Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Lakwan tamakatsin masta Dios

 Takgalhtawakga 13

¿Tuku masiya Biblia pi naʼakgspula takanajla?

¿Tuku masiya Biblia pi naʼakgspula takanajla?

1. ¿Tlan putum takanajla?

Kputum takanajla wilakgolh tiku ni tlanka kamakgkatsikan chu xlikana katsiputunkgo. Chu lu tlan tamakatsin xlakata katsiyaw pi Dios kapaxki chu lu lanka xtapalh kaʼakxilha. Pero lu nitlan pi takanajla lhuwa tuku nitlan tlawakgonit (2 Corintios 4:3, 4; 11:13-15). Knoticias kgaxmataw pi makgapitsi takanajla katatayakgo tiku makgninankgo xlakata namakgapekuanankgo, tiku kamakgnikgo lhuwa latamanin, makgtanukgo kʼguerra chu kalikgamanankgo laktsu kamanan. ¡Uma kamakgalipuwan tiku xlikana katsiputunkgo xlakata Dios! (Kalikgalhtawakga Mateo 24:3-5, 11, 12.)

Xaxlikana takanajla malanki Jehová pero ni xaxlikana takanajla tlawa pi nitlan nalichuwinankan. Masiya taʼakgsanin xlakata Dios, xlakata la wilakgolh tiku nikgonitta chu masiya tuku nitu wi kBiblia. Pero Jehová lakaskin pi latamanin nakatsikgo tuku xaxlikana xlakata xla. (Kalikgalhtawakga Ezequiel 18:4 chu 1 Timoteo 2:3-5.)

2. ¿Tuku masiya Biblia pi naʼakgspula takanajla?

Dios nitlan kaʼakxilha xpulalinanin takanajla tiku wankgo pi paxkikgo, pero paxkikgo xkakilhtamaku Satanás (Santiago 4:4). Biblia limapakuwi putum nixaxlikana takanajla «xatlanka Babilonia», uma tukuwani wa kilhchani kachikin niku kilhtsukulh nixaxlikana takanajla akxni xtitaxtunita Munkaklat kxkilhtamaku Noé. Nialh makgas Dios kaj lakapala nakamasputu takanajla tiku kaʼakgskgawikgo chu katlawanikgo tuku nitlan latamanin. (Kalikgalhtawakga Apocalipsis [Revelación] 17:1, 2, 5, 16, 17 chu 18:8.)

 Pero Jehová kalakapastaka latamanin tiku tlan likatsikgo chu makgtapakgsikgo knixaxlikana takanajla nema wilakgolh xlikalanka kakilhtamaku chu kamamakxtumima. ¿La tlawama? Kamasiyanima tuku xaxlikana. (Kalikgalhtawakga Miqueas 4:2, 5.)

Xaxlikana takanajla tlawa pi makxtum natawilayaw

3. ¿Tuku xlitlawatkan latamanin tiku tlan likatsikgo?

Jehová kapaxki latamanin tiku paxkikgo tuku xaxlikana chu tlawaputunkgo tuku tlan. Wa xlakata kawani pi kamakgxtakgkgolh ni xaxlikana takanajla. Komo xlikana paxkikgo nalakgpalikgo xlatamatkan xlakata namakgapaxuwakgo. (Kalikgalhtawakga Apocalipsis 18:4.)

Ksiglo I, akxni apóstoles lichuwinankgolh xalakwan xalaksasti, lhuwa latamanin tiku tlan likatsikgo xatapaxuwan makgamakglhtinankgolh uma tamakatsin. Jehová kamasiyanilh la xlinkgolh xlatamatkan xlakata xpaxuwakgolh, xtlawakgolh tuku tlan chu xkgalhikgolh takgalhkgalhin. Chuna la xlakan, akinin na tlan kilimakglhtinatkan tamakatsinin xalak Biblia chu pulana kiliwilitkan Jehová. (Kalikgalhtawakga 1 Tesalonicenses 1:8, 9 chu 2:13.)

Jehová xatapaxuwan kamakgamakglhtinan tiku makgxtakgkgo nixaxlikana takanajla chu makgtanukgo kxaxlikana takanajla. Putum tlan talalinkgo Jehová, lapaxkikgo chu kgalhikgo takgalhkgalhin pi nalatamakgo xliputum kilhtamaku. ¿Na makglhtinamputuna umakgolh tasikulunalin? (Kalikgalhtawakga Marcos 10:29, 30 chu 2 Corintios 6:17, 18.)

4. ¿Tuku natatlawa Dios xlakata naʼanan takaksni chu tapaxuwan xlikalanka Katiyatni?

Akxni Jehová namasputu nixaxlikana takanajla, xatapaxuwan nalatamayaw kkakilhtamaku. Takanajla nialh katikaʼakgskgawilh latamanin chu nialh katikamapitsilh. Putum latamanin nakakninanikgo xaxlikana Dios. ¿Ni lakpuwana pi uma lu tlan tamakatsin? (Kalikgalhtawakga Apocalipsis 18:20, 21 chu 21:3, 4.)