Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 6

¿Niku wilakgolh tiku nikgonita?

¿Niku wilakgolh tiku nikgonita?
  • ¿Tuku kinkaʼakgspulayan akxni niyaw?

  • ¿Tuku xlakata niyaw?

  • ¿Tlan nalimakgkatsiyaw nakatsiyaw tuku xaxlikana xlakata akxni nikan?

1-3. ¿Tuku takgalhskinin tlawakgo latamanin xlakata linin, chu tuku wankgo lhuwa takanajla?

AKGLHUWATA mil kata latamanin xakstukan katlawanikan umakgolh takgalhskinin nema lu xlakaskinka. Chu putum akinin katsiputunaw xlakata uma, maski alakatanu niku wilaw chatunu chatunu.

2 Kcapítulo 5 akxilhwi xlakata talakgmaxtut, akxni Jesús tamakamastalh, nema malakkilh tiji xlakata tlan nakgalhiyaw latamat nema ni kgalhi xlisputni. Nachuna, akxilhwi pi Biblia wan pi «nialh katiʼanalh linin», o nialhti katinilh (Apocalipsis 21:4). Pero xlakata nina chan ama kilhtamaku putum akinin niyaw. Chuna la lichuwinalh xaskgalala mapakgsina Salomón, «wantiku staknankgo katsikgo pi nanikgo» (Eclesiastés 9:5). Litsakgsayaw xlakata tlakg nalatamayaw, pero chuntiya kinkakgalhskinkanan tuku nakinkaʼakgspulayan akxni naniyaw.

3 Akxni lakgtasayaw xlakata nilh tiku lu xpaxkiyaw max nalakpuwanaw: «¿Tuku akgspulalh? ¿Patinama? ¿Kinkuentajtlawama? ¿Tlan nakmakgtaya? ¿Nakakxilhpara?» Takanajla nema wilakgolh xlikalanka kakilhtamaku lhuwa tuku wankgo. Makgapitsi masiyakgo pi tiku tlan likatsikgo ankgo kʼakgapun, chu tiku lixkajni likatsikgo ankgo niku kamapatinikan. Amakgapitsi wankgo pi anaw anta niku  wilakgolh xʼespíritus kifamiliajkan nema latamakgolh makgasa chu nikgonita, xlakata anta nakatatawilayaw. Wilakgolh amakgapitsi takanajla nema wankgo pi anaw niku wilakgolh putum tiku nikgonita xlakata nalakgaxokgoyaw tuku tlawanitaw chu alistalh skgatamparayaw kʼatanu makni.

4. ¿Tuku akxtum lakapastakkgo lhuwa takanajla xlakata tiku nikgonita?

4 Umakgolh takanajla wi tuku akxtum lakapastakkgo xlakata tiku nikgonita: wankgo pi akxni kintiyatliwakan niy wi tuku akgataxtu chu ni niy. Atsinu ni putum takanajla xalamakgasa chu xala uku, wankgo pi wi tuku kgalhiyaw nema nikxni niy chu wankgo pi tlanku akxilhnanaw, kgaxmataw chu lakapastaknanaw. Pero ¿la tlan chuna nawan? Wantuku makgkatsiyaw chu tuku lakapastakaw, anta minacha kkiʼakskititkan, chu akxni niyaw kiʼakskititkan nialh skuja. Kintalakapastaknikan chu la makgkatsiyaw nialh xakstukan staknankgo. Nialhla kgalhiyawku uma, xlakata akxni kiʼakskititkan niy, kintalakapastaknikan na sputa.

¿TUKU XLIKANA KINKAʼAKGSPULAYAN AKXNI NIYAW?

5, 6. Chuna la wan Biblia, ¿la wilakgolh tiku nikgonita?

5 Jehová, tiku Tlawalh kiʼakskititkan, katsi tuku kinkaʼakgspulayan akxni niyaw. Jehová katsi tuku xaxlikana, chu kxTachuwin, Biblia, kinkawaniyan la wilakgolh tiku nikgonita. Anta stalanka kinkamasiyaniyan uma: akxni chatum lataman niy, nialhtu lama. Tanu wamputun nikan chu tanu wamputun latamakan, wa xlakata tiku nikgonita nialh akxilhnankgo, nialh kgaxmatkgo chu ni lakapastaknankgo. Nitu kgalhiyaw nema latama o lamajku akxni kintiyatliwakan niy. Xlikana, ni kgalhiyaw akgtum espíritu nema ni niy. *

¿Niku alh lhkuyat?

 6 Akxni Salomón xwankgonita pi tiku staknankgo katsikgo pi nanikgo xla na wa: «Wantiku nikgonita nialh tuku katsikgo». Chu alistalh tlakg malaktanksalh uma xaxlikana tamakatsin akxni wa pi nila paxkinanaw nila lasitsiniyaw chu ni «anan taskujut chu nialhla tuku lakkaxwilikan, chu nipara takatsin nipara liskgalala anta kPutaknun» (kalikgalhtawakga Eclesiastés 9:5, 6, 10). Nachuna Salmo 146:4, Salmos Ixtatlincan ti Talipawan Dios, wan pi akxni wi tiku niy, «wakg tu ixlaklhkanit natlawa nak ixlatamat, kan xamakgtum lakgsputkgoj». Xlikana pi akinin niyaw, nialh latamayaw akxni kintiyatliwakan ni. Kilatamatkan xtachuna la klhkuyat kgantum vela. Akxni mixa, niniku an, kaj lakgsputa.

TUKU WA JESÚS XLAKATA TIKU NIKGONITA

7. ¿Tuku kinkamasiyaniyan xlakata tiku nikgonita tuku Jesús tamalakxtumilh?

7 Akxni lichuwinalh chatum xʼamigo nema xninita, Jesús wa la wilakgo tiku nikgonita. Pulana kawanilh kstalaninanin: «Wa kiʼamigojkan Lázaro lhtatama». Xlakan lakpuwankgolh pi klhtatama, xlakata xtatatla. Pero nichuna xwanit la xlakpuwamakgolh, xlakata Jesús alistalh kawanilh: «Ninita Lázaro» (kalikgalhtawakga Juan 11:11-14). Kaʼakxilhti pi Jesús tamalakxtumilh tiku niy la tiku jaxma chu lhtatama. Xʼamigo ni xʼanit kʼakgapun na nitu xwi anta niku wankan pi pupatin. Ni xʼanit niku wilakgolh ángeles nipara alh niku xwilakgolh xfamilias nema latamakgolh makgasa chu xnikgonita, nachuna ni lakachimpa la atanu lataman. Xlakata xninita, xjaxma xtachuna liwana klhtatanit, pero nitu xmanixnama. Amakgapitsi textos xalak Biblia na wankgo pi akxni niyaw tlan natamalakxtumiyaw la akxni lhtatayaw. Kawiliw akgtum liʼakxilhtit, akxni aktalamakgnikgolh Esteban, Biblia kinkawaniyan pi «lhtatalh» (Hechos 7:60TNM). Nachuna apóstol Pablo, tsokgli pi makgapitsi  latamanin nema xlamakgolh akxni xla na xlama «[k]lhtatakgonit klinin» (1 Corintios 15:6TNM).

Jehová katlawalh latamanin xlakata xlatamakgolh unu kKatiyatni chu nikxni xnikgolh

8. ¿Tuku xlakata lu liwana katsiyaw pi Dios ni xlakaskin pi latamanin kanikgolh?

8 ¿Xlakaskin Dios nanikgo latamanin? Ni, Dios ni xlakaskin. Jehová tlawalh chixku xlakata nalatama putum kilhtamaku unu kKatiyatni. Chuna la katsinitaw kʼuma libro, Dios kawililh xapulana kinatlatnikan kʼakgtum xakalipaxuw Katiyatni chu kamaxkilh xtiyatliwakan chuna la nikxni xtatatlakgolh. Wa xlakata tlan nawanaw pi Dios xlakaskin pi tlan xlatamakgolh. ¿Anan chatum xatlat xapaxkina tiku naʼakxilhputun pi xkamanan kapatinankgolh xlakata kgolonkgo chu xlakata nanikgo? ¡Xlikana pi ni! Nachuna, Jehová xkapaxki xkamanan chu xlakaskin pi lipaxuw xtawilakgolh kKatiyatni chu nikxni xnikgolh. Xlakata latamanin, Biblia wan: «Kxnakujkan [Jehová] kawilininit pi nalatamaputunkgo putum kilhtamaku» (Eclesiastés 3:11). Chuna xla, kinkatlawanitan xlakata nalatamaputunaw putum kilhtamaku, chu malakkinit tiji xlakata chuna nala.

¿TUKU XLAKATA NIYAW?

9. ¿Tuku wanilh Jehová Adán pi ni natlawa, chu tuku xlakata uma ni tuwa xwanit namakgantaxti?

9 ¿Tuku xlakata niyaw? Xlakata tlan nakatsiyaw, xlakaskinka naʼakxilhaw tuku lalh akxni kaj chatum chixku chu chatum puskat xlama unu kKatiyatni. Biblia kinkawaniyan: «Jehová Dios tlawalh pi kastakkgolh kkatiyatni kiwi nema lu stlan xtasiyakgo chu nema tlan wakan xtawakat» (Génesis 2:9). Pero wi tuku xkawanikanit ni natlawakgo.  Dios wanilh Adán: «Tlan nawaya xtawakat putum kiwi nema yakgo kjardín asta nakgalhkgasa. Pero xtawakat kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya, xlikana pi naniya» (Génesis 2:16, 17). Ni tuwa xtlawakgolh tuku xkawanikanit, xlakata xʼanankgo lhuwa kiwi nema xmasta xtawakat nema Adán chu Eva tlan xwakgolh. Pero kamaxkika talakaskin xlakata chuna xlimasiyakgolh pi xpaxtikatsinikgo Dios, tiku xkamaxkinit putum tuku xkgalhikgo chu na xkamaxkinit latamat nema ni xkgalhi talakgalhin.  Komo xkgalhakgaxmatnankgolh, na xlimasiyakgolh pi xlakgachixkuwilikgo xlimapakgsin xTlatkan xalak akgapun chu na xlimasiyakgolh pi xkgalhakgaxmatputunkgo tuku Dios xkawaninit.

10, 11. 1) ¿La lalh pi xapulana kinatlatnikan ni kgalhakgaxmatkgolh Dios? 2) ¿Tuku xlakata lu nitlan wa pi Adán chu Eva ni kgalhakgaxmatnankgolh?

10 Lu nitlan tuku tlawakgolh, xapulana kinatlatnikan laksakkgolh ni nakgalhakgaxmatkgo Jehová. Satanás limaklakaskilh tantum luwa chu kgalhskilh Eva: «¿Xlikana Dios kawanin pi ni nawayatit xtawakat putum kiwi nema yakgolh kjardín?». Eva kgalhtinalh: «Xtawakat kiwi nema yakgolh kjardín tlan kwayaw. Pero xlakata xtawakat kiwi nema wi kxitat jardín, Dios wanit: “Ni miliwatkan, ni, ni milixamatkan, komo chuna xtlawatit naniyatit”» (Génesis 3:1-3).

11 Satanás kgalhtinalh: «Ni katinitit. Xlakata Dios katsi pi kilhtamaku akxni nawayatit xtawakat, natalakki milakgastapukan chu la Dios nawanatit, nalakgapasatit tuku tlan chu tuku nixatlan» (Génesis 3:4, 5). Akgskgawini xlakaskin pi Eva kakanajlalh pi tlan xʼama kitaxtuni komo xwalh tawakat nema xwanikanit ni nawa. Satanás wa pi chuna, tlan xakstu xlaksakli tuku tlan chu tuku nixatlan, uma wamputun pi Eva tlan xtlawalh tuku xlakaskilh. Satanás na limawakalh pi Jehová kaj kaʼakgskgawilh xlakata tuku xʼama kaʼakgspula komo xwakgolh ama tawakat. Eva kanajlalh tuku wa Akgskgawini, wa xlakata tiyalh uma tawakat chu walh. Alistalh maxkilh xchixku chu na walh. Chuna la tlawakgolh, ni xlakata ni xkatsikgo tuku xtlawamakgolh. Xlakan liwana xkatsikgo pi xtlawamakgolh tuku Dios xkawaninit ni natlawakgo. Akxni wakgolh uma tawakat, ni kgalhakgaxmatkgolh uma ni xatuwa xlimapakgsin Dios, maski xkatsikgo pi ni xlitlawatkan. Chuna lakgmakgankgolh xTlatkan xalak akgapun chu na lakgmakgankgolh  xlimapakgsin. ¡Nila xkatapatika, xlakata ni lakgachixkuwilikgolh xapaxkina xMalakatsukinakan!

12. ¿Tuku tlan nakinkamakgtayayan xlakata nakatsiyaw la makgkatsilh Jehová akxni Adán chu Eva ni kgalhakgaxmatkgolh?

12 Kaliwiliw pi minkgawasa nema wix makgastaknita chu kuentajtlawanita, ni kgalhakgaxmatniyan chu limasiya pi ni tsinu lakgachixkuwiliyan chu ni paxkiyan. ¿Nixlikana pi nalilipuwana? Kaj kalakapastakti la lilipuwa Jehová akxni Adán chu Eva nialh kgalhakgaxmatkgolh.

Adán litlawaka pokgxni chu kpokgxni ampa akxni nilh

13. ¿Tuku wa Jehová pi xʼama akgspula Adán akxni xnilh, chu tuku wamputun uma?

13 Adán chu Eva ni kgalhakgaxmatkgolh Jehová, wa xlakata nialhla tlan xkamalatamanika chu ni xnikgolh.  Wa xlakata nikgolh, chuna la xkawanikanit. Nialh latamakgolh. Chuna, xlakan ni espíritus wankgolh chu ni ankgolh alakatanu. Chuna wan xtachuwin Jehová nema wanilh xapulana chixku akxni malakgaxokgelh xlakata ni kgalhakgaxmatnilh: «[Nataspitparaya] kkatiyatni, xlakata anta tiyaka. Xlakata pokgxni wix chu kpokgxni napimparaya» (Génesis 3:19). Dios xtlawanit Adán chu xlimaklakaskinit pokgxni xalak tiyat (Génesis 2:7). Akxni nina a xtlawakan Adán, Adán nitu xlama. Wa xlakata akxni Jehová wanilh Adán pi nataspita kpokgxni, xwanima pi xʼama lakgsputa. Xtachuna la pokgxni nema xlitlawakanit, Adán na nialh xkgalhilh latamat.

14. ¿Tuku xlakata niyaw?

14 Adán chu Eva tlan la uku xlatamakgolh, pero nikgolh xlakata laksakkgolh ni nakgalhakgaxmatkgo Dios chu lakgalhinankgolh. Chu niyaw xlakata akinin xkamanan Adán, tiku kinkamakgxtakgnin talakgalhin chu linin (kalikgalhtawakga Romanos 5:12). Talakgalhin tlan natamalakxtumiyaw la akgtum tajatat nema kinkamakgxtakgniyan kinatlatnikan chu ni anan tuku nalipaksaw. Uma kitaxtulh pi la uku niyaw chu uma ni kiʼamigokan chu ni akgtum tasikulunalin: uma la tiku kintalatlawanakan o tuku kinkamapatiniyan (1 Corintios 15:26). ¡Lu kilipaxtikatsinitkan Jehová pi makamastalh xkgawasa xlakata xkinkalakgmaxtun kxmakan uma kintalamakgasitsinkan!

¿LA MAKGTAYAYAN NAKATSIYA TUKU XAXLIKANA XLAKATA AKXNI TIKU NIY?

15. ¿Tuku xlakata tlan limakgkatsiyaw akxni katsiyaw tuku xaxlikana xlakata tiku nikgonita?

15 Lu tlan limakgkatsiyaw pi Biblia masiya xlakata la wilakgolh tiku nikgonita. Chuna la akxilhnitawa, ni patinankgo nipara kgalhikgo takatsanajwat. Ni kakapekuaniw, xlakata nila tuku nakinkatlawanikgoyan. Nila  kamakgtayayaw chu xlakan nila kinkamakgtayakgoyan. Nila kinkatachuwinankgoyan nipara akinin tlan katachuwinanaw. Wilakgo lhuwa tiku pulalinkgo takanajla wankgo pi tlan kamakgtayakgo tiku nikgonita, latamanin kanajlakgo chu kamaxkikgo tumin. Pero xlakata katsiyaw tuku xaxlikana, tlawa pi nila nakinkaʼakgskgawikgoyan.

16. ¿Tiku makgtanu xtamasiykan akglhuwa takanajla, chu la chuna tlawa?

16 ¿Tlan akxilha mintakanajla tuku wan Biblia xlakata tiku nikgonita? Tlakg lhuwa takanajla nitlan akxilhkgo. ¿Tuku xlakata? Xlakata Satanás makgtanu xlakata tuku masiyakgo. Satanás limaklakaskin nixaxlikana takanajla xlakata latamanin nakanajlakgo pi akxni niyaw, alakatanu nalatamaparayaw la espíritus. Nachuna, tamalakgxtumi atanu taʼakgsanin xlakata latamanin katamakgatlinikgolh Jehová Dios. ¿La chuna tlawa?

17. ¿Tuku xlakata kanajlakan pi anan pupatin nema nikxni mixa nitlan lichuwinan Jehová?

17 Chuna la akxilhnitawa, makgapitsi takanajla masiyakgo pi tiku lixkajni xlikatsikgo xlipan nakamapatinikan anta kpupatin. Uma takanajla nitlan lichuwinan Jehová, xlakata Jehová chatum Dios xapaxkina chu nikxni wi tiku xmapatinilh (kalikgalhtawakga 1 Juan 4:8). ¿Tuku xlakpuwani chatum chixku tiku mapuni xmakan xkgawasa klhkuyat kaj xlakata ni kgalhakgaxmatnilh? ¿Xlakgachixkuwili? ¿Xlakgapasputu? Xlikana pi ni. Xlikana xlakpuwanti: «Uma chixku lu nitlan likatsi». Wa ama tuku Satanás lakaskin pi kakanajlaw: pi Jehová kamapatini latamanin anta kpupatin xliputum kilhtamaku, akglhuwa millones chu millones kata.

18. ¿Tuku taʼakgsanin pi likakninanit tiku nikgonita kanajlakgo latamanin?

18 Satanás na limaklakaskin makgapitsi takanajla xlakata namasiyakgo pi tiku nikgonita, espíritus wankgo chu tiku  lamakgolh xlakaskinka nalakgachixkuwilikgo chu nakamalankikgo. Chuna la masiya uma takanajla, umakgolh espíritus tlan lakgtliwakga kiʼamigoskan nawankgo o na kintalamakgasitsinkan nawankgo. Lhuwa latamanin kanajlakgo uma takgsanin wa xlakata kapekuanikgo, kamalankikgo chu kakakninanikgo. Pero Biblia, masiya pi tiku nikgonita lhtatamakgolh chu wan pi kaj nakakninaniyaw xaxlikana Dios Jehová, tiku kinkatlawanitan chu kinkamaxkinitan putum tuku kgalhiyaw (Apocalipsis 4:11).

19. ¿Tuku na akgatekgsaw xlakata tuku masiya Biblia akxni katsiyaw tuku xlikana kaʼakgspula tiku nikgonita?

19 Akxni katsiyaw tuku xlikana kaʼakgspula tiku nikgonita, nialh kinkaʼakgskgawikgoyan xtaʼakgsanin nixaxlikana takanajla. Nachuna tlakg liwana akgatekgsaw o makgachakgxiyaw atanu tuku na masiya Biblia, la uma, pi nikxni naniyaw chu nalatamayaw kxakalipaxuw Katiyatni. Uma takgalhkgalhin tlakg kanajlayaw akxni katsiyaw pi tiku nikgonita ni katilatamakgolh alakatanu la espíritus.

20. ¿Tuku takgalhskinin naʼakxilhaw kcapítulo 7?

20 Xtitaxtunita akglhuwa ciento kata, akxni Job tlawalh uma takgalhskinin: «Komo chatum chixku niy ¿tlan nalatamapara?» (Job 14:14). Job wamputulh, ¿tlan nalatamaparakgo tiku nikgonita? Takgalhtin nema masta Biblia tlan limakgkatsiyaw, chuna la naʼakxilhaw kcapítulo 7.

^ párr. 5 Xlakata nakatsiya tuku wamputun espíritu, kaʼakxilhti tatakgatsin: «¿Kgalhikgo latamanin akgtum espíritu nema ni niy?».