Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 TATAKGATSIN

¿Tiku xpuxkukan ángeles nema wanikan Miguel?

¿Tiku xpuxkukan ángeles nema wanikan Miguel?

ANTA kBiblia ni lhuwa textos anan niku limapakuwikan chatum espíritu, Miguel. Pero akxni lichuwinankan kBiblia xlenkgalhin wi tuku tlawama. Klibro xla Daniel, lichuwinan pi katalachipama ángeles tiku lixkajni likatsikgo, anta kxcarta Judas, talakgalhtima Akgskgawini, chu klibro xla Apocalipsis talachipama Satanás chu xdemonios. Xlikana, xla putum kilhtamaku tlawa pi kakgalhakgaxmatka xlimapakgsin Jehová chu katalachipa xtalamakgasitsin Dios. Uma tuku tlawa limasiya tuku wamputun xtukuwani, xtukuwani wamputun, «¿Tiku xTachuna Dios?». Pero ¿tiku uma Miguel?

Pulana, kalakapastakwi pi makgapitsi latamanin ni kaj akgtum tukuwani kgalhikgo. Kawiliw akgtum liʼakxilhtit, Jacob, tiku xpulalin akgtum lanka familia, na xlilakgapaskan Israel, chu apóstol Pedro, na xlilakgapaskan Simón (Génesis 49:1, 2; Mateo 10:2). Nachuna, Biblia kinkamakgatekgsniyan pi Miguel wa atanu tukuwani nema lilakgapaskan Jesucristo akxni nina xmin unu kKatiyatni chu akxni taspitpa kʼakgapun chuntiya lilakgapaska. Kaʼakxilhwi tuku wan Biblia xlakata tlan chuna nawanaw.

Xapuxku ángel. Wa xTachuwin Dios wan pi Miguel wa «xapuxku ángel» (Judas 9). Akxilhaw pi Miguel wanikan xapuxku ángel, uma kinkamakgatekgsniyan pi kaj chatum. Anta kBiblia  nikxni wan pi anan chalhuwa «xapuxku ángeles», Biblia lichuwinan pi kaj chatum. Nachuna Biblia lichuwinan pi Jesús litaxtu tiku tlawa xtaskujut xapuxku ángel. Chuna lichuwinan 1 Tesalonicenses 4:16, niku kinkawanikanan tuku natlawa Jesucristo tiku lakastakwananita: «Xampi watiya nkimPuchinakan Jesucristo, namin akxni nalikatasay limapakgsin natasaninan xapuxku ángel». Unu ktexto wan pi Jesús nachuwinan la xapuxku ángel. Uma tuku akxilhwi likatsiyaw pi Jesús wa xpuxku ángeles wanikan Miguel.

Comandante. Biblia wan pi «Miguel chu xʼángeles xtalatlawamakgo luwa [...] chu xʼángeles» (Apocalipsis 12:7). Uma likatsiyaw pi Jesús xComandante putum ángeles nema ni makgatsankgananikgo Dios nema takaxkgonit xlakata natlawakgo guerra. Klibro xla Apocalipsis Jesús liwilikan xComandante putum ángeles tiku ni makgxtakgkgo Dios (Apocalipsis 19:14-16). Chu apóstol Pablo stalanka lichuwinan: «kinPuchinakan Jesús» chu «xʼángeles wa nti kgalhikgoy xlitliwakga» (2 Tesalonicenses 1:7). Chuna la akxilhwi, Biblia lichuwinan Miguel chu «xʼángeles» chu na lichuwinan Jesús chu «xʼángeles» (Mateo 13:41; 16:27; 24:31; 1 Pedro 3:22). Wa kxTachuwin Dios ni kinkawaniyan pi pulaktiy ángeles anan tiku ni makgatsankgananikgo Dios, makgapitsi nema pulalin Miguel chu makgapitsi nema pulalin Jesús. Wa xlakata tlan nawanaw pi Miguel na watiya Jesucristo, tiku tlawama xtaskujut kʼakgapun. *

^ párr. 1 Komo tlakg katsiputuna pi tukuwani Miguel kilhchani xKgawasa Dios tlan natekgsa anta vol. 2, páginas 386 chu 387 xla libro Perspicacia para comprender las Escrituras, nema tlawakgonit xtatayananin Jehová.