Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Lakwan tamakatsin masta Dios

 Takgalhtawakga 14

¿Tuku xlakata talakkaxtawilakgonit xlakskujnin Dios?

¿Tuku xlakata talakkaxtawilakgonit xlakskujnin Dios?

1. ¿Tuku xlakata Dios lakkaxwililh xamakgan kachikin Israel?

Dios lakkaxwililh xkamanan Abrahán xlakata akgtum kachikin xwankgolh chu kamaxkilh limapakgsin. Uma kachikin nema limapakuwilh Israel, xkuentajtlawakgolh xaxlikana takanajla chu xtachuwin Dios (Salmo 147:19, 20). Xlakata uma, lhuwa latamanin xlikalanka Katiyatni tlan kakitaxtuni. (Kalikgalhtawakga Génesis 22:18.)

Dios kalaksakli israelitas xlakata xtatayananin xwankgolh. Tuku titaxtulh uma kachikin limasiya tuku tlan kitaxtu akxni kgalhakgaxmatkan xlimapakgsin Dios (Deuteronomio 4:6). Xpalakata israelitas amakgapitsi latamanin tlan lakgapaskgo xaxlikana Dios. (Kalikgalhtawakga Isaías 43:10, 12.)

2. ¿Tuku xlakata talakkaxtawilakgonit xaxlikana kstalaninanin Cristo?

Akxni Israel, akgtum kachikin xatalaksakni xwanit, nialh tlan talalinkgolh Dios, Jehová wililh xlakgxokgo congregación xla kstalaninanin Cristo (Mateo 21:43; 23:37, 38). Wa xlakata, la uku xaxlikana kstalaninanin Cristo wa tiku xtatayananin Jehová litaxtukgo chu nialh wa israelitas. (Kalikgalhtawakga Hechos 15:14, 17.)

Jesús lakkaxwililh xlakata kstalaninanin xlichuwinankgolh Jehová chu xkamasiyanikgolh latamanin xlikalanka Katiyatni (Mateo 10:7, 11; 24:14; 28:19, 20). La uku, kxaʼawatiya kilhtamaku tatlawama uma taskujut xlikalanka Katiyatni. Jehová tlawama pi lhuwa millón latamanin tiku wilakgolh ktanu tanu kachikinin namakgtapakgsikgo kxaxlikana takanajla (Apocalipsis [Revelación] 7:9, 10). Xlakata takaxtawilakgonit kʼuma kachikin xaxlikana kstalaninanin Cristo tlan lamatliwakglha chu lamakgtaya. Putum watiya tuku kamasiyanikan akxni ankgo ktamakxtumit. (Kalikgalhtawakga Hebreos 10:24, 25.)

 3. ¿La lakatsukukgolh xtatayananin Jehová xala uku?

Xtatayananin Jehová lakatsukukgolh kkata 1870. Makgapitsi tiku xkalilakgapaskan xlikgalhtawakgananin Biblia tsukukgolh tekgsparakgo tuku xaxlikana masiya Biblia nema makgasa nialh xlakapastakkan. Xkatsikgo pi Jesús xlakkaxwilinit congregación xlakata xlichuwinankgolh Dios, wa xlakata tsukukgolh lichuwinankgo xlakata xTamapakgsin Dios xlikalanka katiyatni. Kkata 1931 kawilinika tukuwani xtatayananin Jehová. (Kalikgalhtawakga Hechos 1:8; 2:1, 4, 11 chu 5:42.)

4. ¿La talakkaxtawilakgonit xtatayananin Jehová?

Ksiglo I, congregaciones xla kstalaninanin Cristo tiku xwilakgolh xlikalanka Katiyatni lu litamakgtayakgolh xlakata xwilakgolh lakgkgolotsin tiku xpulalinankgo chu xliʼakxilhkgo Jesús la xʼAkgxakga congregación (Hechos 16:4, 5). Nachuna, la uku xtatayananin Jehová kamakgtaya Lakgkgolotsin tiku Pulalinkgo xTatayananin Jehová chu umakgolh makgasa skujnanimakgolh Dios chu kuentajtlawakgo sucursales nema wilakgolh xlikalanka katiyatni. Ksucursales, kamatitaxtikan kʼatanu tachuwin likgalhtawakga, katlawakan chu kamaʼakgpitsikan kliwaka akgchaxan ciento tachuwin. Limaklakaskinkgo Biblia xlakata nakamatliwakglhkgo chu nakapulalinkgo liwaka cien mil congregaciones chu kʼakgatunu congregación wilakgolh lakchixkuwin tiku xatapaxuwan pulalinkgo xkachikin Dios. (Kalikgalhtawakga 1 Pedro 5:2, 3.)

Xtatayananin Jehová talakkaxtawilakgonit xlakata nalichuwinankgo xatlan tamakatsin nema masta Biblia chu na makgalhtawakganankgo. Chuna la xtlawakgo apóstoles, na lichuwinankgo Dios kʼakgatunu chiki (Hechos 20:20). Na kamasiyanikgo xlakata Biblia tiku xlikana katsiputunkgo tuku xaxlikana. Pero ni kaj litaxtukgo akgtum kachikin; wata na litaxtukgo la akgtum familia tiku lapaxkikgo chu xapaxkina xTlatkan kakuentajtlawa (2 Tesalonicenses 1:3). Chu xlakata uma kachikin makgapaxuwaputunkgo Dios chu kamakgtayaputunkgo amakgapitsin, uma familia lu paxuwakgo. (Kalikgalhtawakga Salmo 33:12 chu Hechos 20:35.)