Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TATAKGATSIN

Palakachuwina Daniel wa tuku kilhtamaku xʼama chin Mesías

Palakachuwina Daniel wa tuku kilhtamaku xʼama chin Mesías

PALAKACHUWINA Daniel latamalh akxni xtsankga liwaka akgkitsis ciento kata akxni nina xlakachin Jesús. Pero Jehová makatsinilh xlakata tlan xtakatsilh tuku kilhtamaku xʼamaka laksakkan, o liyawakan Jesús, Mesías, o Cristo. Daniel wanika: «Milikatsit chu miliʼakgatekgsat pi akxni nataxtu tachuwin xlakata nalakkaxtlawakan chu natlawaparakan Jerusalén asta  Mesías Pulalina, natawila akgtujun semanas, chu tutumpuxumatiy semanas» (Daniel 9:25).

Kaʼakxilhwi la xʼama takatsi akxni xmasiyaka tiku Mesías. Pulana kakatsiw tuku kilhtamaku tsukulh taputlakge kilhtamaku nema xʼama titaxtu asta akxni xchilh Mesías. Tuku xlitachuwinanit kBiblia xwan pi ama kilhtamaku wa «akxni nataxtu tachuwin xlakata nalakkaxtlawakan chu natlawaparakan Jerusalén». ¿Tuku kilhtamaku “taxtulh tachuwin”? Achatum tiku tsokgli Biblia, wanikan Nehemías, wan pi uma tachuwin, akxni mastaka limapakgsin nakaxtlawaparakan patsaps nema xlimakgstili Jerusalén, taxtulh «xliʼakgpuxum kata akxni Mapakgsina Artajerjes xmapakgsinama» (Nehemías 2:1, 5-8). Lhuwa tiku tsokgkgolh tuku lalh makgasa wankgo pi xapulana kata akxni mapakgsinalh Artajerjes wa kata 474 akxni nina xmin Jesús (a.n.J.). Komo natlawayaw cuenta, katsiyaw pi xliʼakgpuxam kata akxni xmapakgsinama Artajerjes wa kata 455 a.n.J. Wa xlakata tuku xwanit palakachuwina Daniel xlakata Mesías, tsukulh kgantaxtu ama kata: 455 a.n.J.

Daniel lichuwinalh la xlimakgas xʼama titaxtu akxni xtaxtucha tachuwin asta akxni xchilh «Mesías tiku Pulalina». Tuku tatsokgnit kBiblia wan pi xʼama titaxtu «akgtujun semanas, chu tutumpuxumatiy semanas» chu xliputum litakgatsi 69 semanas. ¿La xlimakgas xʼama lititaxtu uma? Chuna la masiyakgo lhuwa Biblia, ni xkilhchanima semana nema akinin lakgapasaw xaʼakgtujun kilhtamaku, akgatunu kilhtamaku xla semana xkilhchanima akgtum kata. Na tlan wankan pi akgatunu semana xkilhchanima akgtujun kata. Judíos xalamakgasa xkatsikgo xlakata umakgolh semanas xla kata, o xaʼakgatujunan kata. Kawiliw liʼakxilhtit, xlakan xlakgachixkuwilikgo kata xla sábado xliʼakgtujunan kata (Éxodo 23:10, 11). Wa xlakata, 69 semanas tuku xlichuwinanit Biblia xkilhchanima 69 semanas xaʼakgatujunan kata, uma kichan 483 kata.

Chu la uku katlawaw kuentas. Komo putlekgayaw 483 kata chu tsukuyaw putlekgayaw kata 455 a.n.J., kichanaw kata 29 akxni xminita Jesús (a.x.J.), kata akxni Jesús tamunulh chu  Mesías litaxtulh (Lucas 3:1, 2, 21, 22). * ¿Nixlikana pi uma tuku xlitachuwinanit kBiblia kgantaxtulh la xwankanit?

^ párr. 3 Kata 455 asta kata 1 a.n.J., titaxtulh 454 kata. Chu kata 1 a.n.J. asta kata 1 a.x.J. uma kaj akgtum kata kitaxtu (xlakata ni anan kata cero). Chu kata 1 a.x.J. asta kata 29 titaxtulh 28 kata. Komo tlawayaw xakuenta uma pulaktutu números litakgatsi 483 kata. Jesús «kaka» xlatamat o makgnika kkata 33, akxni xtitaxtuma semana 70 xla kata (Daniel 9:24, 26). Komo tlakg katsiputuna xlakata uma, kaputsa kcapítulo 11 xla libro Prestemos atención a las profecías de Daniel, chu Perspicacia para comprender las Escrituras, vol. 2, págs. 1014-1017. Uma libros tlawakgonit xtatayananin Jehová.