Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 4

¿Tiku Jesucristo?

¿Tiku Jesucristo?
  • ¿Tuku lakgaya Jesús nema ni anan xtachuna?

  • ¿Niku minitancha?

  • ¿La xlikatsi akxni xlama unu kKatiyatni?

1, 2. 1) ¿Tuku xlakata tanu wamputun nakgaxpata xlakata chatum tiku lhuwa lakgapaskan chu tanu wamputun liwana nalakgapasa? 2) ¿Tuku ni lu liwana katsikgo xlakata Jesús?

UNU kkakilhtamaku wilakgolh latamanin tiku lhuwa kalakgapaskgokan. Makgapitsi lhuwa kalakgapaskgokan  anta kxpulatamankan, kxkachikinkan o xlikalanka Katiyatni. Pero maski wix katsiya xtukuwani ama lataman tiku lhuwa lakgapaskan ni wamputun pi lakgapasa, wamputunaw pi ni liwana lakgapasa la xwi xlatamat makgasa o la xtayat la uku.

2 Maski titaxtunita akgtiy mil kata akxni Jesucristo latamalh unu kKatiyatni, putum latamanin lichuwinankgo. Pero lhuwa ni liwana katsikgo tiku xwanit Jesús. Makgapitsi wankgo pi kaj chatum xatlan chixku xwanit. Amakgapitsi lakpuwankgo pi kaj chatum xpalakachuwina Dios xwanit. Na wilakgolh tiku kanajlakgo pi Jesús wa Dios chu nakakninaniyaw. ¿Pi kawa xlikana?

3. ¿Tuku xlakata xlakaskinka nalakgapasa Jehová chu Jesucristo?

3 Lu xlakaskinka pi wix kakatsi xlakata Jesús. ¿Tuku xlakata? Xlakata Biblia kinkawaniyan: «Wa uma wamputun latamat nema ni kgalhi xlisputni, pi nalakgapaskgoyan wix, xachastum Dios xaxlikana chu wantiku malakgacha, Jesucristo» (Juan 17:3TNM). Chuna, komo xlikana nalakgapasaw Jehová Dios chu Jesucristo uma natlawa pi nalatamayaw kxakalipaxuw katiyatni chu nikxni naniyaw (Juan 14:6). Nachuna, Jesús wililh tlakg xatlan liʼakxilhtit xlakata la nalatamayaw chu la natalalinaw kintalatamankan (Juan 13:34, 35). Xapulana capítulo xla uma libro akxilhwi tuku xaxlikana xlakata Dios. Chu kaʼakxilhwi tuku masiya Biblia xlakata Jesucristo.

MESÍAS NEMA XWANKANIT PI NAMIN

4. ¿Tuku wamputun ama tuku lilakgapaskan Jesús Mesías chu Cristo?

4 Lhuwa kata akxni Jesús nina xlakachin, Biblia lichuwinalh la xʼama min tiku xʼama malakgacha Dios, tiku wanikan Mesías o Cristo. Akxni wanaw, Mesías (uma  tachuwin xaʼhebreo) chu Cristo (uma tachuwin xagriego) wamputun «xaTalaksakni». Wa xlakata uma tiku xʼamaka malakgachakan kKatiyatni xʼamaka laksakkan, uma wamputun pi Dios xʼama laksaka xlakata wi tuku lu xlakaskinka xlakgayawalh. Amakgapitsi capítulos xla uma libro tlakg tlan naʼakxilhaw pi Mesías wi tuku lu xlakaskinka litaxtulh xlakata nakgantaxtu tuku Dios wanit pi natlawa. Na naʼakxilhaw pi la uku Jesús na tlan kinkasikulunatlawayan. Max akxni Jesús nina xlakachin, lhuwa latamanin xkakgalhskinkan: «¿Tiku Mesías nawan?».

5. ¿Tuku lu xkanajlakgo kstalaninanin Jesús?

5 Kxapulana siglo xla kinkilhtamakujkan, kstalaninanin Jesús xalak Nazaret liwana xkatsikgo pi wa Mesías nema xwankanit pi namin (Juan 1:41). Chatum kstalanina, Simón Pedro, stalanka wanilh: «Wix nCristo» (Mateo 16:16). Pero ¿tuku xlakata kstalaninanin xkanajlakgo pi Jesús wa Mesías nema xwankanit pi namin? ¿Chu tuku xlakata kanajlayaw akinin pi wa Mesías?

6. ¿Tuku liʼakxilhtit kinkamakgatekgsniyan la Jehová kamakgtayanit latamanin tiku ni makgatsankgananikgolh xlakata tlan xlakgapaskgolh Mesías?

6 Xpalakachuwinanin Dios tiku xlamakgolh akxni nina xlama Jesús, lichuwinankgolh lhuwa tuku tlan xlikatsika tiku ama Mesías. Kawiliw tuku tlan natamalakxtumiyaw: kaliwiliw pi wix napina putsaya chatum tiku ni lakgapasa anta niku chinkgo autobuses pero lhuwa wilakgoka o napina putsaya niku chinkgo trenes o aviones. ¿Nixlikana pi xlakaskinka nakatsiya la lakawan tiku putsapat? Jehová limaklakaskilh xpalakachuwinanin xlakata xwankgolh tuku xʼama tlawa Mesías chu tuku xʼama akgspula. Chuna latamanin  tiku ni xmakgxtakgkgolh Dios xʼamakgolh lakgapaskgo akxni xʼakxilhkgolh la xkgantaxtulh uma tuku xlichuwinankanita.

7. Kawanti akgtiy tuku xlichuwinankanit nema kgantaxtulh kJesús.

7 Kaʼakxilhwi akgtiy liʼakxilhtit. Xapulana wa uma: akxni xtsankga akgtujun ciento kata nalakachin Jesús, palakachuwina Miqueas lichuwinalh pi xʼama lakachin kBelén, akgtum aktsu kachikin kxtiyat Judá (Miqueas 5:2). ¿Niku kawa lakachilh Jesús? Anta kʼama kachikin (Mateo 2:1, 3-9). Xliʼakgtiy liʼakxilhtit wa nema tatsokgnit kDaniel 9:25, akglhuwa ciento kata tlan xwankan tuku kata xʼama tasiya Mesías: kata 29 a.x.J. * Chuna la kgantaxtulh uma tuku xwankanit chu atanu, limasiya pi Jesús wa Mesías wantiku xwankanit pi xʼama min.

Akxni Jesús tamunulh Mesías wa, o Cristo

8, 9. ¿La liwana litasiyalh akxni tamunulh Jesús pi wa xwanit Mesías?

8 Akxni xkgalhsputma kata 29 tlakg stalanka tasiyalh pi Jesús wa Mesías xwanit. Ama kilhtamaku akxni Jesús skinilh Juan tiku xMununan pi kamunulh kkgalhtuchokgo wanikan Jordán. Jehová xwaninit Juan pi wi tuku xʼama limasiyani xlakata tlan xlakgapasli Mesías, chu maxkilh akxni Jesús tamunulh. Biblia kinkawaniyan: «Cha nchu alistalh akxni ntamunulh Jesús, tunkan takutli kchuchut. Kaukxilhtit, wa akgapun talakkinilh, na ukxilhli kspíritu Dios ntu xtaktama xtachuna ntijtimput, na anta xmima xokgspun. Cha nchu ntichuwinanka nkʼakgapun mpi xwankan: “Wa yuma nkinkam nti luwa kpaxkiy, wa nti luwa klimakgapaxuwakan”» (Mateo 3:16, 17). Akxni Juan kgaxmatli chu akxilhli uma, xla stalanka katsilh pi Jesús wa xmalakgachanit Dios (Juan 1:32-34). Ama kilhtamaku akxni  Jesús maxkika espíritu santo, wamputunaw xlitliwakga Dios, Mesías, o Cristo wa, tiku xlaksakkanit xlakata Pulalina chu Mapakgsina nawan (Isaías 55:4).

9 Putum tuku xlichuwinankanit kBiblia kgantaxtulh chu tuku Jehová wa limasiya pi Jesús wa Mesías nema xwankanit pi namin. Pero Biblia na kinkakgalhtiyan atanu akgtiy takgalhskinin xlakata Jesucristo: niku minitancha chu la xlikatsi akxni xlama kKatiyatni.

¿NIKU MINITANCHA JESÚS?

10. ¿Tuku kinkamasiyaniyan Biblia xlakata niku xlama Jesús akxni nina xmin unu kKatiyatni?

10 Biblia kinkamasiyaniyan pi Jesús xlamacha kʼakgapun akxni nina xmin unu kKatiyatni. Kawiliw liʼakxilhtit, palakachuwina Miqueas lichuwinalh niku xʼama lakachin Jesús pero na wa pi Jesús «makgasa lakatsukulh» (Miqueas 5:2). Nachuna, Jesús makglhuwa wa pi akxni nina xmin kKatiyatni, xlamacha kʼakgapun (kalikgalhtawakga Juan 3:13; 6:38, 62; 17:4, 5). Anta chatum espíritu xwanit chu nitiku tlakg tlan xtalalin Jehová chuna la xla xtalalin.

11. ¿La limasiya Biblia pi Jesús wa xKgawasa Jehová nema tlakg paxki?

11 Lhuwa tuku xlakata Jesús wa xkgawasa Jehová nema tlakg paxki. Biblia limapakuwi «wanti xakgasiyaj xwija lantla xlipaks tamalakatsukun», xlakata wa xapulana nema Dios tlawalh (Colosenses 1:15). * Atanu tuku na tanu tlawa, wa xlakata wa «nchastum xKam» (Juan 3:16). Uma wamputun pi Jehová xakstu tlawalh Jesús chu niti makgtayalh. Nachuna kajwatiya Jesús tiku makgtayanalh  xlakata natlawakan putum tuku anan unu (Colosenses 1:16). Nachuna wanikan «nTachuwin» (Juan 1:14). Uma tukuwani nema lilakgapaskan limasiya pi xla xliyawakanit napalakachuwinan xTlat. Max xkamaxki tamakatsin chu tamapakgsin amakgapitsi xkamanan Dios, uma wamputun ángeles chu latamanin.

12. ¿Tuku likatsiyaw pi xapulana xKgawasa ni xtachuna Dios?

12 Xapulana xKgawasa Dios, ¿xtachuna la Dios chuna la lakpuwankgo makgapitsi? Ni wa tuku masiya Biblia. Chuna la akxilhnitawa, xaKgawasa kaj tlawaka. Wa xlakata tlan nawanaw pi kgalhilh xlakatsukut, pero Dios ni kgalhilh xkilhtsukut chu ni kgalhi xlisputni (Salmo 90:2). Wa xaKgawasa nipara lakapastakli natatalakxtumi xTlat. Biblia liwana limasiya pi xaTlat tlakg xapuxku nixawa xaKgawasa (kalikgalhtawakga Juan 14:28; 1 Corintios 11:3). Kaj Jehová wa Dios nema «xlipaks kgalhi litliwakga» (2 Corintios 6:18). Wa xlakata Jehová niti xtachuna. *

13. ¿Tuku wamputun Biblia akxni wan pi Kgawasa wa «xaliʼukxilhti wa lantla Dios wa nti nila ntaʼukxilha»?

13 Jehová chu xapuxku xKgawasa lu tlan xlatalalin lhuwa millones kata akxni nina xtlawakan staku chu Katiyatni. ¡Max lu lhuwa xlapaxki! (Juan 3:35; 14:31.) Uma Kgawasa nema xpaxkikan chuna la xTlat xwanit. Wa xlakata, Biblia wan pi xla wa «xaliʼukxilhti wa lantla Dios wa nti nila ntaʼukxilha» (Colosenses 1:15). Xlikana, chuna la laktsu kamanan xtachuna la xtlatkan, xKgawasa Dios nachuna xtayat la xTlat chu nachuna likatsi.

14. ¿La tlawalh Jehová xlakata xachastum xKgawasa xlakachilh la lakachinkgo latamanin?

14 Wa xKgawasa Jehová xatapaxuwan makgxtakgcha  akgapun chu milh unu kKatiyatni chu chatum chixku wa. Pero max wix kgalhskinkana: «¿La tlan chatum espíritu nalakachin la chatum lataman?». Xlikana, Jehová tlawalh milagro. Tlawalh pi xlatamat xapuxku xKgawasa, nema xwilacha kʼakgapun, katawilalh kxpan chatum tsumat nema ni xkgalhi xchixku chu judía xwanit xwanikan María. Xlakata ni kgalhilh chatum tlat xalak Katiyatni, María kgalhilh chatum aktsu kgawasa nema nitu xkgalhi talakgalhin, chu limapakuwilh Jesús (Lucas 1:30-35).

¿LA XLIKATSI JESÚS AKXNI XLAMA UNU KKATIYATNI?

15. ¿La tlakg tlan nalilakgapasaw Jehová Jesús?

15 Putum tuku Jesús tlawalh chu lichuwinalh akxni unu xlama kKatiyatni kinkamakgtayayan xlakata tlan nalakgapasaw. Nachuna, kinkamakgtayayan tlakg tlan  nalakgapasaw Jehová. ¿La tlan nalakgapasaw? Kalakapastakti pi uma Kgawasa chuna la xTlat. Wa xlakata wanilh chatum xtamakgalhtawakgen: «Wa nti nkiʼukxilhnitta, ukxilhnitta xaTlat» (Juan 14:9). Anta kmaktati libros xalak Biblia Mateo, Marcos, Lucas chu Juan, lhuwa tuku kinkawanikanan xlakata la latamalh Jesús, tuku tlawalh chu la xtayat xwanit.

16. ¿Tuku tlakg xlichuwinan Jesús, chu niku xminitancha xtamasiy?

16 Jesús xwanikan «Makgalhtawakgana» (Juan 1:38; 13:13). ¿Tuku xmasiya? Tlakg xlichuwinan «xalakwan tamakatsin xla Tamapakgsin», wamputun xTamapakgsin Dios. Uma namapakgsinan xlikalanka Katiyatni, natawila kʼakgapun chu nakamaxki lhuwa tasikulunalin latamanin tiku ni namakgxtakgkgo Dios (Mateo 4:23TNM). ¿Tiku xla xwanit uma tamakatsin? Jesús wa: «Wa kintamasiyun ni kila, wampi wa xla nti  nkimalakgachalh», xwamputun pi ama tamakatsin xla Jehová (Juan 7:16). Kgawasa xkatsi pi xTlat xlakaskin pi latamanin xkgaxmatkgolh xalakwan xalaksasti xla xTamapakgsin Dios. Anta kcapítulo 8 tlakg nakatsiyaw xlakata uma Tamapakgsin chu tuku natlawa.

17. ¿Niku xmasiya Jesús, chu tuku xlakata palha skujli xlakata nakamasiyani?

17 ¿Niku xmasiya Jesús? Kaniwa niku xʼanan latamanin: kkakiwin, klaklanka kachikinin, laktsu kachikinin, niku kstanankan chu kʼakgatunu chiki. Jesús ni kaj xtawila chu xkakgalhi kaminkgolh latamanin, xla xʼan kaputsa (Marcos 6:56; Lucas 19:5, 6). ¿Tuku xlakata xlimaxtu lhuwa kilhtamaku chu palha kskuja nalichuwinan xlakata Dios chu xmasiya? Xlakata wa xtalakaskin xTlat xwanit, wa xlakata Jesús xlenkgalhin makgantaxtilh (Juan 8:28, 29). Pero na xwi atanu tuku xlakata chuna xtlawa, xkalakgalhaman latamanin tiku xʼankgo putsakgo (kalikgalhtawakga Mateo 9:35, 36). Tiku xpulalinkgo takanajla xkalimasiyanitkan xwanit latamanin xaxlikana xlakata Dios chu tuku lakapastaknit natlawa, pero ni xkamasiyanikgo, kaj chuntiya kamakgxtakgkgolh. Jesús xkatsi pi xmaklakaskinkgo nakgaxmatkgo tamakatsin xla Tamapakgsin.

18. ¿Niku akglit xtayat Jesús lakgatiya, chu nikuma?

18 Jesús xapaxkina xwanit, xalakgalhamana chu tsatata xwanit xnaku. Tlan xkatalalin latamanin, ni tlankajwa xwanit chu tlan xlikatsi, asta laktsu kamanan tlan xmakgkatsikgo akxni akxtum xtatawilakgo (Marcos 10:13-16). Ni xlaksakpaxkinan. Ni xʼakxilhputun katalakatsalalh limapakgsin chu akxni ni xtatlawa tuku xaʼakgstitum (Mateo 21:12, 13). Ama kilhtamaku akxni nitu xkaliʼakxilhkan chu ni xkalakgalhamankan lakpuskatin, Jesús tlan kalikatsinilh (Juan 4:9, 27). Jesús ni tlankajwa  xwanit. Akgtum kilhtamaku katuchakgelh xʼapóstoles, chu uma taskujut wa xtlawa tiku tlakg xaktuju skujni.

Jesús xlichuwinan xlakata xtlat xanikuta niku xwilakgolh latamanin

19. ¿Tukuya liʼakxilhtit limasiya pi Jesús xkalakgkatsan latamanin nema xpatinamakgolh?

19 Jesús xkalakgkatsan latamanin tiku xpatinamakgolh, chuna la limasiyalh akxni kalimapaksalh xʼespíritu Dios (Mateo 14:14). Kawiliw akgtum liʼakxilhtit, chatum tiku xkgalhi lepra putsalh chu wanilh: «Lapi xlakaskinti, tlan nakimapaksaya». Jesús makgkatsilh la xpatinama ama chixku. Lakgalhamalh, tamakgastonkgli, xamalh chu wanilh: «¡Klakaskin! Kapaksti». ¡Chu tatatla tunkun paksli! (Marcos 1:40-42TNM.) ¿La lakpuwana wix pi makgkatsilh ama lataman?

NIKXNI MAKGXTAKGLI DIOS

20, 21. ¿Tuku xlakata tlan nawanaw pi Jesús wa xatlan liʼakxilhtit xlakata xlenkgalhin kgalhakgaxmatli Dios chu nikxni makgxtakgli?

20 Jesús wa tiku tlakg xatlan liʼakxilhtit xlakata xla nikxni makgxtakgli Dios chu xlenkgalhin kgalhakgaxmatli. Xanikuta niku tanokgli tlawalh tuku xlitlawat xwanit, maski lhuwa patinalh chu lhuwa taputsastalanit kgalhilh. Nikxni makglhtinamputulh tuku Satanás xmalaknuni (Mateo 4:1-11). Milh kilhtamaku akxni makgapitsi xparientes ni kanajlanikgolh. Makgapitsi wankgolh: «Akgwitinit» (Marcos 3:21TNM). Pero Jesús ni taxlajwanilh, xlenkgalhin tlawalh xtaskujut Dios. Akxni tiku ni xʼakxilhputunkgo lixkajni wanikgolh chu wilinikgolh, xla ni lakpuwa nakatlawani tuku nitlan (1 Pedro 2:21-23).

21 Jesús nikxni makgatsankgananilh Dios asta akxni nilh, snun patinalh akxni makgnikgolh tiku ni xʼakxilhputunkgo (kalikgalhtawakga Filipenses 2:8). Kaj kalakapastakti la patinalh xaʼawatiya kilhtamaku akxni  latamalh unu la chatum lataman. Mapakgsinanin chilenkgolh kpulachin, chu putsakgolh akgsaninanin xlakata namalakgsiyakgo Jesús, xlakkaxtlawananin taʼakglhuwit xalaklixkajni malakgaxokgekgolh, latamanin xlikgalhkgamanankgo chu soldados lhuwa mapatinikgolh. Xtokgowakakgolh chu uma tuku awatiya wa: «Paksa kgantaxtunit» (Juan 19:30). Akxni xtitaxtunita akgtutu kilhtamaku, xTlat xalak akgapun malakastakwanilh la chatum espíritu (1 Pedro 3:18). Ni lhuwa semanas titaxtulh taspitpa kʼakgapun, niku la uku «anta xpakgstakat Dios wi» kgalhkgalhima xlakata mapakgsina nawan (Hebreos 10:12, 13).

22. ¿Tuku tlan kitaxtulh xlakata Jesús nikxni makgxtakgli Dios?

22 ¿Tuku tlan kitaxtulh xlakata Jesús nikxni makgxtakgli Dios? Akxni nilh, tlawalh pi katalakilh tiji xlakata nikxni naniyaw chu nalatamayaw unu kxakalipaxuw Katiyatni, chuna la Jehová xlakapastaknit natlawa xapulana. Kcapítulo 5 naʼakxilhaw pi xlakata nilh Jesús tlawa pi uma tuku kgalhkgalhiyaw kakgantaxtulh.

^ párr. 7 Xlakata nakatsiya la kgantaxtulh kJesús uma tuku xlichuwinanit palakachuwina Daniel, kaʼakxilhti tatakgatsin: «Palakachuwina Daniel wa tuku kilhtamaku xʼama chin Mesías».

^ párr. 11 Jehová wanikan xaTlat xlakata xla tlawalh putum tuku anan (Isaías 64:8). Xlakata Jehová tlawalh Jesús, wa xlakata wanikan xKgawasa Dios. Amakgapitsi espíritus xalak akgapun chu Adán na kawanikan xkamanan Dios (Job 1:6; Lucas 3:38TXS, 1999).

^ párr. 12 Tlakg natekgsa niku wan pi Jesús ni xtalakxtum Dios, kaʼakxilhti tatakgatsin: «Tuku xaxlikana xlakata xaTlat, xaKgawasa chu espíritu santo».