Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 TATAKGATSIN

¿Tuku wamputun Seol chu Hades?

¿Tuku wamputun Seol chu Hades?

XAPULANA tachuwin nema litsokgka Biblia, talimaklakaskin liwaka tutumpuxumakaw uma tachuwin xahebreo scheʼóhl chu tachuwin xagriego háides, umakgolh akgtiy tachuwin watiya wamputunkgo, chu akxni limaklakaskinkan umakgolh tachuwin lichuwinankan linin. Kmakgapitsi Biblia akxni lichuwinankgo Hades chu Seol, wan «putaknun», «pupatin», «tawaxni» chu na wilikgo atanu tachuwin xlakata uma. Pero atsinu ni putum tachuwin nema anankgo, ni kgalhikgo tachuwin nema na lu watiya kilhchani chuna la tachuwin xahebreo o xagriego. Wa xlakata, Biblia Traducción del Nuevo Mundo xaʼinglés limaklakaskinkan kxnotas tachuwin «Seol» chu «Hades». ¿Tuku wamputunkgo uma tachuwin? Kaʼakxilhwi la limaklakaskin Biblia.

Eclesiastés 9:10 kinkawaniyan: «Ni anan taskujut chu nialhla tuku lakkaxwilikan, chu nipara takatsin nipara liskgalala anta kPutaknun [«Seol», nota], niku pimpat». ¿Wamputun uma pi Seol wa lakatum niku kamaknuyaw akxni niy tiku lu xpaxkiyaw? Ni. Akxni Biblia lichuwinan niku kamaknukan tiku nikgo, ni limaklakaskin tachuwin scheʼóhl nipara háides, wata maklakaskin atanu tachuwin xahebreo chu xagriego (Génesis 23:7-9; Mateo 28:1). Tachuwin «Seol» na ni wamputun anta niku akxtum kamaknukan lhuwa latamanin, la akgtum putaknun xla familia o xla lhuwa latamanin (Génesis 49:30, 31).

Wa xlakata, akxni xTachuwin Dios lichuwinan «Seol» o «Hades», ¿tuku wamputun? Uma tachuwin wamputun lakatum niku tlakg xalanka nixawa niku kamaknukan lhuwa latamanin. Kaliwiliw akgtum liʼakxilhtit, Isaías 5:14 wan pi Putaknun, o Seol, «lu talankinit chu chuntiya tilanka takgalhpitsitilhama chu nikxni tachokgo». Tlan nawanaw pi Seol lu lhuwa kawanit latamanin tiku nikgonita, chu tlakg tilakaskin (Proverbios 30:15, 16). Seol ni xtachuna la anta niku kamaknukan tiku nikgonita nema lakgapasaw, xlakata uma tatsamakgo, “Putaknun nikxni tatsama” (Proverbios 27:20). Xlikana, Seol, o Hades nikxni tatsama. Wa xlakata uma ni wamputun pi wi niku lakatum  niku wi. Uma kilhchanima anta niku ankgo putum tiku nikgo, o na tlan nawanaw pi uma kinkalimakgatekgsnikanan niku putum latamanin lhtatamakgolh, o nikgonita.

Akxni katsiyaw tuku masiya Biblia xlakata talakastakwanat, tlakg liwana akgatekgsaw o makgachakgxiyaw tuku wamputun Seol o Hades. Anta kBiblia umakgolh tachuwin tamaklakaskin akxni talichuwinan niku wilakgolh tiku tlan nakamalakastakwanikan (Job 14:13; Hechos 2:31; Apocalipsis 20:13). * Na kinkawaniyan pi anta wilakgolh tiku skujnanikgolh Jehová chu lhuwa tiku ni skujnanikgolh (Génesis 37:35; Salmo 55:15). Wa xlakata liwana kinkawaniyan pi «nalakastakwanankgoy ninin wanti xalakwan, chu wanti ni xalakwan» (Hechos 24:15).

^ párr. 1 Biblia na kinkamasiyaniyan pi wilakgolh latamanin tiku ni katikamalakastakwanika xlakata ni wilakgolh kSeol o Hades, xlakan wilakgolh «kʼGehena», tachuwin xagriego (Mateo 5:30TNM; 10:28; 23:33). Chuna la Seol chu Hades, Gehena ni lakatum niku wi.