job 38:4-7 xlakata ángeles?

3 Wa xTachuwin Dios, Biblia, kinkawaniyan pi akxni Jehová tlawalh Katiyatni, «putum xkaman Dios pixlanka malankikgolh» (Job 38:4-7). Uma textos xalak Biblia kinkamasiyaniyan pi ángeles xlamakgolha akxni nina xmalakatsukikan chixku, xlakata xlakan xlamakgolha akxni nina xtlawakan Katiyatni. Nachuna kinkamasiyaniyan pi ángeles lakpuwankgo chu na makgkatsikgo, xlakata Biblia wan pi «akxtum xatapaxuwan tsukukgo wankgo». Kaʼakxilhti pi «putum xkaman Dios» «akxtum» paxuwakgolh. Tlan nawanaw pi ama kilhtamaku, putum ángeles kaj akgtum familia xwankgonit chu kskujnanikgo Jehová.

ÁNGELES KUENTAJTLAWANANKGO

4. ¿La limasiya Biblia pi ángeles tiku ni makgxtakgkgo Dios kuentajtlawakgo la kakitaxtunima latamanin?

4 Lata akxni ángeles tiku ni makgxtakgkgo Dios akxilhkgolh la kamalakatsukika xapulana kinatlatnikan asta la uku, kapaxkikgo latamanin chu na kuentajtlawakgo la kgantaxtuma xtalakaskin Dios (Proverbios 8:30, 31; 1 Pedro 1:11, 12). Chuna la titaxtutilhama kilhtamaku, ángeles akxilhkgonit la lhuwa latamanin laksakkgonit nialh naskujnanikgo xapaxkina xMalakatsukinakan. Xlikana uma kamakgalipuwan ángeles tiku ni makgxtakgkgo Dios. Pero akxni maski kaj chatum tiku taspitni Jehová, «anan tapaxuwan kxlakatin xʼángeles Dios» (Lucas 15:10). La akxilhnitawa, uma ángeles lakaskinkgo pi tlan kakakitaxtunilh xlakskujnin Dios. Wa xlakata Jehová makglhuwa kalimaklakaskilh xlakata nakalimatliwakglha chu nakalimakgtaya xlakskujnin  tiku ni xmakgxtakgkgo unu kKatiyatni (kalikgalhtawakga Hebreos 1:7, 14). Kaʼakxilhwi makgapitsi liʼakxilhtit.

«Wa kiDios malakgachalh xʼángel chu kamalakchuwanilh xkilhni leones.» (Daniel 6:22)

5. ¿Tukuya liʼakxilhtit wi kBiblia niku lichuwinan latamanin tiku kamakgtayalh ángeles?

5 Akxni Dios kamalakgsputulh kachikin Sodoma chu Gomorra xlakata latamanin nitlan xlikatsikgo, Lot chu xlaktsuman lakgtaxtukgolh xlakata chatiy ángeles kamaxtukgolh (Génesis 19:15, 16). Titaxtulh akglhuwa kata, palakachuwina Daniel mujuka anta niku xwilakgolh leones, pero nitu tlawanikgolh. Daniel chuna wa: «Wa kiDios malakgachalh xʼángel chu kamalakchuwanilh xkilhni leones» (Daniel 6:22). Kxapulana siglo akxni xminita Jesús, chatum ángel maxtulh kpulachin apóstol Pedro (Hechos 12:6-11). Nachuna Jesús makgamakglhtinalh xtamakgtay ángeles akxni xmatsukima xtaskujut unu kKatiyatni (Marcos 1:13). Chu akxni atsinu xtsankga kilhtamaku xlakata namakgnikan, tasiyanilh chatum ángel chu matliwakglhli (Lucas 22:43). ¡Lu lhuwa matliwakglhli Jesús uma tamakgtay nema maxkilh ángel akxni lu tuwa xkitaxtunima!

6. 1) ¿La makgtayakgo la uku ángeles xkachikin Dios? 2) ¿Tukuya takgalhskinin nakakgalhtiyaw?

6 La uku nila kaʼakxilhaw uma espíritus, xlakata nialh katasiyanikgo xlakskujnin Jehová xalak Katiyatni. Maski nila kaʼakxilhaw, uma lakgtliwakga ángeles kamakgtayakgo xkachikin Dios, pero tuku tlakg kuentajtlawakgo wa pi nitu nalaktlawa la talalinaw Dios. Biblia kinkawaniyan: «Xʼángel Jehová kakuentajtlawama putum tiku pekuanikgo, chu kalakgmaxtu» (Salmo 34:7). ¿Tuku xlakata kinkamatliwakglhan uma tachuwin? Xlakata anan laklipekua nixatlan espíritus nema kinkamasputuputunkgoyan. ¿Tiku umakgolh espíritus? ¿Niku taxtukgocha? ¿La kinkatlawaniputunkgoyan tuku nitlan? Xlakata tlan  nakatsiyaw, kaʼakxilhwi tuku lalh akxni lakatsukukgolh latamanin.

ESPÍRITUS NEMA NI KINKAʼAKXILHPUTUNKGOYAN

7. ¿La xlilhuwa latamanin tlawalh Satanás pi nialh xkgalhakgaxmatkgolh Dios?

7 La katsiw kcapítulo 3, chatum ángel lakpuwa pi tlan xkamapakgsilh latamanin, chu chuna lakatakilh Dios. Alistalh lilakgapaska Satanás chu Akgskgawini (Apocalipsis 12:9). Akxni xʼakgskgawinita Eva, akgtum mil  akgchaxan ciento kata nema alistalh titaxtulh tlawalh pi atsinu ni putum latamanin nialh xkgalhakgaxmatkgolh Dios. Kaj makgapitsi ni makgxtakgkgolh Dios, la Abel, Enoc chu Noé (Hebreos 11:4, 5, 7).

8. 1) ¿La demonios litaxtukgolh makgapitsi ángeles? 2) ¿Tuku tlawakgolh demonios xlakata ni xnikgolh kMunkaklat?

8 Kilhtamaku akxni xlama Noé makgapitsi ángeles nialh kgalhakgaxmatkgolh Jehová. Makgxtakgkgolh xputawilhkan anta kʼakgapun, taktakgolh unu kKatiyatni chu tiyakgolh xtiyatliwakan la xla chatum lataman. ¿Tuku xlakata chuna tlawakgolh? Génesis 6:2 kinkawaniyan: «Xkaman xaxlikana Dios tsukukgolh akxilhkgo xlaktsuman lakchixkuwin pi lakswan xwankgonit. Chu tsukukgolh laksakkgo xlakata xlakpuskatinkan nawankgo». Ama ángeles katamaknunikgolh nixatlan talakapastakni latamanin, pero Jehová Dios ni lhuwa kilhtamaku xʼama kamaxki. Wa xlakata makamilh akgtum lanka munkaklat chu kamalakgsputulh nixatlan latamanin; kajwatiya lakgtaxtukgolh latamanin tiku ni makgatsankgananikgolh Dios (Génesis 7:17, 23). Xlakata ni xnikgolh, uma ángeles nema na kawanikan demonios, makgxtakgkgolh xtiyatliwakan chu taspitparakgolh kʼakgapun xaʼespíritus. Xlakata tuku tlawakgolh umakgolh demonios limasiyakgolh pi xtatayakgonit Satanás, chuna litaxtulh «xapuxku» demonio (Mateo 9:34).

9. 1) ¿Tuku kaʼakgspulalh demonios akxni taspitkgolh kʼakgapun? 2) ¿Tuku naʼakxilhaw xlakata demonios?

9 Akxni ángeles tiku ni kgalhakgaxmatkgolh Dios taspitparakgolh kʼakgapun, Dios nialh kamaxkilh talakaskin xfamilia nawankgo, chuna la xʼakgspulanit Satanás (2 Pedro 2:4). Maski la uku nialhla tiyakgo xmaknikan la chatum lataman, uma demonios lhuwa  kamakgtanukgo kxlatamatkan latamanin. Xlakata demonios makgtayakgo, Satanás «akgskgawi xlipaks ntachixkuwitat» (Apocalipsis 12:9; 1 Juan 5:19). ¿La kaʼakgskgawi? Umakgolh demonios lhuwa tuku limaklakaskinkgo xlakata nakaʼakgskgawikgo latamanin (kalikgalhtawakga 2 Corintios 2:11). Kaʼakxilhwi makgapitsi tuku kaliʼakgskgawi.

LA AKGSKGAWINANKGO DEMONIOS

10. ¿Tuku kilhchani taskuwan?

10 Demonios limaklakaskinkgo tuku xla skuwana xlakata nakaʼakgskgawikgo latamanin. Taskuwan wa tuku tatlawa xlakata nakatachuwinankgo demonios o na watiya akxni maklakaskinkan chatum skuwana xlakata natachuwinankan. Biblia wan pi uma lu nitlan chu kinkawaniyan pi ni tsinu katlawaw uma (Gálatas 5:19-21). Taskuwan tlan natamalakxtumiyaw liwat nema talimaklakaskin xlakata lichipakan skiti. Tiku chipa skiti tanu tanu liwat wilini xʼanzuelo xlakata nachipa tanu tanu skiti. Nachuna, nixatlan espíritus lhuwa tanu tanu taskuwan limaklakaskinkgo xlakata tlan kxmakan nakawili tanu tanu latamanin.

11. ¿Tuku limaklakaskinkgo skuwananin xlakata natakatsi tuku nina takatsi, chu tuku xlakata ni kilitlawatkan?

11 Pulaktum tuku liʼakgsiyanankgo demonios wa pulaktum tuku na tlawakgo skuwananin. ¿Tuku ama? Wantuku tlawakgo xlakata natakatsi tuku nina takatsi. Makgapitsi tuku limaklakaskinkgo wa umakgolh, horóscopos, tiku maklakaskinkgo xakgololo cristal, limaklakaskinkgo baraja, la xla tarot, likgalhtawakgakan makan, chu putsananikan tamanaxnat. Maski lhuwa lakpuwankgo pi uma nitu wamputun, Biblia kinkawaniyan pi putum umakgolh skuwananin taskujkgo nixatlan espíritus.  Akgtum liʼakxilhtit wi kHechos 16:16-18, Traducción del Nuevo Mundo, niku kinkawaniyan pi chatum tsumat, nema xkgalhi «nixatlan espíritu nema xmawani tuku aku nala», wamputun pi chatum espíritu tiku xwan tuku aku nala chu ni takatsi, xtlawa pi tsumat nawan tuku aku nala. Wa xlakata akxni maxtunika ama demonio, tsumat nialhla wa tuku aku nala.

Lhuwa tuku limaklakaskinkgo demonios xlakata nakaʼakgskgawikgo latamanin

12. ¿Tuku xlakata lu nitlan nakatachuwinamputunaw tiku nikgonita?

12 Atanu tuku na liʼakgskgawinankgo demonios wa akxni kamakgpuwantinikgo nakatachuwinankgo tiku nikgonita. Wantiku lipuwamakgolh xlakata nilh tiku lu xpaxkikgo, makglhuwa kamakanajlikan tuku nixlikana xlakata tiku nikgonita. Max chatum skuwana wi tuku nakawani xlakata tiku ninita, tuku ni lhuwa latamanin xkatsikgo o nachuwinan la xchuwinan tiku ninita. Uma tlawa pi lhuwa latamanin kakanajlakgolh pi tiku nikgonita lamakgolhku chu komo nakatachuwinankgo tlan nalimakgkatsikgo. Pero uma nixlikana chu lu nitlan. ¿Tuku xlakata? Xlakata demonios tlan chuwinankgo la xchuwinankgo tiku ninita chu kawanikgo skuwananin xlakata tiku nikgonita (1 Samuel 28:3-19). Nachuna, la katsinitawa kcapítulo 6, akxni chatum niy nialh niniku lama (Salmo 115:17). Wa xlakata tiku «kgalhskin tiku ninita» kaj akgskgawimimakgolh nixatlan espíritus chu ni tlawama xtalakaskin Dios (kalikgalhtawakga Deuteronomio 18:10, 11; Isaías 8:19). Wa xlakata, kuenta katlawa xlakata ni namakgtanuya uma nixatlan nema maklakaskinkgo demonios.

13. ¿Tuku tlan tlawakgolh lhuwa latamanin tiku pulana xpekuanikgo demonios?

13 Espíritus nema nixatlan ni kaj kaʼakgskgawikgo latamanin, na kamakgapekuankgo. Satanás chu xdemonios  katsikgo pi «kaj tsinu kilhtamaku nkgalhiy» xlakata nakamasputukan, wa xlakata tlakg nitlan tuku tlawakgo (Apocalipsis 12:12, 17). Maski chuna lama, la uku wilakgolh lhuwa mil latamanin tiku xapulana xkamakgapekuankgo uma espíritus chu la uku lakgtaxtukgonita. ¿La tlawakgolh? ¿La tlan wix nialhtu natlawanikgoyan demonios maski xmakgtanunita tuku xla skuwana?

LA TLAN NALAKATAKIYAW NIXATLAN ESPÍRITUS

14. ¿La tlan nakalakgtaxtuniyaw nixatlan espíritus, chuna la tlawakgolh kstalaninanin Cristo xalak Éfeso kxapulana siglo?

14 Biblia kinkawaniyan la nalakatakiyaw nixatlan espíritus chu la nakalakgtaxtuniyaw. Kaʼakxilhwi tuku tlawakgolh kstalaninanin Cristo xalak kachikin xwanikan Éfeso kxapulana siglo. Akxni nina kstalaninanin Cristo  xwankgonit, makgapitsi skuwananin xwankgonit. Akxni lakpuwankgolh pi namakgxtakgkgo, ¿tuku tlawakgolh? Wa xTachuwin Dios wan: «Chu nachuna wanti kskuwanankgoy, tiliminkgolh xlibrojkan, na anta xlakatin lilhuwa ntilhkuyukgolh» (Hechos 19:19). Ama tiku aku xtsukukgonit stalanikgo Cristo lhkuyokgolh xlibroskan xla magia, chu chuna makgxtakgkgolh akgtum xatlan liʼakxilhtit nema tlan natlawakgo latamanin tiku lakatakiputunkgo nixatlan espíritus. Tiku skujnaniputunkgo Jehová xlakaskinka nalakxtlawakgo tuku kgalhikgo xla taskuwan. Uma kilhchani libros, revistas, películas, dibujos chu tatlakgni nema makgpuwantininan namakgtanukan tuku xla skuwana o tuku limasiya pi tuku xla taskuwan lu tlan. Na kilhchani tuku limaklakaskinkgo xlakata nalitamakgtayakgo ni tuku nakaʼakgspula (1 Corintios 10:21).

15. ¿Tuku kilitlawatkan xlakata tlan nalakatakiyaw nixatlan espíritus?

15 Akxni nina akglhuwa kata xtitaxtunit akxni kstalaninanin Cristo xalak Éfeso lhkuyukgolh xlibroskan xla magia, apóstol Pablo katsokgnanilh: «Katalachipamaw [...] lhuwa demonios» (Efesios 6:12TNM). Uma likatsiyaw pi demonios, ni kaj chuntiya xtamakgxtakgkgonit. Chuntiyaku xkaʼakgchipaputunkgo kstalaninanin Cristo. Wa xlakata, ¿tuku tlakg xlitlawatkan xwanit? Apóstol Pablo kawanilh: «Nachuna, katiyatit xalanka escudo xla takanajla nema nalimamixiyatit tuku lakgpasama nema nakamakaminiyachan tiku lu lixkajni likatsi [Satanás]» (Efesios 6:16TNM). Akxni tlakg tliwakga nawan kintakanajlakan, tlakg tlan nalakatakiyaw nixatlan espíritus (Mateo 17:20).

16. ¿La tlan namatliwakglhaw kintakanajlakan?

16 Wa xlakata, ¿la tlan namatliwakglhaw kintakanajlakan?  Nalikgalhtawakgayaw Biblia. Xlakata akgtum patsaps tliwakga natawila, talakaskin pulhman namatijukan. Nachuna, xlakata kintakanajlakan tliwakga natawila, talakaskin: lu xatlan takatsin xla xTachuwin Dios. Komo chali chali nalikgalhtawakgayaw Biblia, kintakanajlakan natatliwakglha. Chuna la akgtum patsaps nema tliwakga wi, kintakanajlakan nakinkamakgtayayan xlakata nitu nakinkatlawanikgoyan nixatlan espíritus (1 Juan 5:5).

17. ¿Tuku kilitlawatkan xlakata demonios nitu nakinkatlawanikgoyan?

17 ¿Tuku na xlitlawatkan xwanit kstalaninanin Cristo xalak Éfeso? Xlakata xwilakgolh niku xlitsama nixatlan espíritus, tlakg xlakaskinkgo tamakgtay. Wa xlakata Pablo kawanilh: «Xalenkgalhin natlawayatit miʼoracionkan» (Efesios 6:18). Akinin na lamaw kʼakgtum kakilhtamaku niku lhuwa litsama espíritus nixatlan, xlakata tlan natamakgtayayaw chu nitu nakinkatlawanikgoyan lu xlakaskinka naskiniyaw Jehová kakinkakuentajtlawan. Wantuku lu xlakaskinka wa namapakuwiyaw xtukuwani Jehová akxni natlawayaw oración (kalikgalhtawakga Proverbios 18:10). Nachuna, xlenkgalhin naskiniyaw pi “kakinkalakgmaxtun ktuku nitlan”, uma wamputun kakinkalakgmaxtun kxmakan Satanás (Mateo 6:13). Chu xlikana Dios nakinkakgalhtiyan tuku naskiniyaw (Salmo 145:19).

18, 19. 1) ¿Tuku xlakata liwana katsiyaw pi natlajananaw kʼuma talachipat nema katakgalhiyaw nixatlan espíritus? 2) ¿Tukuya takgalhskinin nakatsiyaw xtakgalhtin kcapítulo 11?

18 Xlikana pi nixatlan espíritus lu lixkajni likatsikgo. Pero uma ni wamputun pi xlenkgalhin xatapekua nalatamayaw, komo nalakatakiyaw Akgskgawini chu natalakatsuwiniyaw Dios chu natlawayaw Xtalakaskin,  nitu kintikatlawanikgon (kalikgalhtawakga Santiago 4:7, 8). Xlitliwakga uma nixatlan espíritus tatlajikgo. Kxkilhtamaku Noé, demonios kamalakgaxokgeka, chu nialh makgas nakaputsananikan (Judas 6). Kalakapastakti pi kinkamakgtayakgoyan lakgtliwakga xʼángeles Jehová (2 Reyes 6:15-17). Xlakan kuentajtlawamakgolh la katalachipamaw nixatlan espíritus chu lakaskinkgo pi kakatlajaw. Tlan nawanaw pi xlakan makgapakgxnankgo xlakata nakinkamakgpuwantinikgoyan. Wa xlakata ni kamakgxtakgwi Jehová chu xfamilia xaʼespíritus nema ni makgatsankgananikgo. Nachuna, nipara tsinu kamakgtanuw tuku xla skuwana chu katlawaw tastakyaw nema wi kxTachuwin Dios (1 Pedro 5:6, 7; 2 Pedro 2:9). Chuna, lu xlikana natlajananaw kʼuma talachipat nema katakgalhiyaw nixatlan espíritus.

19 Pero ¿tuku xlakata Dios mastamajku talakaskin pi kalatamakgolhku uma nixatlan espíritus nema tlawakgo pi kaʼanalh lhuwa tapatin? Kcapítulo 11 naʼakxilhaw tuku xlakata.