Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TATAKGATSIN

Akxni xlitaʼakgtlapat puskat chu, ¿tuku xlakata?

Akxni xlitaʼakgtlapat puskat chu, ¿tuku xlakata?

Dios malakpuwanilh apóstol Pablo pi namin kilhtamaku akxni natalan lakpuskatin nakakninanikgo Jehová, nataʼakgtlapakgo. ¿Niku natalakaskin nataʼakgtlapa chu tuku xlakata? Kaʼakxilhwi tuku wa apóstol Pablo 1 Corintios 11:3-16 anta wilakgolh makgapitsi tastakyaw nema nakamakgtaya pi tuku natlawakgo nalimalankikgo Jehová. Pablo lichuwinan pulaktutu nema likuentajtlawat: 1) taskujut nema talakaskin nataʼakgtlapakan; 2) niku wi chu tuku tlawama; chu 3) tuku xlakata xlitaʼakgtlapat.

Taskujut. Pulaktiy tuku lichuwinan Pablo: oración chu palakachuwinankan Dios (versículos 4, 5). Oración likakninaniyaw Jehová, nachuna palakachuwinankan, kilhchanima taskujut nema tlawakgo xlakskujnin Dios akxni masiyakgo tuku  wan Biblia. ¿Wamputun Pablo pi lakpuskatin putum kilhtamaku nataʼakgtlapakgo akxni natlawakgo oración o akxni namasiyakgo tuku wan Biblia? Ni. Xlakata nakatsiyaw komo talakaskin nataʼakgtlapa chatum tala puskat, kilikatsitkan niku tlawama uma taskujut.

Niku tlawama taskujut. Pablo pulaktiy lichuwinalh: kfamilia chu kcongregación. Tsokgli: «Wa nchixku, na wa xpuxku mpuskat; [...] xlipaks lakchajan nti ntlawakgo xoraciónkan, chu akgchuwinankgoy, na ni takgtlapanit, mamaxaniy xakgxakga» (versículos 3, 5). Kfamilia, Jehová liyawanit chixku xlakata xʼakgxakga puskat nawan. Wa xlakata, ¿tuku la akxni puskat tlawa taskujut nema Jehová liyawanit chixku? Komo ni nalimasiya pi xchixku liyawakanit limapakgsin, namamaxani. Akgtum liʼakxilhtit. Chatum tala puskat wi tiku namakgalhtawakge pero na anta wi xchixku. Xlakata nalimasiya pi maxki kakni talakaskin nataʼakgtlapa. Nachuna natlawa maski xchixku tamununit o nina tamunu, xlakata xʼakgxakga familia. * ¿Xlitaʼakgtlapat chatum tala puskat akxni natlawa oración o namakgalhtawakganan chu anta wi aktsu xkgawasa tiku tamununita? Maski xkgawasa ni pulalin familia, na nataʼakgtlapa. ¿Tuku xlakata? Katsi pi lakchixkuwin tiku tamunukgonita, Jehová kamaxkinit limapakgsin kcongregación.

Xlipulaktiy, Pablo lichuwinalh congregación akxni tsokgli: «Komo wi tiku lakpuwan pi uma nitlan, akinin ni kgalhiyaw atanu talismanin, nipara xcongregaciones Dios» (versículo 16TNM). Jehová kaliyawanit napulalinkgo congregación lakchixkuwin tiku tamunukgonita (1 Timoteo 2:11-14; Hebreos 13:17). Chuna, kaj lakgkgolotsin chu siervos ministeriales Dios kamaxkinit talakaskin nakuentajtlawanikgo xkachikin (Hechos 20:28). Pero namin kilhtamaku natalakaskin pi chatum tala puskat natlawa taskujut nema xlitlawat chixku tiku tamununita chu liwana katsi la natlawa. Akgtum liʼakxilhtit, max chatum tala puskat nakamaxtu natalan xlakata naʼankgo lichuwinankgo  Dios xlakata ni anan chatum tala chixku tiku tlan chuna natlawa. Uma taskujut, na tamasiy nema tatlawa kcongregación chu xlitlawat chatum tala chixku. Na nataʼakgtlapa komo wi tiku namakgalhtawakga chu wi chatum tala chixku tiku tamununita. * Xlilat nataʼakgtlapa xlakata chuna limasiya pi katsi pi tlawama akgtum taskujut nema lakgchan chatum chixku.

Pero tala puskat ni talakaskin nataʼakgtlapa akxni natlawa atanu tuku nalikakninani Dios. Akgtum liʼakxilhtit, ni talakaskin nataʼakgtlapa akxni namasta xtakgalhtin ktamakxtumit, naʼan lichuwinan Dios (maski taʼan xchixku o atanu tiku tamununita), akxni nakatakgalhtawakga chu nakatatlawa oración xkamanan tiku nina tamunukgo. Pero ¿tuku tlan natlawa akxni ni liwana katsi komo xlitaʼakgtlapat o ni? Pulana, tlakg liwana nalakputsanani la natlawa. * Pero, komo chuntiya ni katsi tuku natlawa o xtalakapastakni wani pi xlitaʼakgtlapat, tlan nataʼakgtlapa, nitu wamputun.

Tuku xlakata. Kversículo 10 kinkawaniyan pulaktiy tuku xlakata chatum puskat kstalanina Cristo namakgantaxti uma: «Mpuskat, xlitakgtlapat, xlimasiyut mpi wa nchixku nti xapuxku, na tlakg xaliwaka xlitlawanitkan [xlakata] ángeles». Xapulana tuku xlakata xlitaʼakgtlapat, wa uma: «Xlimasiyut mpi wa nchixku nti xapuxku». Tuku limaklakaskin xlakata nalitaʼakgtlapa chatum tala puskat limasiya pi katsi pi taskujut nema tlawama Jehová kaliyawanit lakchixkuwin tiku tamunukgonita. Wa xlakata tala puskat tiku chuna tlawa, limasiya pi paxki chu  ni makgxtakga Jehová Dios. Chu xlipulaktiy wa xlakata «ángeles». Pero ¿la kamakgtaya ángeles tiku kgalhikgo lhuwa litliwakga akxni tala puskat taʼakgtlapa?

Ángeles akxilhkgo chatunu chatunu tiku wilakgolh kxkachikin Jehová, xalak akgapun chu xalak Katiyatni, akxilhmakgo la limasiyakgo pi tapakgsinikgo Dios. Chu kamakgtaya akxni akxilhkgo pi latamanin tiku kgalhikgo talakgalhin kgalhakgaxmatnankgo. Ángeles na xlimasiyatkan pi kgalhakgaxmatkgo Dios chu makgapitsi ángeles ni chuna tlawakgolh (Judas 6). La uku makglhtinankgo akgtum liʼakxilhtit akxni chatum puskat kstalanina Cristo kgalhakgaxmata chatum tala tiku tamununita maski tlakg katsi chu tlakg skgalala. Chu tuku tlakg kamakgtaya, wa akxni akxilhkgo tala puskat kstalanina Cristo tiku laksakkanit naʼan kʼakgapun. ¿Tuku xlakata? Xlakata alistalh ama tala puskat natamapakgsinan Cristo kʼakgapun chu tlakg nakgalhi limapakgsin nixawa ángeles. Chuna la akxilhaw, lakpuskatin tiku kstalaninanin Cristo kgalhikgo lanka talakgalhaman. Chuna la linkgo xtayatkan chu kgalhakgaxmatnankgo, kamasiyanikgo lhuwa millón ángeles pi ni lankajwa nawankgo chu nakgalhakgaxmatnankgo.

^ párr. 5 Puskat tiku kstalanina Cristo ni katitlawalh oración kxlakatin xchixku tiku na watiya takanajla kgalhi, kaj akxni lu natalakaskin, max akxni xchixku nila chuwinan xlakata tatatla.

^ párr. 6 Chatum tala puskat ni xlitaʼakgtlapat akxni namakgalhtawakge tiku xtalakkaxlanita, maski taʼan chixku tiku lichuwinan Dios chu nina tamununit, komo ni wa xchixku.

^ párr. 7 Xlakata tlakg nakatsiya, kaʼakxilhti La Atalaya, 15 xla febrero kata 2015, página 30, chu 15 xla julio kata 2002, kpáginas 26 chu 27, chu 15 xla julio kata 1977, kpáginas 445 asta 448.