Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 CAPÍTULO 18

Tamunut chu la talalinaw Dios

Tamunut chu la talalinaw Dios
  • ¿La tlawakgo tamunut xaxlikana kstalaninanin Cristo?

  • ¿Tuku militlawat xlakata tlan natamunuya?

  • ¿La tamakamastanikan Dios?

  • ¿Tuku tlakg xlakaskinka nema nalitamunuputuna?

1. ¿Tuku xlakata skilh kamunuka chatum xlakskujni mapakgsina xalak Etiopía?

«¡UWI NCHUCHUT! ¿Tu nkisokgaliy mpala nitlan naktamunuy?», chuna wa chatum xlakskujni mapakgsina xalak Etiopía kxapulana siglo. Chatum kstalanina Cristo nema wanikan Felipe aku xlimasiyaninit xTachuwin Dios pi Jesús wa Mesías nema xwankanit pi namin. Ama xlakskujni mapakgsina lu lakgatilh tuku masiyanika chu skilh kamunuka (Hechos 8:26-36).

2. ¿Tuku xlakata xlakaskinka lu xaxlikana xlakpuwanti natamunuya?

2 Komo liwana talikgalhtawakganita chatum xtatayana Jehová capítulos nema titaxtukgolha kʼuma libro, max na nakgalhskininamputuna: «¿Tu nkisokgaliy mpala nitlan naktamunuy?». Katsininitata pi Biblia wan pi latamanin nalatamakgo kxakalipaxuw Katiyatni (Lucas 23:43; Apocalipsis 21:3, 4). Na katsiyata la wilakgolh tiku nikgonita chu katsiya pi nakamalakastakwanikan (Eclesiastés 9:5; Juan 5:28, 29). Max titaxtunita tsinu kilhtamaku lata pina ktamakxtumit xla xtatayananin Jehová chu akxilhnitata pi xlakan tlawakgo tuku taskin kxaxlikana  takanajla (Juan 13:35). Chu wantuku tlakg xlakaskinka, wix max tlan talalipinata Jehová Dios.

3. 1) ¿Tuku limapakgsin kamaxkilh Jesús kstalaninanin? 2) ¿La tlawakgo kstalaninanin Cristo tamunut?

3 ¿La tlan nalimasiyaya pi skujnaniputuna Dios? Jesús kamapakgsilh kstalaninanin: «Kapitit, na kamasiyunikgotit xlipaks akgmakgat chixkuwin, chu nalimunukgotit» (Mateo 28:19). Jesús kinkawilinin liʼakxilhtit, xla na tamunulh. Pero ni mawakanika chuchut, na nipara kaj akmawakaka chuchut (Mateo 3:16). Tachuwin xagriego nema Biblia maklakaskin «tamunut», wamputun «matsankgenankan kchuchut». Wa xlakata chuna la masiya Biblia, akxni wi tiku tamunu xchatuminika matsankgekan kchuchut.

4. ¿Tuku limasiya akxni wi tiku tamunu?

4 Putum tiku tlan talalimputunkgo Jehová xlitamunutkan. Akxni wi tiku tamunu, limasiya kxlakatin amakgapitsin pi skujnaniputun Dios chu lipaxuwa akxni tlawa xtalakaskin  (Salmo 40:7, 8). Pero xlakata tlan natamunuya lhuwa tuku militlawat.

TALAKASKIN TAKATSIN CHU TAKANAJLA

5. 1) ¿Tuku pulana natlawaya xlakata tlan tamunuya? 2) ¿Tuku xlakata xlakaskinka tamakxtumit xla kstalaninanin Cristo?

5 Wix tlawapata tuku pulana talakaskin. ¿La chuna tlawapat? Lakgapaspat Jehová Dios chu Jesucristo xlakata max wi tiku limakgalhtawakgeman Biblia (kalikgalhtawakga Juan 17:3). Pero tlan tlakg nakatsiya. Kstalaninanin Cristo lakaskinkgo pi Dios «liwana nakamakatsini xtalakapastakni» (Colosenses 1:9). Tamakxtumit nema tlawakgo xtatayananin Jehová tlan lhuwa nalitamakgtayaya. Wa xlakata lu xlakaskinka nikxni namakgatsankgaya tamakxtumit (Hebreos 10:24, 25). Komo ankgalhin napina, nalakgapasa Dios.

Akgtum tuku lu xlakaskinka xlakata tlan natamunuya wa lakatanks nakatsiya xlakata xtachuwin Dios

6. ¿La xlilhuwa milikatsit tuku wan Biblia xlakata tlan natamunuya?

6 Liwana kilikatsitkan pi xlakata tlan natamunukan ni xlakaskinka nakatsiyaw putum tuku wan Biblia. Pero kalakapastakti pi maski ama xlakskujni mapakgsina xalak Etiopía tsinu tuku xkatsi, wi tiku makgtayalh xlakata naʼakgatekgsa makgapitsi xlakata tuku lichuwinan xTachuwin Dios (Hechos 8:30, 31). Nachuna wix lhuwaku tuku milikatsit. Tlan nawanaw pi wix nikxni putum nakatsikgoya xlakata Dios (Eclesiastés 3:11). Pero xlakata tlan natamunuya milikatsit tuku pulana masiyakan kBiblia chu nalilatapaya (Hebreos 5:12). Milikatsit xlakata la wilakgolh tiku nikgonita chu la xlilakaskinka xtukuwani Dios chu xTamapakgsin.

7. ¿Tuku nakgalhiya komo nalikgalhtawakgaya Biblia?

7 Pero ni kaj talakaskin nakgalhiya takatsin, xlakata «komo ni kgalhiyaw takanajla, Dios nila tlan nakinkaʼakxilhan» (Hebreos 11:6TNM). Biblia kinkawaniyan tuku tlawakgolh makgapitsi latamanin xalak Corinto: akxni  kgaxmatkgolh tuku xlichuwinamakgolh kstalaninanin Cristo, “tsukukgolh kanajlakgo chu tamunukgolh” (Hechos 18:8). Nachuna akxni nalikgalhtawakgaya Biblia, wix milikanajlat pi wa xTachuwin Dios nema xla mastalh. Nachuna milikanajlat pi Dios namakgantaxti putum tuku wanit chu tlan nalakgmaxtuyan xlakata xtamakamastan Jesús (Josué 23:14; Hechos 4:12; 2 Timoteo 3:16, 17).

KALICHUWINANTI TUKU XLIKANA MASIYA BIBLIA

8. ¿Tuku natlawa pi nalichuwinamputuna tuku katsinita?

8 Akxni tlakg tliwakga nawan mintakanajla, tlakg nalichuwinamputuna tuku katsinita (Jeremías 20:9). Naʼakxilha la nalichuwinamputuna xlakata Dios chu xtalakaskin (kalikgalhtawakga 2 Corintios 4:13).

Takanajla xlitlawat pi wix nalichuwinana xlakata tuku kanajlaya

9, 10. 1) ¿Tiku tlan pulana nakalixakgatliya xlakata tuku xlikana masiya Biblia? 2) ¿Tuku militlawat komo na lichuwinamputuna Dios chuna la lakkaxwilikgonit xtatayananin Jehová?

9 Max tlan pulana nakawaniya mifamilia xlakata tuku xlikana masiya Biblia, tiku katalalipina, mintalakatsu chu tiku kataskuja, pero liwana nakawaniya. Nachan kilhtamaku akxni wix max nakatatlawaputuna taskujut chuna la takaxwilikgonit xtatayananin Jehová xlakata la lichuwinankan Dios. Akxni nachan kilhtamaku, katachuwinanti tiku masiyaniman xlakata Biblia. Komo xla naʼakxilha pi wix tlantiya napina lichuwinana xtachuwin Dios, nalimaxtukan kilhtamaku xlakata minchatiykan natachuwinanatit chatiy lakgkgolotsin xalak congregación.

10 Chuna tlakg tlan nakalakgapasa lakgkgolotsin, tiku kuentajtlawakgo xkachikin Dios (Hechos 20:28; 1 Pedro 5:2, 3). Xlakan naʼakxilhkgo komo wix akgatekgsa tuku pulana masiyakan kBiblia chu komo kanajlaya tuku wan, komo lilatapaya xtastakyaw Dios chu xlikana xtatayana  Jehová wamputuna. Komo chuna, nawanikana pi makaʼakchipina tuku taskin xlakata nalichuwinana Dios pero nina tamunuya.

11. ¿Tuku max xlitlawatkan makgapitsi latamanin xlakata tlan nalichuwinankgo Dios?

11 Pero namin kilhtamaku lakgkgolotsin naʼakxilhkgo pi chatum lataman xlilakgpalit xlatamat xlakata tlan namakglichuwinan Dios. Max xlimakgxtakgat talismanin nema tsekg tlawama. Wa xlakata xlakaskinka pi wix nakgalhiya xatlan latamat chu ni natlawaya laklanka talakgalhin, la talakgxtumit xalimaxana, takgachitat chu ni nalimaklakaskina drogas chu alistalh naskina namaxkikana talakaskin nalichuwinana Dios chuna la tlawakgo xtatayananin Jehová (kalikgalhtawakga 1 Corintios 6:9, 10; Gálatas 5:19-21).

LIMASIYAKAN PI NITLAN LIMAKGKATSIKAN TALAKGALHIN CHU TALAKGPALIT

12. ¿Tuku xlakata talakaskin nitlan nalimakgkatsiya mintalakgalhin?

12 Xlakata tlan natamunuya, wi tuku tlakg militlawat. Apóstol Pablo wa: «Katalakgaspittayatit nchu, na katalakgpalitit kmintapuwankan, lakimpi nataxapay mintalakgalhinkan» (Hechos 3:19). Akxni chatum lataman xlikana nitlan limakgkatsi xtalakgalhin, nitlan limakgkatsi xliputum kxnaku. Pero ni kaj tiku linkgo akgtum nixatlan latamat wa nitlan nalimakgkatsikgo xtalakgalhinkan, nachuna tiku lakpuwankgo pi linkgo xatlan latamat. ¿Tuku xlakata? Xlakata putum latamanin lakgalhinanin chu maklakaskinaw kakinkatapatin Dios (Romanos 3:23; 5:12). Akxni wix nina xlikgalhtawakgaya Biblia, ni xkatsiya xtalakaskin Dios. Wa xlakata, nila xlipina milatamat la Dios lakaskin, ¿ni xlikana? La akxilha, xlakaskinka nitlan nalimakgkatsiya mintalakgalhin.

13. ¿Tuku kilhchanima natalakgpaliya?

 13 Akxni chatum latamanin nitlan limakgkatsinita xtalakgalhin alistalh natalakgpali o “talakgaspittaya”. Akxni wix natalakgpaliya nialh nalipina tiji nema xlipina xapulana. Tlan nawanaw pi ni kaj nitlan nalimakgkatsiya xlakata tuku nitlan tlawanita, namakgxtakga latamat nema xlipina xapulana. Ama kilhtamaku liwana natsukuya lakapastaka natlawaya tuku tlan. Xlakata tlan natamunuya pulana nitlan nalimakgkatsiya mintalakgalhin chu natalakgpaliya.

AKXNI TAMAKAMASTANIKAN DIOS

14. ¿Tuku na xlakaskinka litatlawat akxni nina tamunukan?

14 Wi tuku na xlakaskinka nema kilitlawatkan akxni nina a tamunuyaw: tamakamastanikan Jehová Dios.

¿Tlawata oración xlakata natamakamastaniya Dios?

15, 16. ¿Tuku wamputun natamakamastaniya Dios chu tuku chuna nakinkamatlawiputunan?

15 Tamakamastanikan Jehová wamputun pi natlawaniyaw akgtum oración niku nawaniyaw pi xlenkgalhin kaj wa nakakninaniyaw (Deuteronomio 6:15). Pero ¿tuku xlakata chatum natlawaputun akgtum lu xlakaskinka talakkaxlan? Kaliwiliw pi chatum kgawasa wani chatum tsumat pi tlakg lakgapasputun. Akxni tlakg tlan talalin chu akxilha la xtayat, tlakg lakgati. Chu nachan kilhtamaku akxni nawani pi tatamakgaxtokgputun. Xlikana pi akxni natatamakgaxtokga tlakg wi tuku nalakgataya. Pero xlakata paxki nawani pi natatamakgaxtokga.

16 Akxni lakgapasaw chu paxkiyaw Jehová, skujnaniputunaw, ni wanaw la xlilhuwa nakakninaniyaw. Latamanin tiku stalaniputunkgo xKgawasa Dios, Jesucristo, “xlakaskinka nialh nalakapastakkgo wantu kaj xakstukan lakgatikgo lipaxuwakgo” (Marcos 8:34TXS, 1999). Akinin tlawayaw uma, akxni ni makgxtakgaw pi tuku lakgatiyaw chu tuku tlawaputunaw natlawa pi ni nakgalhakgaxmataw  Dios. Wa xlakata akxni wix nina tamunuya, laksaknitata nawan pi natlawaya xtalakaskin Jehová (kalikgalhtawakga 1 Pedro 4:2).

LA NI NAPEKUANA XLAKATA LAKPUWANA PI NI NAMAKGANTAXTIYA

17. ¿Tuku xlakata makgapitsi pekuankgo natamakamastanikgo Dios?

17 Wilakgolh latamanin tiku nikxni tamakamastanikgo Jehová xlakata pekuankgo natlawakgo uma tuku lu xlakaskinka. Max lipekuankgo pi xlakata natamakamastanikgo Dios nakaskinikan kuenta xlakata tuku natlawakgo. Max lakapastakkgo pi wi tuku nitlan natlawakgo nema nalimakgalipuwankgo Dios chu wa xlakata ni tamakamastanikgo.

18. ¿Tuku natlawa pi natamakamastaniya Jehová?

18 Akxni tlakg napaxkiya Jehová, natamakamastaniputuna, chu kgoxa nalaya xlakata namakgantaxtiya tuku waninita (Eclesiastés 5:4). Akxni tamakamastaninitata, xlikana nalatapaputuna “chuna la skin Jehová xlakata namakgapaxuwaya xliputum tuku natlawaya” (Colosenses 1:10TNM). Tapaxkit nema kgalhiniya Dios natlawa pi ni tuwa namakgantaxtiya xtalakaskin. Max nachuna lakapastaka la lichuwinalh apóstol Juan: «Wa yuma liwi lantla napaxkiyaw Dios, mpi natlawaya ntu wan xlimapakgsin, na wa xlimapakgsin, ni tuwa» (1 Juan 5:3).

19. ¿Tuku xlakata ni napekuana natamakamastaniya Dios?

19 Dios ni skin pi tiku natamakamastani ni kakgalhilh talakgalhin. Jehová katsi tuku tlan tlawayaw chu tuku nila tlawayaw chu nikxni kinkaskiniyan tuku nila tlawayaw (Salmo 103:14). Xla namakgtayayan xlakata lakaskin tlan kakitaxtunin kmilatamat (kalikgalhtawakga Isaías 41:10). Liwana kakatsi pi komo xlipaks minaku nalipawana Jehová xla «namatsaja mintiji» (Proverbios 3:5, 6).

 KATAMUNU XLAKATA NALIMASIYAYA PI TAMAKAMASTANITA

20. Akxni tamakamastaninitata Jehová, ¿tuku xlakata xlikatsitkan amakgapitsi pi tamakamastanita?

20 Akxni lilakapastaka tuku akxilhnitawa max namakgtayayan nalakpuwana natamakamastaniya Jehová chu natlawaya oración xlakata nawaniya. Pero putum tiku xlikana paxkikgo Jehová wi tuku xlitlawatkan: “nalichuwinankgo kxlakatin amakgapitsin xlakata nalakgtaxtukgo” (1 Timoteo 6:12TNM). ¿La tlawakan uma?

Akxni tamunuyaw limasiyayaw pi «niyaw», kilhchanima pi makgxtakgaw xapulana kilatamatkan chu tsukuyaw latamayaw xlakata natlawayaw xtalakaskin Dios

21, 22. ¿La nalimasiyaya xlakatin amakgapitsin pi kgalhiya takanajla?

21 Kawani kgolotsin tiku kamakgtaya nalakkaxwilikgo  xtaskujutkan amakgapitsi lakgkgolotsin pi tamunuputuna. Xla nalakkaxtlawa pi makgapitsi lakgkgolotsin katlawanikgon makgapitsi takgalhskinin, xlakata tuku pulana masiyakan kBiblia. Komo umakgolh lakgkgolotsin naʼakxilhkgo pi tlan natamunuya, nawanikgoyan pi wix tlan natamunuya klanka tamakxtumit nema aku natlawakan. * Akxni tamunukan, tamasta  akgtum taʼakgchuwin niku wankan tuku wamputun tamunukan. Tiku mastama uma taʼakgchuwin katlawani akgtiy ni xatuwa takgalhskinin tiku tamunuputunkgo, chu xlakan pixlanka kgalhtinankgo. Chuna limasiyakgo “kxlakatin amakgapitsin” pi kgalhikgo takanajla.

22 Tamunut wa nema limasiya kxlakatin amakgapitsin pi wix pulana tamakamastaninitata Dios chu xtatayana Jehová wanti. Tiku tamunukgo xchatuminika kamatsankgakan kchuchut xlakata putum naʼakxilhkgo pi tamakamastaninit Jehová.

TUKU WAMPUTUN TAMUNUT

23. ¿Tuku wamputun tamunukan «kxtukuwini xaTlat, chu kxtukuwini xaKam, chu kxtukuwini spíritu santo»?

23 Jesús wa pi kstalaninanin xtamunukgolh «kxtukuwini xaTlat, chu kxtukuwini xaKam, chu kxtukuwini spíritu santo» (Mateo 28:19). Uma wamputun pi tiku natamunukgo lakgachixkuwilikgo xtamapakgsin Jehová chu lakgachixkuwilikgo tuku liwilikanit Jesús (Salmo 83:18; Mateo 28:18). Nachuna katsikgo tuku litaxtu xʼespíritu santo Dios o xlitliwakga nema liskuja (Gálatas 5:22, 23; 2 Pedro 1:21).

24, 25. 1) ¿Tuku kilhchani natamunuya? 2) ¿Tuku takgalhskinin nakatsiyaw xtakgalhtin?

24 Tamunukan ni kaj taʼakgtsikan kchuchut. Uma lu xlakaskinka tuku limasiya. Akxni namatsankgakana kchuchut kilhchani pi wix «niya», wamputun pi makgxtakga la xlipina xapulana milatamat. Chu akxni namakutukana kchuchut wamputun pi putum kilhtamaku nalatapaya xlakata natlawaya xtalakaskin Dios. Putum kilhtamaku nalakapastaka pi tamakamastaninita Jehová Dios, chu ni tamakamastaninita akgtum taskujut, ni chatum lataman, nipara tuku lakkaxwilikgonit  latamanin. Akxni tamakamastaya chu tamunuya chuna limatsukiya lu tlan natalalipina Dios (Salmo 25:14).

25 Pero natamunuya ni wamputun pi nalakgtaxtuya. Apóstol Pablo tsokgli: «Chuntiya kalimasiyatit tapekua chu talhpipit xlakata nakgalhiyatit lakgtaxtut» (Filipenses 2:12TNM). Tamunut kaj limatsukikan. Pero tawila uma takgalhskinin: ¿la tlan nikxni namakgxtakgaw Dios chu natamakgxtakgaw kxtapaxkit? Kxaʼawatiya capítulo xla uma libro nakatsiyaw xtakgalhtin uma takgalhskinin.

^ párr. 21 Akxni kamunukan atsinu ni putum tlawakan akxni xtatayananin Jehová kgalhikgo laklanka tamakxtumit akgatunu kata.