Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

«Katamakgxtakgtit kxtapaxkit Dios»

 CAPÍTULO 5

Tuku wamputun ni namakgtapakgsiyaw kkakilhtamaku

Tuku wamputun ni namakgtapakgsiyaw kkakilhtamaku

«Ni xala katuxawat [o kakilhtamaku] wixin.» (JUAN 15:19.)

1. ¿Tuku lu xlakaskinka lichuwinalh Jesús xaʼawatiya katsisni akxni latamalh kKatiyatni?

KATSISNI akxni nina xmakgnikan, Jesús limasiyalh pi xkalilakgaputsa la xʼamakgolh tawilakgo kstalaninanin. Wa xlakata kapalakachuwinalh chu wanilh xTlat: «Ni wa klipalakaskinkgoy mpala kaj namapanukgoya [o nakamaxtuya] nkatuxawat, wampi wata kaj kuintaj natlawakgoya, mpi nitu namakgspulikgo akgskgawini. Ni katuxawat ntapaksikgoy, lantla chu nkit, ni xala katuxawat» (Juan 17:15, 16). Akxni Jesús tlawalh ama oración lu xmakgkatsi tuku xkilhwama, chu chuna limasiyalh la xlilhuwa xkapaxki chu la xlilakaskinka tachuwin nema xkawaninit ama katsisni makgapitsi kstalaninanin: «Ni xala katuxawat wixin» (Juan 15:19). Chuna la akxilhaw, Jesús lu xlakaskinka xʼakxilha pi kstalaninanin ni xmakgtapakgsikgolh kkakilhtamaku.

2. ¿Tuku ama «katuxawat» o kakilhtamaku nema xlichuwinama Jesús?

2 ¿Tuku ama «katuxawat» o kakilhtamaku nema xlichuwinama Jesús? Xlichuwinama putum latamanin tiku tamakgatlinikgonit Dios chu kaʼakgchipanit Satanás, tlawa pi xakstu nakapaxkikan chu tlanka nakamakgkatsikan (Juan 14:30; Efesios 2:2; 1 Juan 5:19). Wa xlakata Biblia wan pi «nti mpaxkiy ntu xala katuxawat,  ni ukxilhputun Dios» (Santiago 4:4). Xlakata putum akinin tamakgxtakgputunaw kxtapaxkit Dios, xlakaskinka naʼakxilhaw la tlan nalatamayaw kkakilhtamaku pero ni namakgtapakgsiyaw. Wa xlakata kaʼakxilhwi pulakkitsis tuku nakinkamakgtayayan ni namakgtapakgsiyaw kkakilhtamaku: pulana ni namakgxtakgaw xTamapakgsin Dios nema pulalin Cristo chu ni namakgtanuyaw kpolítica, ni nalikatsiyaw la likatsikgo xalak kakilhtamaku, natakaxtayayaw chuna la xlilat, ni lhuwa tuku nakgalhiputunaw chu nawiliyaw tuku nalitamakgtaya kintakanajlakan.

NI NAMAKGXTAKGAW XTAMAPAKGSIN DIOS CHU NI NAMAKGTANUYAW TUKU XALAK KAKILHTAMAKU

3. 1) ¿La akxilhli chu tuku tlawalh Jesús xlakata política? 2) ¿Tuku xlakata Biblia kawani palakachuwinanin kstalaninanin Jesús nema kalaksakkanit? (Na kalichuwinanti tuku wan nota.)

3 Akxni Jesús xlama kkatiyatni ni makgtanulh kpolítica, wata lichuwinalh xTamapakgsin Dios, tamapakgsin nema xʼama tawila kʼakgapun chu Jesús mapakgsina xʼama wan (Daniel 7:13, 14; Lucas 4:43; 17:20, 21). Wa xlakata tlan wanilh mapakgsina Poncio Pilato: «Wa kinTamapakgsin ni xala uma kakilhtamaku» (Juan 18:36TNM). Akinin kstalaninanin Cristo tiku ni makgatsankgananiyaw Jesús, nachuna tlawayaw. ¿La tlawayaw? Akxni ni makgxtakgaw xTamapakgsin Dios chu xmapakgsina Jesucristo chu lichuwinanaw uma tamapakgsin xlikalanka katiyatni (Mateo 24:14). Apóstol Pablo tsokgli: «Xpalakachuwinanin nCristo liwanitaw, [...]. Kkaliskiniyan litlan kxtukuwini nCristo mpi katalakatsuwinitit Dios» (2 Corintios 5:20). *

4. ¿La limasiyakgonit xaxlikana kstalaninanin Cristo pi ni makgxtakgkgo xTamapakgsin Dios? (Kaʼakxilhti recuadro « Xapulana kstalaninanin Cristo ni xmakgtanukgo kkakilhtamaku».)

 4 Min kilhtamaku chatum mapakgsina malakgacha kʼalakatanu kachikin chatum tiku napalakachuwinan o napalakachuwinan xkachikin. Xlakan nimakgtanukgo kxtaʼakglhuwitkan kachikin niku kamalakgachakan. Pero, palakachuwinankgo tuku lakaskin xmapakgsina tiku kamalakgachalh o xkachikinkan. Kstalaninanin Cristo “tiku tapakgsikgo kʼakgapun” nachuna tlawakgo (Filipenses 3:20). Uma palakachuwinanin tiku lu lichuwinamakgolh xTamapakgsin Dios, kalimakgtayamakgolh natalakatsuwinikgo Dios lhuwa millones tiku kawanikan «amakgapitsi borregos» xla Cristo (Juan 10:16; Mateo 25:31-40). Xnatalan Jesús tiku kalaksakkanit, kapulalinkgo kstalaninanin tiku kawanikan «amakgapitsi borregos» chu umakgolh litaxtukgo la tiku kamalakgachanit Cristo. Uma pulaktiy akxtum lakgo chu lichuwinankgo xTamapakgsin Jesús chu nipara tsinu makgtanukgo kpolítica xla kakilhtamaku (kalikgalhtawakga Isaías 2:2-4).

5. ¿La xwilakgolh israelitas chu la wilakgolh la uku kstalaninanin Cristo chu tuku kitaxtu xlakata uma?

5 Xlikana, ni makgtanuyaw kkakilhtamaku xlakata ni makgxtakgputunaw Cristo, pero wi atanu tuku xlakata ni makgtanuyaw. Xapulana, ni wilaw la xamakgan israelitas, tiku makxtum xwilakgolh kʼakgtum kachikin nema Dios xkamaxkinit. Kinatalankan wilakgolh kxlikalanka Katiyatni (Mateo 28:19; 1 Pedro 2:9). Wa xlakata, ¿la xkinkakitaxtunin komo xmakgtanuw kʼakgtum partido? Max nialhla tlan xkatalaliw kinatalankan, na nialhla xkatachuwinaw chu nila liwana xkawaniw amakgapitsi xlakata xTamapakgsin Dios (1 Corintios 1:10). Nachuna akxni xʼanalh guerra xkatalachipaw kinatalankan tiku kinkalimapakgsikanitan nakapaxkiyaw (Juan 13:34, 35; 1 Juan 3:10-12). ¡Wa xlakata Jesús kawanilh kstalaninanin ni kalimaklakaskinkgolh  limakgnin asta kawanilh kakapaxkikgolh tiku ni kaʼakxilhputunkgo! (Mateo 5:44; 26:52; kaʼakxilhti recuadro « ¿Ni kmakgtanu tuku xla kakilhtamaku?».)

6. Xlakata tamakamastaninitaw Dios, ¿la kaʼakxilhaw mapakgsinanin?

6 Nachuna, kstalaninanin Cristo ni latamanin makamaxkikgonit xlatamatkan, tuku lakkaxwilikgonit lakchixkuwin o kachikinin, wata wa Dios. Chu 1 Corintios 6:19, 20 Biblia Xasasti Tamacatzinin, Coyutla, wan pi “xlakan nialh akstu tapakgsikgo, xlakata katamawaka”. Maski maxkiyaw «César» tuku tapakgsini, uma wamputun, kakni, xokgonanaw chu wi tuku tlan kakgalhakgaxmatniyaw, tuku tlakg xlakaskinka, wa “ntu xla Dios, wa Dios namaxkiyaw” (Marcos 12:17; Romanos 13:1-7). Tuku ama “xla Dios”, kilhchanima kajwatiya xla nakakninaniyaw, xliputum kinakujkan nalipaxkiyaw, nakgalhakgaxmataw, ni namakgxtakgaw chu asta namastayaw kilatamatkan komo natalakaskin (Lucas 4:8; 10:27; kalikgalhtawakga Hechos 5:29 chu Romanos 14:8).

NI TLAWAYAW TUKU XALAK KAKILHTAMAKU

7, 8. ¿Tuku uma “xtalakapastakni kakilhtamaku”, chu la kamatlawi tuku nitlan latamanin tiku ni kgalhakgaxmatnankgo?

7 Atanu tuku natlawayaw xlakata ni namakgtanuyaw tuku xalak kkakilhtamaku wa ni namastayaw talakaskin kintayatkan nawan la xalixkajni xtalakapastakni. Pablo tsokgli pi ni makgamakglhtinanitaw «ntalakapastakna ntu xala katuxawat, wampi wa spiritu ntu miniyacha Dios» (1 Corintios 2:12). Chu kstalaninanin Cristo xalak Éfeso kawanilh «umincha nkilhtamaku, xtlawayatit xlapatit wa lantla ntalismanin ntu anan nkatuxawat, xtachuna lantla xlimapakgsin xapuxku xala kaunin, wa cha yama spiritu wantu asta chu skujma kxnakukan lakgachixkuwimakgananin [o tiku ni kgalhakgaxmatnankgo]» (Efesios 2:2, 3).

 8 ¿Tuku uma «un», o xtalakapastakni kakilhtamaku? Litliwakga nema nila akxilhaw chu kamatlawi latamanin tuku nitlan. ¿La kamatlawi? Tlawa pi ni nakgalhakgaxmatkgo Dios chu pi latamanin natlawakgo tuku «xlimakgapaxuwakgolh xtiyatliwakan wantu lakgatikgoy» (1 Juan 2:16TXS, 1999; 1 Timoteo 6:9, 10). ¿Tuku xlakata uma talakapastakni kgalhi “limapakgsin” o litliwakga xlakata nakamapakgsi latamanin? Xlakata kalitokglha tuku tlawaputunkgo chu ni katsiyaw akxni kinkamatlawiputunan tuku  nitlan, na ni kinkamakgxtakgan chu xtachuna un kaniwa lama. ¿La kamatlawi tuku nitlan? Tlawa pi tsinu tsinu kakgalhikgolh tayat nema ni xlikgalhitkan kstalaninanin Cristo, la akstu kakapaxkikan, lhuwa tuku kakgalhiputunkgolh, ni mastakgo talakaskin kakawanika la nalinkgo xlatamatkan chu niti kakgalhakgaxmatnilh. * Tlan nawanaw pi tsinu tsinu, xtayat Akgskgawini staka kxnakujkan (Juan 8:44; Hechos 13:10; 1 Juan 3:8, 10).

9. ¿La tlan natanu xtalakapastakni kakilhtamaku kkintalakapastaknikan chu kkinakujkan?

9 ¿Pi kawa tlan nastaka xtalakapastakni kakilhtamaku kkintalakapastaknikan chu kkinakujkan? Tlan nastaka komo ni kuenta natlawayaw (kalikgalhtawakga Proverbios 4:23). Xapulana, ni katikatsiw la nakinkapasayan. Akgtum liʼakxilhtit, uma nitlan talakapastakni max nakinkamapasikgoyan tiku katalalinaw chu tasiyakgo pi tlan likatsikgo pero ni paxkikgo Jehová (Proverbios 13:20; 1 Corintios 15:33). Na nakinkapasayan akxni likgalhtawakgayaw libros chu revistas nema lichuwinan tuku nitlan, akxni kʼInternet akxilhaw fotos chu videos xalaklixkajni o atanu tuku xalixkajni, o tiku makgxtakgkgonit xaxlikana takanajla, akxni lilakgastananaw tuku nimakgtayanan, takgaman niku kaj latlajaputunkan, wa kilhchanima putum tuku masiya o tiku masiya xtalakapastakni Satanás chu xkakilhtamaku.

10. ¿Tuku tlan natlawayaw xlakata ni nakinkapasayan xtalakapastakni kakilhtamaku?

10 ¿Tuku natlawayaw xlakata ni nakinkapasayan nixatlan xtalakapastakni kakilhtamaku chu natamakgxtakgaw kxtapaxkit Dios? Nalitamakgtayayaw tuku Jehová masta la uku xlakata namatliwakglhaw kintakanajlakan chu putum kilhtamaku naskiniyaw Jehová xʼespíritu santo. Maski Akgskgawini  chu xkakilhtamaku nema lixkajni likatsikgo lu lakgtliwakga, Dios tlakg tliwakga (1 Juan 4:4). Xlakata natalakatsuwiniyaw Dios xlakaskinka natlawaniyaw oración.

NATAKAXTAYAYAW CHUNA LA XLILAT

11. ¿La litasiya chuna la lhakganan chatum lataman pi pasanit xtalakapastakni kakilhtamaku?

11 Pulaklhuwa la litasiya pi wi tiku pasanit xtalakapastakni kakilhtamaku. Pulaktum wa la takaxtaya, la lhakganan chu komo maklixkajni o ni. Lu nitlan, pero klhuwa países nialh liwana lhakganankgo. Ni liwana lhakganankgo, wa xlakata chatum tiku taxtu ktelevisión wa pi chuna la amaw, lakpuskatin tiku stakgo xmaknikan nialh nakatsikgo la nalhakganankgo xlakata nakaʼakxilhkan. Xlakata uma tuku lama, maktum periódico wa pi «ni lhuwa lhakgat chu ni lhuwa tamaxana», asta laktsu laktsuman nachuna lhakganankgo. Nachuna lhuwa chuna lhakganankgo xlakata nalimasiyakgo pi niti kgalhakgaxmatkgo chu pi ni kamaxkikan kakni chu ni kapaxkikan.

12, 13. ¿Tukuya tastakyaw xalak Biblia nalimaklakaskinaw xlakata tlan nalaksakaw la nalhakgananaw?

12 Xlakata skujniyaw Jehová, ni maklixkajni tasiyaputunaw wa xlakata liwana lhakgananaw, xatachakgan wiliyaw kilhakgatkan, tlan tasiya chu lhakgananaw chuna la  lhakganankan niku wilaw o amaw. Pero putum kilhtamaku nalimasiyayaw pi “ni lankajwa akinin chu tlan lakapastakaw”, uma lakwan tayat chu “lakwan tatlaw” litalakgapaskgo tiku «maxkikgo kakni Dios». Ni kaj lakaskinaw nakinkaʼakxilhkgoyan latamanin, wata “tamakgxtakgputunaw kxtapaxkit Dios” (1 Timoteo 2:9, 10; Judas 21). Tuku tlakg lhuwa xtapalh nalitakaxtayayaw wa “tuku makinitaw kkinakujkan nema ni tasiya chu lhuwa xtapalh kxlakatin Dios” (1 Pedro 3:3, 4).

13 Nachuna, kalakapastakwi pi chuna la lhakgananaw chu takaxtayayaw, na wa namakgtayanan la nalichuwinankan xaxlikana takanajla. Tachuwin xagriego “ni tlankajwa”, akxni limaklakaskinkan xlakata la linaw latamat, kilhchani tiku masta kakni chu kuentajtlawa la makgkatsikgo amakgapitsin chu la lakapastakkgo. Wa xlakata pulana  nawiliyaw la lakapastakkgo amakgapitsin chu ni tuku lakpuwanaw pi kilitlawatkan. Tuku tlakg xlakaskinka akxilhaw wa namalankiyaw Jehová, xkachikin chu nalimasiyayaw pi akinin xlakskujni Dios. Xlikana, putum tuku tlawayaw tlawaputunaw xlakata «nalimaxkiyaw nkakni Dios» (1 Corintios 4:9; 10:31; 2 Corintios 6:3, 4; 7:1).

¿Malanki Jehová chuna la ktasiya?

14. ¿Tukuya takgalhskinin natlawayaw xlakata la takaxtayayaw chu la xlitawilat kimaknikan?

14 Akxni anaw lichuwinanaw Dios o anaw ktamakxtumit, tlakg xlakaskinka xatachakgan nawiliyaw kilhakgatkan chu liwana natakaxtayayaw. Wa xlakata, xlakaskinka nakinkakgalhskinkanan: «¿Putum kiʼakxilhkgo xlakata la klhakgananit o xlakata maklixkani? ¿Kilimaxanankgo amakgapitsin? ¿Tuku tlakg xlakaskinka kʼakxilha: naklhakganan la klakaskin o naklhakganan la nalitasiya pi kmakgatsiputun tuku taskin xlakata nakiliyawakan akgtum taskujut kcongregación?» (Salmo 68:6; Filipenses 4:5; 1 Pedro 5:6).

15. ¿Tuku xlakata Jehová ni matsokgwilinalh xlakata tukuya lhakgat nawiliyaw, la natawila kimaknikan chu la natakaxtayayaw?

15 Jehová ni matsokgwilinalh kBiblia lhuwa limapakgsin xlakata la xliwanat kilhakgatkan, la xlitawilat kimaknikan chu la natakaxtayayaw kinchatunukan. ¿Tuku xlakata? Xlakata lakaskin pi kiakstukan nalaksakaw chu nalakapastakaw la natlawayaw. Lakaskin kalimasiyaw pi tliwakga wi kintakanajlakan chu akxni nalaksakaw tuku natlawayaw kalimaklakaskiw xtastakyaw Biblia chu chuna “nalimasmaniyaw kintalakapastaknikan nakatsi tuku tlan chu tuku nitlan” (Hebreos 5:14). Chu tuku tlakg lakaskin, wa pi akxni wi tuku natlawayaw nalimasiyayaw pi paxkiyaw chu kintalatamankan (kalikgalhtawakga Marcos 12:30, 31). Anan lhuwa lhakgat nema tlan nalaksakaw chu na tipalhuwa la tlan natakaxtayayaw. Komo naʼanaw atanu kachikinin klanka tamakxtumit xla xtatayananin Jehová,  naʼakxilhaw pi chatunu chatunu tanu tanu color wilikgonit xlhakgatkan chu la paxuwakgo tiku anta wilakgolh.

NI LHUWA TUKU KAKGALHIPUTUW KKILATAMATKAN

16. ¿Tuku xlakata wanaw pi xtalakapastakni kakilhtamaku lu tanu kamalakpuwani latamanin nixawa tuku masiyalh Jesús chu tukuya takgalhskinin tlan natlawayaw?

16 Xtalakapastakni kakilhtamaku lu akgskgawinan. Tlawa pi lhuwa millones naputsakgo tapaxuwan ktumin chu lhuwa tuku nakgalhiputunkgo. Pero Jesús wa pi «xlatamat nchixku, ni anta nkilhtsukuy wantu xlilhuwa [...] nkgalhiy» (Lucas 12:15). Jesús ni malakatsalilh, na ni wa pi nalinaw kilatamatkan chuna la lhuwa napatinanaw. Pero masiyalh pi tlan xkgalhikgolh xaxlikana tapaxuwan chu lakgtaxtut kajwatiya «tiku katsikgo pi maklakaskinkgo tuku xla Dios», chu ni lhuwa tuku kgalhiputunkgo kxlatamatkan tiku liwana katsikgo tuku xtalakaskin Dios (Mateo 5:3; 6:22, nota, TNM). Wa xlakata kakinkakgalhskinkan: «¿Xlikana kkanajla tuku masiyalh Jesús o na klikatsima la likatsi “xmakilhtsukina taʼakgsanin”?» (Juan 8:44). «¿Tuku klimasiya xlakata tuku klichuwinan, tuku klakapastaknit naktlawa, la klin kilatamat chu tuku tlakg xlakaskinka kakxilha?» (Lucas 6:45; 21:34-36; 2 Juan 6.)

17. Kawanti tuku tlan kitaxtu akxni ni lhuwa tuku kgalhiputunaw.

17 Jesús wa pi «liskgalala [...] litasiyuma xtaskujut», o tuku matlawinan liskgalala (Mateo 11:19TXS, 1999). Pero ¿tuku makglhtinankgo tiku ni lhuwa tuku kgalhiputunkgo? Akxni skujnanikgo xTamapakgsin Dios, tekgskgo xaxlikana tapaxuwan chu tlan makgkatsikgo (Mateo 11:29, 30). Nachuna, ni lhuwa tuku lilakgaputsakgo, ni lhuwa talipuwan kgalhikgo chu ni lhuwa takatsan kgalhikgo (kalikgalhtawakga 1 Timoteo 6:9, 10). Xlakata lipaxuwakgo tuku kgalhikgo, tlawa pi tlakg nakgalhikgo kilhtamaku nakatatawilakgo xfamiliajkan chu xnatalan kcongregación.  Asta tlakg tlan lhtatakgo (Eclesiastés 5:12). Tlakg paxuwakgo xlakata kamaxkikgo amakgapitsi xkilhtamakujkan chu tuku kgalhikgo (Hechos 20:35). Na «[lu kgalhikgo] ntakgalhkgalhitin», takaksni chu tlan limakgkatsikgo tuku tlawamakgolh (Romanos 15:13; Mateo 6:31, 32). Xlikana, uma tasikulunalin nila nalitamawayaw tumin.

NAWILIYAW «XATAKGATSIN LITAMAKGTAY»

18. ¿Tuku wan Biblia xlakata tiku katalachipamaw, la kinkatlawanikgoyan tuku nitlan, chu tukuya talachipat kgalhiyaw?

18 Komo natamakgxtakgaw kxtapaxkit Dios, Satanás nila tuku katitlawanilh kintakanajlakan, xla lakaskin nialh napaxuwayaw chu ni nakgalhiyaw latamat nema ni katisputli (1 Pedro 5:8). Pablo wa pi kgalhiyaw latalachipat, pero «ni wa latamanin katalachipamaw, wata wa mapakgsinanin, tiku kgalhikgo limapakgsin, tiku mapakgsinankgo kkakilhtamaku nema kapukswa wi, uma wamputun, lhuwa demonios xalak akgapun» (Efesios 6:12TNM). Tachuwin xagriego nema matitaxtikan xatotonaco «talachipat» limin kkintalakapastaknikan akxni wi tiku talachipa achatum, chu ni kilhchanima pi tiku talachipamaw makgat wilacha o max tatsekgnit kxtampin katiyatni. Akxni Pablo lichuwinalh tiku katalachipamaw xalak kaunin, lichuwinalh «mapakgsinanin», «tiku kgalhikgo limapakgsin» chu «tiku mapakgsinankgo kkakilhtamaku». ¿Tuku wamputun uma? Wamputun pi umakgolh nixatlan espíritus liwana lakapastakkgo chu liwana lakkaxwilikgonit tuku nitlan nakinkatlawanikgoyan.

19. Kalichuwinanti xatakgatsin litamakgtay nema Dios kamaxki kstalaninanin Cristo.

19 Maski kaj lakapala tlawayaw tuku nitlan chu lhuwa tuku nila tlawayaw, tlan natlajananaw kʼuma latalatlawat. ¿La tlan natlajananaw? Namakglhtinanaw «xatakgatsin litamakgtay nema kinkamaxkiyan Dios» (Efesios  6:13TNM). Anta kʼEfesios 6:14-18 Biblia Traducción del Nuevo Mundo wan: «Wa xlakata, tliwakglh katayatit, kalitatampulakgchitit litampachit xaxlikana, kawilitit tuku litamakgtayakan kkuxmun xaʼakgstitum, chu nalitatunuyatit tatunu xla xalakwan tamakatsin xla takaksni. Nachuna, katiyatit xalanka escudo xla takanajla nema nalimamixiyatit tuku lakgpasama nema nakamakaminiyachan tiku lu lixkajni likatsi. Na kakgalhitit takgnu xalikan nema masta lakgtaxtut, chu espada xla espíritu, uma kilhchanima xtachuwin Dios, tipalhuwa oración chu putum kilhtamaku kaskintit xliputum minakujkan, chu kakapulalin espíritu akxni chuna natlawayatit».

20. ¿Tuku xlakata akinin ni xtachuna la soldados xalak kakilhtamaku?

20 Tamakgtay xla takanajla nema kinkamaxkiyan Dios putum kilhtamaku nakinkamakgtayayan. Pero talakaskin nalimaklakaskinaw. ¿Tuku xlakata? Min kilhtamaku soldados makgas jaxkgo xlakata ni anan guerra, pero akinin putum kilhtamaku kgalhiyaw guerra niku max komo ni nakuentajtlawayaw nakinkamakgnikanan. Chu uma latalachipat nasputa akxni Dios namasputu xkakilhtamaku Satanás chu nakalakgachinu putum ángeles tiku lixkajni likatsikgo niku xakapulhman (Apocalipsis 12:17; 20:1-3). Wa xlakata komo uku lu skujpat xlakata ni natlawaya tuku nitlan, ni katamakgxtakgti. Talakaskin putum nastakyawayaw kimaknikan xlakata ni namakgatsankgananiyaw Jehová (1 Corintios 9:27). Kalilakgaputsaw akxni akgskgawini nialh nakinkatalachipayan.

21. ¿La kajwatiya tlan natlajananaw kʼuma latalatlawat xla kintakanajlakan?

21 Xlikana, kaj kiʼakstukan nikxni natlajananaw. Wa xlakata Pablo kinkamalakapastakayan pi talakaskin natlawaniyaw oración Jehová xlakata putum kilhtamaku “nakinkapulalinan espíritu”. Na talakaskin nakgaxmataw  tuku kinkawaniyan Dios. ¿La nakgaxmataw? Nalikgalhtawakgayaw xTachuwin, chu nakatatamakxtumiyaw kinatalankan tiku na kgalhikgo uma latalatlawat. Chuna la akxilhaw ni kiakstukan wilaw (Filemón 2; Hebreos 10:24, 25). Komo chuna natlawayaw ni kajwatiya tlan natlajananaw, na tlan chali chali nakgalhmakgtayayaw kintakanajlakan akxni wi tiku nitlan nalichuwinan.

SKGALALH KATAWILAW XLAKATA NAKGALHMAKGTAYAYAW KINTAKAJLAKAN

22, 23. 1) ¿Tuku xlakata putum kilhtamaku skgalalh natawilayaw xlakata nakgalhmakgtayayaw kintakanajlakan chu tukuya takgalhskinin kilitlawatkan? 2) ¿Tuku naʼakxilhaw kcapítulo akgchaxan?

22 Jesús wa: «Wampi kumu ni xala katuxawat wixin, [...], wa cha nkalixkajniyan nti xala katuxawat» (Juan 15:19). Wa xlakata kstalaninanin Cristo skgalalh natawilayaw xlakata nakgalhmakgtayayaw kintakanajlakan, liwana nachuwinanaw chu ni nasitsiyaw (kalikgalhtawakga 1 Pedro 3:15). Wa xlakata kakinkakgalhskinkan: «¿Kʼakgatekgsa, o kmakgachakgxi, tuku xlakata min kilhtamaku xtatayananin Jehová ni likatsiyaw la amakgapitsin? Akxni ni chuna ktlawa la tlawakgo latamanin, ¿liwana kkanajla pi xlikana tuku wankgo Biblia chu skujni xalipaw?» (Mateo 24:45; Juan 17:17). «Akxni ktataya Jehová, ¿klimasiya pi skgalalh kwi xlakata ni naklikatsi la amakgapitsin, chu wata xatapaxuwan chuna ktlawa?» (Salmos 34:2; Mateo 10:32, 33.)

23 Pero Akgskgawini na limaklakaskin nema nila tunkun nakatsiyaw, xlakata natlawaputun pi namakgtapakgsiputunaw kkakilhtamaku. Akgtum liʼakxilhtit, chuna la lichuwinaw, limaklakaskin lilakgastan nema lu xalixkajni xlakata namakgtanuyaw tuku xla kakilhtamaku. ¿Tuku nakinkamakgtayayan liwana nalaksakaw tuku tlan nalilakgastananaw, tlan nakinkamamakgkatsiniyan chu tlan natawila kintalakapastaknikan? Naʼakxilhaw kcapítulo akgchaxan.

^ párr. 3 Kata 33 xla Pentecostés akxni xminita Cristo asta uku, Jesús kamapakgsima kstalaninanin, wa tiku kalaksakkanit xlakata naʼankgo kʼakgapun chu lamakgolhku kKatiyatni (Colosenses 1:13). Kata 1914 maxkika «limapakgsin xala katuxawat». Wa xlakata tiku kalaksakkanit naʼankgo kʼakgapun litaxtukgo palakachuwinanin xla xTamapakgsin Cristo (Apocalipsis 11:15).

^ párr. 8 Kaʼakxilhti Razonamiento a partir de las Escrituras, página 140 asta 144, tlawakgonit xtatayananin Jehová.