Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

¿Tuku xlikana masiya Biblia?

 TATAKGATSIN

¿Tuku kilhchani «xaLanka Babilonia»?

¿Tuku kilhchani «xaLanka Babilonia»?

KLIBRO xalak Biblia wanikan Apocalipsis o Revelación, wilakgo tachuwin nema kaj limasiy limastaka (Apocalipsis 1:1). Anta lichuwinan chatum puskat tiku tanu tanu lakchixkuwin  katatalakgxtumi, uma puskat tatsokgnit kxmun «xaLanka Babilonia». Nachuna wan pi uma puskat kalaktawila «ntachixkuwitat» chu kachikinin (Apocalipsis 17:1, 5, 15). Chatum puskat nema kgalhi xtiyatliwa nila chuna xtlawalh, wa xlakata xaLanka Babilonia wi tuku atanu kilhchanima. Wa xlakata tawila akgtum takgalhskinin: ¿tuku kilhchanima?

Klibro xla Apocalipsis 17:18 kinkawaniyan pi akgtum «ntlanka [kachikin] ntu kgalhiy limapakgsin kxokgspun reyes xalak katiyatna». Tachuwin «kachikin» nema lichuwinan, kinkamalakpuwaniyan pi wa latamanin tiku makxtum takaxwilikgonit. Ni kajwatiya, uma «lanka kachikin» na kaʼakgchipanit «reyes xalak katiyatna». Wa xlakata Babilonia xaLanka wa tuku takaxwilinit nema kaʼakgchipanit lhuwa latamanin xlikalanka Katiyatni. Tlan nawanaw pi putum uma akgtum tamapakgsin xlikalanka Katiyatni. Pero ¿tukuya tamapakgsin xʼama wan? Kilhchani akgtum tamapakgsin xla takanajla. Kaʼakxilhwi tuku xlakata chuna kinkamalakpuwanikgoyan makgapitsi textos xla Apocalipsis.

Anan tamapakgsin xla políticos, xla laklanka stananin chu xla takanajla. Katsiyaw pi Babilonia xaLanka nila akgtum tamapakgsin xla política nawan, xlakata xtachuwin Dios wan pi «mapakgsinanin xalak katiyatni» tatalakgxtumikgolh Babilonia xaLanka. Xlakata tlawanit talakgxtumit nema ni xlitatlawat kilhchanima pi katalakkaxlanit mapakgsinanin xalak katiyatni chu lhuwa tuku tlawanit xlakata nakgalhi litliwakga chu kamatlawinit tuku xla lakaskin. Wa xlakata limapakuwikan «puskat tiku sta xmakni chu lu lakgapaskan» (Apocalipsis 17:1, 2TNM; Santiago 4:4).

Biblia wan pi akxni uma puskat namalakgsputukan, nalilipuwankgo «stananin xala katiyatna», uma wamputun putum stananin nema talakkaxtawilakgonit. Chuna, liwana likatsiyaw pi xaLanka Babilonia ni akgtum tamapakgsin xla laklanka stananin. Nachuna textos xalak Biblia lichuwinan pi mapakgsinanin chu stananin «makgat» naʼakxilhkgo (Apocalipsis 18:3, 9, 10, 15-17). Wa xlakata tlan nawanaw pi xaLanka  Babilonia ni akgtum tamapakgsin xla política chu na ni akgtum tamapakgsin xla laklanka stananin, uma akgtum tamapakgsin xla takanajla.

Atanu tuku na nalikatsiyaw pi kilhchanima akgtum tamapakgsin xla takanajla wa uma: wankan pi xla kaliʼakgskgawi kachikinin “xtaskuwan” (Apocalipsis 18:23). Putum tanu tanu taskuwan nema anan, wa makilhtsukikgonit demonios. Wa xlakata Biblia limapakuwi xaLanka Babilonia «xputawilhkan Akgskgawini» (Apocalipsis 18:2; Deuteronomio 18:10-12). Nachuna, akxilhaw la uma tamapakgsin lu ni kaʼakxilhputun xaxlikana takanajla, xlakata kaputsastalani «xpalakachuwinanin Dios» chu tiku «xasantujlanin» (Apocalipsis 18:24). Lu ni kaʼakxilhputun xaxlikana takanajla, wa xlakata lhuwa kaputsastalani «xtatayananin Jesús» chu kamakgni (Apocalipsis 17:6). Uma liwana likatsiyaw pi: Babilonia xaLanka wa kilhchani tamapakgsin xlikalanka kakilhtamaku xla nixaxlikana takanajla, anta unu na makgtanumakgolh putum takanajla nema ni kgalhakgaxmatkgo Jehová Dios.