Saludo nema maxkikan bandera. Xtatayananin Jehová katsiyaw pi maxkikan saludo bandera chu akxni tlinikan limasiyakan pi kakninanikan, xlakata lakpuwankgo pi max lakgmaxtu lanka kachikin o tiku kapulalin kachikin chu ni wa Dios maxkikgo kakni (Isaías 43:11; 1 Corintios 10:14; 1 Juan 5:21). Chatum mapakgsina tiku na maxkika kakni wa Nabucodonosor xalak Babilonia. Xlakata xkamasiyaniputun xkachikin pi lanka mapakgsina xwanit chu xlimasiyaputun xtakanajla, tlawalh lu lanka imagen chu mapakgsinalh pi putum xtakilhputanikgolh akxni xkgaxmatkgolh tatlakgni chu tatlin.  Pero kgalhtutu hebreos, Sadrac, Mesac chu Abednego, ni maxkikgolh kakni ama imagen, maski xkamakgnika (Daniel, capítulo 3).

¿Tuku tlan nawanaw xlakata tuku lama la uku? Historiador Carlton Hayes kxlibro El nacionalismo: una religión, lichuwinan xlakata «takaknin nema limasiyakan pi kakninanikan akgtum kachikin xala uku» chu wan: «Bandera nema litalakgapasa akgtum kachikin wa tuku tlakg xlakaskinka chu kakninanikan. [...] Lakchixkuwin taʼakgxtunankgo akxni titaxtu bandera, tiku tsokgnankgo katsokgnikgo tuku tlan nakalikilhtlinikan, kamanan kilhtlinikgo». Na wan pi kakninanikan kachikin kgalhi «kilhtamaku nema xasanto», la 4 xla julio, kilhtamaku akxni Estados Unidos akstu tsukulh tapakgsi, na kgalhi «ksantos chu xlakgmaxtunakan» chu «xtemplojkan» o niku kakninankgo. Nachuna Diario Oficial de la Federación, xalak México wan pi «Escudo, Bandera chu Himno Nacional, wa ama tuku talilakgapasa kinkachikinkan» chu wan pi «nakakninaniyaw tuku litalakgapasa kinkachikinkan». Makgasa maktum libro lichuwinalh, «Bandera, chu cruz xasanto» (The Encyclopedia Americana).

Chu nina makgas, ama libro na lichuwinalh pi tuku kilhtlinikan akgtum kachikin «limasiyakan la paxkikan akgtum kachikin niku skinikan Dios xlakata nakapulalin chu nakamakgtaya xkachikinkan o tiku kapulalinkgo». Wa xlakata xtatayananin Jehová ni akgtsankgakgonit akxni wankgo pi saludarlikan bandera chu tlikan akgtum himno limastakan takaknin. Kxlibro Genio y figura del norteamericano, makgalhtawakgana D. W. Brogan lichuwinalh lhuwa taʼakglhuwit nema kalakkaxtlawanika lakgkgawasan tiku xtatayananin Jehová xlakata ni saludarlikgo chu ni tlinikgolh Bandera xalak Estados Unidos chu ni wankgolh pi nikxni namakgatsankgananikgo, uma tuku wa: «Niku wilakgolh xalakpuxku tiku lakkaxtlawakgo taʼakglhuwit, wankgonit [akxni lakkaxtlawakgolh akglhuwa taʼakglhuwit] pi uma takaknin nema tlawakan xtachuna takanajla».

 Xtatayananin Jehová liwana katsiyaw pi maski ni makgtlawayaw uma, xlakata ni wa tuku masiya Biblia, ni kawaniyaw amakgapitsin na ni natlawakgo komo chuna lakaskinkgo. Nachuna kaks tayayaw chu ni likgalhkgamananaw bandera o atanu tuku lilakgapaskan kachikin, chu kakgalhakgaxmataw «mapakgsinanin» xlakata «wa Dios skujnanikgoy» (Romanos 13:1-4). Na kgalhakgaxmataw xtastakyaw Biblia niku wan pi nakapalakaskinaw kʼoración «napuxkun, chu xlipaks nti nkgalhikgoy xlimapakgsinkan». Pero akxni chuna tlawayaw, skinaw nakinkamaxkikgoyan talakaskin «ntlan nalatamayaw, ni [naʼ]anan ntasokgalin, chu nalimaxkiyaw nkakni Dios, chu akgstitum naliliyanaw nkilatamatkan» (1 Timoteo 2:2).

Votación. Xaxlikana kstalanina Cristo ni kawanikgo amakgapitsin ni kavotarlinankgolh. Ni talalakataki chatum tiku mapakgsina wamputun chu ni wankgo pi ni natapakgsinikgo tiku natlajanankgo. Pero nipara tsinu makgtanukgo kpolítica (Mateo 22:21; 1 Pedro 3:16). Komo kʼakgtum lanka kachikin wankan pi xafuerza putum kavotarlinankgolh o tasiya pi wi tuku nitlan nakatlawanikan tiku ni ankgo votarlinankgo, ¿tuku natatlawa? Komo xtalakapastakni maxki talakaskin, tlan naʼan niku votarlinamaka. Natlawakgo la Sadrac, Mesac chu Abednego, tiku nachuna titaxtukgolh, xlakan ankgolh niku xwanikan Dura. Pero xlakata kstalanina Cristo ni namakgtanu kpolítica xlikuentajtlawat uma pulakchaxan tastakyaw:

  1. Kstalaninanin Jesús «ni xala katuxawat» o kakilhtamaku (Juan 15:19).

  2. Kstalaninanin, palakachuwinanaw Cristo chu xTamapakgsin (Juan 18:36; 2 Corintios 5:20).

  3. Putum congregación kgalhiyaw watiya takanajla, watiya tapaxkit chu uma tlawa makxtum natawilayaw (1 Corintios 1:10; Colosenses 3:14).

  4. Tiku makgtayanan xlakata nalaksakkan chatum mapakgsina, na nalin kuenta tuku natlawa tiku nalaksaka (kaʼakxilhti  tastakyaw nema na lichuwinan xlakata uma anta 1 Samuel 8:5, 10-18 chu 1 Timoteo 5:22).

  5. Akxni israelitas skinkgolh chatum mapakgsina, Jehová akxilhli pi tuku kskimakgolh xlimasiyamakgolh pi ni xlakgatikgo nakamapakgsi Jehová (1 Samuel 8:7).

  6. Kstalaninanin Cristo lichuwinamputunaw xTamapakgsin Dios, chu kalitachuwinamputunaw putum latamanin maski tanu tanu partido xla política makgtanukgonit (Mateo 24:14; 28:19, 20; Hebreos 10:35).

Kaj chuntiya skujkan kkachikin. Wilakgolh laklanka kachikinin niku kaskinikan tiku ni soldados litaxtuputunkgo kaj chuntiya naskujkgo kkachikin. ¿Tuku tlan natlawayaw akxni chuna natitaxtuyaw? Natlawaniyaw oración Jehová chu tlakg naputsananaw xlakata uma taskujut, max naskiniyaw tastakyaw tala tiku tlakg katsiya tuku tatlawa. Akxni chuna naputsananaw tlakg liwana nakatsiyaw tuku natlawayaw (Proverbios 2:1-5; Filipenses 4:5).

Xtachuwin Dios kinkaskiniyan nakakgalhakgaxmataw «mapakgsinanin, chu nti nkgalhikgoy limapakgsin» chu natlawayaw «tu lakwan taskujut» chu ni nataʼakglhuwiyaw (Tito 3:1, 2). Xlakata katsiyaw uma, talakaskin nalakpuwanaw tuku xlalh komo xmakglhtinaw uma taskujut: «¿Max nakmakgtanu tuku xla kakilhtamaku o nakmakgtanu knixaxlikana takanajla?» (Miqueas 4:3, 5; 2 Corintios 6:16, 17). «¿Lu tuwa nakmakgkatsi o nila nakmakgantaxti taskujut nema klakgaya xlakata akit kstalanina Cristo?» (Mateo 28:19, 20; Efesios 6:4; Hebreos 10:24, 25.) «¿O nakkgalhi kilhtamaku xlakata tlakg nakskujnani Dios o xlakata nakliskuja la precursor o atanu taskujut?» (Hebreos 6:11, 12.)

Komo chatum kstalanina Cristo natlawa akgtum taskujut kaj xachuntiya kkachikin xlakata ni natamaknukan kpulachin, xnatalan ni nalichuwinankgo xlakata tuku lakapastakli natlawa (Romanos 14:10). Na ni nalichuwinankgo komo tala ni tlawaputun ama taskujut (1 Corintios 10:29; 2 Corintios 1:24).