Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 17

Oración tlawa pi katalakatsuwiniw Dios

Oración tlawa pi katalakatsuwiniw Dios
  • ¿Tuku xlakata kilitlawatkan oración?

  • ¿Tuku kilitlawatkan xlakata Dios nakinkakgaxmatniyan?

  • ¿La kinkakgalhtiyan Dios akxni tlawaniyaw oración?

«Tiku tlawalh akgapun chu katiyatni» kgaxmatputun kioracionkan

1, 2. ¿Tuku xlakata kiliʼakxilhatkan oración la akgtum lanka talakgalhaman, chu tuku xlakata kilikatsitkan tuku masiya Biblia xlakata oración?

KOMO Katiyatni natamalakxtumiyaw xlikalanka kakilhtamaku, kintiyatkan lu aktsina. Jehová, «ti tlawalh akgapun y katiyatni», kaʼakxilha kachikinin la akgtum slankgat o stajat kpatum cubeta (Salmo 115:15SXP; Isaías 40:15). Pero Biblia kinkawaniyan pi «Jehová lakatsu katawi putum tiku kilhanimakgo, putum tiku xlikana putsakgo. Kamaxki tuku lakaskinkgo tiku pekuanikgo, kgaxmata akxni tasaskinikgo tamakgtay, chu kalakgmaxtu» (Salmo 145:18, 19). Kalakpuwanti tuku kilhchanima uma tachuwin. Kimalakatsukinakan tiku kgalhi xliputum litliwakga, lakatsu kinkatawilan chu nakinkakgaxmatniyan komo “xlikana naputsayaw”. ¡Akgtum lanka talakgalhaman xlakata akinin tlan tlawaniyaw oración!

2 Pero komo lakaskinaw pi Jehová nakinkakgaxmatniyan, xlakaskinka natlawaniyaw oración la lakaskin. Pero ¿la chuna natlawayaw komo ni katsiyaw tuku masiya Biblia xlakata oración? Xlakaskinka nakatsiyaw, xlakata oración tlawa pi katalakatsuwiniw Jehová.

 ¿TUKU XLAKATA KILITLAWANITKAN ORACIÓN JEHOVÁ?

3. Kawanti tuku xlakata lu xlakaskinka natlawaniyaw oración Jehová.

3 Pulaktum tuku xlakata lu xlakaskinka natlawaniyaw oración Jehová wa xlakata xla kinkawaniyan katlawaniw oración. Xtachuwin wan: «Nitu kalilakgaputsatit, wata putum kilhtamaku, katlawatit oración chu katasaskintit chu kamastatit paxtikatsinit, kawanitit Dios tuku maklakaskinatit; chu xtakaksni Dios nema makgatlaja putum taʼakgatekgsni nakuentajtlawa minakujkan chu mintalakapastaknikan xpalakata Cristo Jesús» (Filipenses 4:6, 7TNM). Xapuxku Mapakgsina, tiku tlawanit putum tuku anan kinkawaniyan katlawaniw oración, chu ni lakgmakgamputunaw.

4. ¿Tuku xlakata tlan nawana pi akxni tlakg tlawaniya oración Jehová tlakg tlan talalipina?

4 Atanu tuku xlakata kilitlawanitkan oración Jehová, wa pi akxni tlakg tlawaniyaw oración tlakg tlan talalinaw. Tiku lu tlan latalalin ni kaj latachuwinan akxni wintuku lakaskinkgo. Wata katsiputunkgo la wi  achatum chu tlakg tlan latalalin akxni lawani tuku lakapastakkgo, tuku lilakgaputsakgo chu tuku makgkatsikgo. Tlan nawanaw pi nachuna kinkakitaxtuniyan, chuna la talalinaw Jehová. Chu xlakata xtamakgtay uma libro, wix katsinitata lhuwa tuku masiya Biblia xlakata Jehová, la likatsi chu tuku lakapastaknit natlawa. Chu la aku katsiya pi Dios xlikana lama. Xlikana, oración tlawa pi wix tlan nawaniya mintlat xalak akgapun tuku lakapastaka chu tuku makgkatsiya kminaku. Chu chuna tlakg talakatsuwiniya Jehová (Santiago 4:8).

¿TUKU KINKASKINIKANAN NATLAWAYAW?

5. ¿La likatsiyaw pi Jehová ni kgaxmata putum oraciones?

5 ¿Kgaxmata Jehová putum oraciones? Kaʼakxilhti tuku kawanilh israelitas tiku ni xkgalhakgaxmatnankgo nema xlamakgolh kxkilhtamaku Isaías: «Maski tlawayatit lhuwa oraciones, ni kkgaxmata; mimakankan litatsamanit kgalhni» (Isaías 1:15). Wa xlakata, komo natlawayaw tuku xla ni lakgati ni katikgaxmatli kioracionkan. Uma limasiya pi xlakata nakgaxmata kioracionkan wi tuku talakaskin natlawayaw.

6. Xlakata Dios nakgaxmata kioracionkan, ¿tuku talakaskin nakgalhiyaw chu la litasiya pi kgalhiyaw?

6 Lu xlakaskinka nakgalhiyaw takanajla (kalikgalhtawakga Marcos 11:24). Apóstol Pablo tsokgli: «Komo ni kgalhiyaw takanajla, Dios nila tlan nakinkaʼakxilhan, xlakata katiwa tiku talakatsuwini Dios xlikanajlat pi lama chu xlikanajlat pi kasikulunatlawa tiku kakninaniputunkgo xliputumkan xnakujkan» (Hebreos 11:6TNM). Pero xlakata nakgalhiyaw xaxlikana takanajla ni kaj talakaskin nakatsiyaw pi Dios lama chu kgaxmata kioracionkan. Takanajla litasiya tuku tlawayaw. Chuna la linaw kilatamatkan liwana nalitasiya pi kgalhiyaw takanajla (Santiago 2:26).

7. 1) Xlakata lakgachixkuwiliyaw Jehová, ¿tuku xlakata liwana nalakapastakaw la nawaniyaw akxni tlawayaw oración? 2) ¿La limasiyayaw pi tatutsuwiyaw chu xlikana tuku wanaw akxni tlawayaw oración?

 7 Atanu tuku na skin Jehová, wa pi akxni natlawayaw oración natatutsuwiniyaw chu nalimasiyayaw pi xlikana tuku skimaw. ¿Ni xlikana pi anan lhuwa tuku xlakata natatutsuwiniyaw akxni natachuwinanaw Dios? Akxni latamanin kamaxkikan talakaskin natachuwinankgo mapakgsina lakgachixkuwilikgo, wa xlakata liwana lakapastakkgo la nawanikgo xlakata katsikgo pi kgalhi lhuwa limapakgsin. Nachuna, Jehová tlakg lakgchan nalakgachixkuwiliyaw chu wa xlakata liwana nalakapastakaw tuku nawaniyaw akxni natlawaniyaw oración (Salmo 138:6). Xlakata Jehová wa «Dios tiku kgalhi Xlipaks Litliwakga» (Génesis 17:1). Chuna la natachuwinanaw nalimasiyayaw pi katsiyaw pi akinin tlakg aktuju. Komo chuna natatutsuwiniyaw natlawa pi akxni natlawaniyaw oración nalimasiyayaw pi xlikana tuku nawaniyaw chu ni watiya watiya tuku nawaniyaw (Mateo 6:7, 8).

8. ¿La tlan lu naliskujaw tuku skinaw kkioracionkan?

8 Atanu tuku kilitlawatkan xlakata Dios nakgaxmata kioracionkan, wa lu naliskujaw tuku skinaw. Kaliwiliw uma, komo naskiniyaw Jehová kakinkamaxkin «nkinchujkan ntu xala chali chali», palha kiliskujatkan komo tlan tlawayaw akgtum taskujut nema natekgsaw (Mateo 6:11; 2 Tesalonicenses 3:10). Nachuna, komo naskiniyaw pi kakinkamakgtayan xlakata nialh natlawayaw tuku nitlan, ni kiliʼakxilhatkan tuku nakinkamatlawiputunan tuku nitlan (Colosenses 3:5). Pero maski xlakaskinka nakatsiyaw tuku talakaskin xlakata tlan natlawaniyaw oración Dios, na kilikatsitkan xtakgalhtin makgapitsi takgalhskinin xlakata oración.

 TAKGALHSKININ XLAKATA ORACIÓN

9. ¿Tiku natlawaniyaw oración, chu tiku kxtukuwani nalitlawayaw?

9 ¿Tiku natlawaniyaw oración? Jesús kamasiyanilh xtamakgalhtawakgen pi chuna natlawakgo oración: «KinTlatikan nti wilapi nkʼakgapun» (Mateo 6:9). Wa xlakata kajwatiya Jehová Dios natlawaniyaw oración. Pero Dios lakaskin pi kalakgachixkuwiliw tuku liyawanit xakstu xKgawasa, Jesucristo. Chuna la akxilhwi kcapítulo 5, Jehová makamilh Jesús unu kKatiyatni xlakata nakinkalakgmaxtuyan ktalakgalhin chu klinin (Juan 3:16; Romanos 5:12). Nachuna, liyawalh xaPuxku Sacerdote chu Juez (Juan 5:22; Hebreos 6:20). Wa xlakata, Biblia kinkawaniyan pi akxni natlawaniyaw oración Jehová kxtukuwani Jesús natlawayaw. Xla wa: «Kit wa ntiji, chu wa xlikanaj, chu wa latamat; ti ni katilakgalh xaTlat lapi ni kit nkimpalakata» (Juan 14:6). Xlakata nakgaxmatkan kioracionkan, xlakaskinka kaj Jehová natlawaniyaw oración chu kxtukuwani xKgawasa natlawayaw.

10. ¿Tuku xlakata ni lu xlakaskinka natatsokgostayaw akxni tlawayaw oración?

10 ¿Xlakaskinka natatsokgostayaw akxni natlawayaw oración? Ni lu xlakaskinka. Jehová ni kinkaskiniyan natatsokgostayaw akxni natlawayaw oración. Biblia kinkamasiyaniyan pi lhuwa la tlan natlawaniyaw oración. Tiku tlawama oración tlan natawila, natakilhputa, natatsokgosta o nataya (1 Crónicas 17:16; Nehemías 8:6; Daniel 6:10; Marcos 11:25). Tuku tlakg xlakaskinka, wa tuku wi kkinakujkan chu ni wa la natlawayaw oración kaj xlakata nakinkaʼakxilhkanan. Asta tlan kaj kkintalakapastaknikan nalitlawayaw oración xanikuta niku natawilayaw, akxni max wi tuku tlawamaw o akxni kgalhiyaw akgtum taʼakglhuwit. Max niti katikatsilh pi tlawapat mioración, pero Jehová nakgaxmata (Nehemías 2:1-6).

11. ¿Tuku tlan naskinaw nema maklakaskinaw akxni natlawayaw kioracionkan?

 11 ¿Tuku tlan naskinaw kkioracionkan? Biblia kinkawaniyan: «Mpi lapi wi mpala tu kskiniw, wa lantlata xtalakaskin, [Jehová] wa nakinkakgaxmatniyan» (1 Juan 5:14). Uma likatsiyaw pi tlan naskinaw tuku xtalakaskin Dios. ¿Lakaskin pi kawaniw tuku lilakgaputsayaw? ¡Xla kgaxmata tuku lilakgaputsayaw! Akxni tlawaniyaw oración Jehová xtachuna la chatum amigo tiku lu tlan talalinaw. Tlan “nawaniyaw tuku lakaskin kinakujkan” uma wamputun pi nawaniyaw tuku makgkatsiyaw (Salmo 62:8). Nachuna tlan naskiniyaw kakinkalimakgtayan xʼespíritu santo xlakata natlawayaw tuku tlan (Lucas 11:13). Nachuna, skiniyaw pi kakinkapulalin xlakata tlan nalaksakaw tuku natlawayaw chu kakinkamaxkin litliwakga xlakata natayaniyaw taʼakglhuwit (Santiago 1:5). Akxni tlawayaw talakgalhin, kaskiniw kakinkatapatin pero naliskiniyaw kxtamakamastan Cristo (Efesios 1:3, 7). Pero ni kaj naskinaw tuku akinin lakaskinaw, na kaskiw xlakata amakgapitsin, max kifamiliajkan o kinatalankan (Hechos 12:5; Colosenses 4:12).

12. ¿La natlawayaw pi xtalakaskin kinTlatkan xalak akgapun tlakg xlakaskinka nawan akxni natlawayaw oración?

12 Akxni natlawayaw kioracionkan pulana nawiliyaw tuku xla Jehová Dios. Anan lhuwa tuku xlakata nalimalankiyaw Jehová chu nalimaxkiyaw paxtikatsinit, xlakata tlan likatsi (1 Crónicas 29:10-13). Anta kMateo 6:9-13 natekgsaw oración nema Jesús wililh xaliʼakxilhtit, anta kinkamasiyanikanan pi kaskiw xasanto kaʼakxilhka xtukuwani Dios (kalikgalhtawakga). Alistalh taskin pi kamilh xLimapakgsin Dios chu katatlawalh xtalakaskin unu kKatiyatni chuna la tatlawama kʼakgapun. Kaʼakxilhwi pi Jesús pulana skilh katatlawalh xtalakaskin Jehová chu alistalh skilh tuku xmaklakaskin. Komo akinin na pulana naskinaw pi  kakgantaxtulh xtalakaskin Jehová akxni tlawayaw oración, nalimasiyayaw pi ni kaj akinin lakaskinaw tlan kakinkakitaxtunin.

13. ¿Tuku wan Biblia xlakata la namakgapala kioracionkan?

13 ¿La xlimakgapalat kioracionkan? Biblia ni kinkawaniyan la namakgapala kioracionkan nema tlawayaw xlakatin lhuwa latamanin o akxni kiakstukan tlawayaw. Tlan ni lhuwa kilhtamaku natlawayaw kioracionkan la akxni wayanaw, o tlakg lhuwa akxni waniyaw Jehová tuku makgkatsiyaw (1 Samuel 1:12, 15). Pero Jesús wa pi nitlan xtlawamakgolh xʼoracioneskan amakgolh lakchixkuwin tiku kaj xlimasiyaputunkgo pi tlan xlikatsikgo chu xlakaskinkgo pi xkaʼakxilhka (Lucas 20:46, 47). Ama ni tlawa pi kaks nalimalakawaniyaw Jehová. Xlakaskinka nalimasiyayaw pi xlikana tuku nawanaw akxni natlawayaw oración. Namakgapala kioracionkan chuna la tuku maklakaskinaw chu la makgkatsimaw.

Dios kgaxmata oraciones akxni natlawaniputunaw

14. Kawanti tuku wamputun tachuwin xalak Biblia «ni anan xtajaxni nkatlawatit mioracionkan» chu tuku lanka talakgalhaman kgalhiyaw.

14 ¿La xlimakglhuwa natlawayaw oración? Biblia kinkawaniyan: «Ankgalhin naxakgatlilakapinatit Dios», chu «ni anan xtajaxni nkatlawatit mioraciónkan» (Romanos 12:12; 1 Tesalonicenses 5:17; 1 Timoteo 5:5). Uma ni wamputun pi tantaku chu tantaskaka natlawayaw oración. Uma kilhchanima pi chali chali natlawaniyaw oración Jehová, namaxkiyaw tapaxtikatsinit xlakata tlan likatsi chu naskiniyaw kakinkapulalin, kakinkamakgapaxuwan chu kakinkamaxkin litliwakga. ¡Akgtum lanka talakgalhaman! Jehová kinkamaxkiyan talakaskin natlawaniyaw oración la xlimakglhuwa nalakaskinaw chu la xlimakgas nalakaskinaw. Komo paxtikatsiniyaw uma talakgalhaman xlakata tlan tachuwinanaw kinTlatkan xala kʼakgapun, nalimaxtuyaw kilhtamaku xlakata natachuwinanaw.

15. ¿Tuku xlakata akxni natlawakgoyaw oración nema tlawayaw kxlakatin amakgapitsin o kiakstukan nawanaw «amén»?

 15 ¿Tuku xlakata xlakaskinka nawanaw «amén» akxni namakgalhsputuyaw kioracionkan? Ama tachuwin wamputun «chuna kalalh», o «xlikana». Liʼakxilhtit nema wilakgolh kBiblia limasiya pi akxni namakgalhsputuyaw kioracionkan nema kiakstukan tlawayaw o kxlakatin amakgapitsin, xlakaskinka nawanaw «amén» (1 Crónicas 16:36; Salmo 41:13). Akxni wanaw «amén» kkintalakapastaknikan limasiyayaw pi xaxlikana tuku lichuwinaw.  Akxni chatum lataman tlawa oración kxlakatin amakgapitsin, akxni akinin wanaw amén (maski kaj kkintalakapastaknikan o natakgaxmata), limasiyayaw pi tlan akxilhaw tuku wa (1 Corintios 14:16).

¿LA KINKAKGALHTIYAN DIOS AKXNI TLAWANIYAW ORACIÓN?

16. ¿Tuku kilikanajlatkan akxni tlawayaw oración?

16 ¿Xlikana kinkakgalhtiyan Jehová akxni tlawaniyaw oración? ¡Xlikana kinkakgalhtiyan! Lhuwa tuku anan nema tlawa kakanajlaw pi xla “xKgaxmatna oración” chu kakgalhti lhuwa millones latamanin tiku tlawanikgo oración (Salmo 65:2). Chu lhuwa tuku limaklakaskin akxni nakinkakgalhtiyan.

17. ¿Tuku xlakata tlan nawanaw pi Dios limaklakaskin ángeles chu latamanin xlakata nakinkakgalhtiyan kioracionkan?

17 Jehová limaklakaskin ángeles chu latamanin tiku skujnikgo xlakata nakinkakgalhtiyan kioracionkan (Hebreos 1:13, 14). Lhuwa tiku skinikgolh tamakgtay xlakata naʼakgatekgskgo tuku wan Biblia, ni makgas titaxtulh kalakgapaxialhnalh chatum xlakskujni Jehová. Uma limasiya pi ángeles pulalinkgo taskujut akxni talichuwinan xlakata Tamapakgsin (Apocalipsis 14:6). Nachuna akxni  wi tuku maklakaskinaw, Jehová max nalimaklakaskin chatum kstalanina Cristo xlakata nakinkamakgtayayan (Proverbios 12:25; Santiago 2:16).

Jehová tlan nalimaklakaskin chatum kstalanina Cristo nakinkamakgtayayan chu chuna nakinkakgalhtiyan kioracionkan

18. ¿La limaklakaskin Jehová xʼespíritu santo chu xTachuwin xlakata nakakgalhti xʼoracionkan xlakskujnin?

18 Jehová na kalikgalhti xʼoraciones xlakskujnin espíritu santo chu xTachuwin, Biblia. Akxni skiniyaw tamakgtay xlakata nalakkaxtlawayaw akgtum taʼakglhuwit, xla tlan nakinkapulalinan chu nakinkalimatliwakglhan xʼespíritu santo (2 Corintios 4:7). Chu akxni tlawaniyaw oración xlakata tlan nalaksakaw tuku natlawayaw, makglhuwa kinkalikgalhtiyan Biblia. Max akxni likgalhtawakgayaw Biblia natekgsaw textos nema nakinkamakgtayakgoyan o likgalhtawakga xla kstalaninanin Cristo la uma libro. Nachuna, max nakinkamalakapastakayan textos xalak Biblia nema nakinkamakgtayayan. Max uma chuna nala, akxni anaw ktamakxtumit o akxni chatum kgolotsin xla congregación kinkastakyawayan xlakata lakaskin tlan kakinkakitaxtunin (Gálatas 6:1).

19. ¿Tuku liwana kilikatsitkan komo namin kilhtamaku namakgkatsiyaw pi Dios ni kinkakgalhtiyan kioracionkan?

19 Max namin kilhtamaku nalakpuwanaw pi Jehová makgapalama xlakata nakinkakgalhtiyan, pero uma ni wamputun pi ni kintikakgalhtin. Kalakapastakwi pi Jehová nakinkakgalhtiyan akxni xla naʼakxilha pi tlan. Xla liwana katsi tuku maklakaskinaw chu katsi la nakinkamaxkiyan, nixawa akinin. Makglhuwa xla kinkamakgxtakgan natlawayaw la wan Biblia: «Kaskintit», «kaputsatit», chu «kachuwinantit» (Lucas 11:5-10). Komo  chuna natlawayaw, nalimasiyaniyaw pi xlikana tuku skinaw chu kgalhiyaw xlikana takanajla. Nachuna, Jehová ni kintikakgalhtin kioracionkan chuna la akinin tlan naʼakxilhaw. Kawiliw akgtum liʼakxilhtit, komo natlawaniyaw oración xlakata kgalhiyaw taʼakglhuwit, max ni nakinkamapanuniyan ama taʼakglhuwit pero max nakinkamaxkiyan litliwakga xlakata natayaniyaw (kalikgalhtawakga Filipenses 4:13).

20. ¿Tuku xlakata nalimaklakaskinaw oración, uma lanka talakgalhaman?

20 Lu paxtikatsiniyaw tiku Tlawalh putum kakilhtamaku, xlakata xla lakatsu katawi tiku xakgatlikgo akxni tlawanikgo oración la xla lakaskin (kalikgalhtawakga Salmo 145:18). Tlan kalimaklakaskiw oración, uma lanka talakgalhaman. Komo chuna natlawayaw tlan nalimakgkatsiyaw xlakata nakatsiyaw pi tlan tlakg natalakatsuwinitilhayaw Jehová, tiku xKgaxmatna oración.