Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Lakwan tamakatsin masta Dios

 Takgalhtawakga 8

¿Tuku xlakata Dios masta talakaskin kaʼanalh tuku nitlan chu tapatin?

¿Tuku xlakata Dios masta talakaskin kaʼanalh tuku nitlan chu tapatin?

Kilhtamaku nema Dios kamaxkinit talakaskin namapakgsinankgo lakchixkuwin, litasiyanit pi nila lakkaxtlawakgo taʼakglhuwit

1. ¿La lakatsukulh tuku nitlan?

Lakatsukulh tuku nitlan kKatiyatni akxni Satanás wa xapulana takgsanin. Uma ángel tlan xlikatsi chu ni xkgalhi talakgalhin, pero «ni tamakgxtakgli kxaxlikana» (Juan 8:44NM). Tsukulh lakpuwan pi wa xkakninanika, nema kajwatiya kiMalakatsukinakan lakgchan. Akgskgawilh Eva xapulana puskat xlakata wa xkgalhakgaxmatli nixawa Jehová. Adán na ni kgalhakgaxmatli Dios. Tuku tlawakgolh liminit lhuwa tapatin chu linin. (Kalikgalhtawakga Génesis 3:1-6, 19.)

Akxni Satanás wanilh Eva pi ni xkgalhakgaxmatli Dios, tsukulh talalakatawaka. Lakpuwa pi ni lakgchan namapakgsinan Jehová, Dios xala talhman. Lhuwa tiku tlawamakgolh la Satanás lakatayamakgolh xTamapakgsin Dios chu wa xlakata la uku litaxtu «xapuxku yunu nkatuxawat». (Kalikgalhtawakga Juan 14:30 chu 1 Juan 5:19.)

2. ¿Nitlan xwanit tuku tlawalh Dios?

Tuku tlawanit Jehová lu tlan. Xapulana latamanin chu ángeles, tlan xkgalhakgaxmatkgo Dios putum tuku xkawani (Deuteronomio 32:4, 5). Dios kinkatlawan xlakata tlan xlaksakwi tuku tlan chu tuku nitlan. Chuna la kinkatlawan kgalhakgaxmataw xlakata paxkiyaw. (Kalikgalhtawakga Santiago 1:13-15 chu 1 Juan 5:3.)

3. ¿Tuku xlakata Dios mastanit talakaskin kaʼanalh tapatin?

Jehová mastama talakaskin pi kaj ni lhuwa kilhtamaku nalakatayakan xtamapakgsin. ¿Tuku xlakata? Xlakata nalimasiya pi ni anan tamapakgsin nema nakamakgtaya latamanin komo ni wa Jehová nawili (Eclesiastés 7:29; 8:9). Uma akgchaxan mil kata nema titaxtunita  litasiyanit: pi mapakgsinanin xalak Katiyatni nila masputukgo guerra, tiku lakatsalakgo limapakgsin, tiku latlawani tuku nitlan chu tajatat. (Kalikgalhtawakga Jeremías 10:23 chu Romanos 9:17.)

Pero komo namastayaw talakaskin pi Dios kakinkapulalin lu tlan nakinkakitaxtuniyan (Isaías 48:17, 18). Nialh makgas Dios nakamasputu mapakgsinanin. Kajwatiya tiku natatayakgo xTamapakgsin Dios nalatamakgo kKatiyatni (Isaías 11:9). (Kalikgalhtawakga Daniel 2:44.)

Tuku tlawayaw limasiya komo lakaskinaw o ni lakaskinaw pi Dios nakinkamapakgsiyan

4. ¿La kinkamakgtayayan xlakata ni lakapala sitsi Jehová?

Satanás wa pi ni anan chatum lataman tiku ni xmakgatsankgananilh Dios. Xlakata Jehová mastamajku kilhtamaku tlan nalimasiyayaw pi Akgskgawini xaʼakgsanina chu wa tatayayaw xtamapakgsin Dios chu ni wa xla latamanin. (Kalikgalhtawakga Job 1:8-12 chu Proverbios 27:11.)

5. ¿La tatayayaw Dios?

Pulana, kilikatsinitkan la lakaskin nakakninaniyaw chu naputsayaw xaxlikana takanajla nema xtamasiy takilhtinit kBiblia chu chuna nalinaw kilatamatkan (Juan 4:23). Chuna la Jesús, komo ni namakgtanuyaw kpolítica chu kʼguerras, nalimasiyayaw pi lakgmakganaw xtamapakgsin Satanás. (Kalikgalhtawakga Juan 17:14.)

Satanás limaklakaskin xlitliwakga xlakata nakamatlawi latamanin talakgxtumit xalimaxana chu nitlan tayat. Komo ni tlawayaw umakgolh tayat max kiʼamigoskan o kifamiliajkan nakinkalikgalhkgamanankgoyan o max nitlan tuku nakinkatlawanikgoyan (1 Pedro 4:3, 4). Komo chuna nakinkaʼakgspulayan, kakatalaliw tiku paxkikgo Dios chu kakgalhakgaxmatwi xatlan xlimapakgsin. Chuna nalimasiyayaw pi Satanás kaj akgsaninalh akxni wa pi nitiku nakgalhakgaxmata Dios akxni natitaxtu tuku nitlan. (Kalikgalhtawakga 1 Corintios 6:9, 10 chu 15:33.)

Xlakata Dios lu kinkapaxkiyan limasiya pi namasputu tapatin chu tuku nitlan. Tiku nakanajlakgo chu natatayakgo Dios, putum kilhtamaku nalatamakgo kKatiyatni. (Kalikgalhtawakga Juan 3:16.)