Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

«Katamakgxtakgtit kxtapaxkit Dios»

 CAPÍTULO 7

¿Xlakaskinka akxilhaw latamat chuna la akxilha Dios?

¿Xlakaskinka akxilhaw latamat chuna la akxilha Dios?

«Wix makilhtsukinita latamat.» (SALMO 36:9SXP.)

1, 2. ¿Tuku kinkamaxkinitan Dios nema lu xlakaskinka la uku, chu tuku xlakata?

KINTLATKAN xalak akgapun wi tuku lu tlan kinkamaskiwinitan, kinkamaxkinitan latamat tiku lakapastaknanaw chu tlan nakgalhiyaw tayat nema xla kgalhi (Génesis 1:27). Xlakata kinkamaskiwin latamat, tlan lilakapastakaw tastakyaw xalak Biblia chu tlan makgantaxtiyaw. Komo chuna natlawayaw nastaka chu tliwakga natawila kintakanajlakan, napaxkiyaw Jehová chu “nalimasmaniyaw kintalakapastaknikan nema nakatsi tuku tlan chu tuku nitlan” (Hebreos 5:14).

2 La uku lu xlakaskinka nakatsiniyaw limaklakaskinaw xtastakyaw Biblia. Kkakilhtamaku lu lhuwa tuku tlawakan chu ni anan akgtum limapakgsin nema nakinkawaniyan tuku natlawayaw pulaktu pulaktu kkilatamatkan. Akgtum xaliʼakxilhtit, tuku likuchunaw, likuchun nema litlawakan akxni mapitsikan kgalhni chu la tamaklakaskin kgalhni. Chu xlakata uma, liwana akgatekgsputunaw xlakata kgalhakgaxmatputunaw Jehová. ¿La tlan nalaksakaw tuku natlawayaw chu ni natlawayaw tuku alistalh nitlan nalimakgkatsiyaw chu tlan natamakgxtakgaw kxtapaxkit Dios? Liwana kaʼakgatekgswi o kamakgachakgxiw tastakyaw xalak  Biblia nema nalimaklakaskinaw (Proverbios 2:6-11). Kaʼakxilhwi makgapitsi liʼakxilhtit.

LATAMAT CHU KGALHNI XASANTO

3, 4. ¿Niku xapulana lichuwinan Biblia pi kgalhni xasanto, chu niku takilhti uma tastakyaw?

3 Jehová akxilha pi latamat chu kgalhni akxtum xlilakaskinka, chu xasanto. Xapulana akxni limasiyalh, wa akxni Caín xmakgninita Abel. Dios wanilh tiku makgninalh: «¡Kakgaxpatti! Xkgalhni mintala kkatiyatni kintasakilhminima» (Génesis 4:10). Jehová xʼakxilha pi xkgalhni Abel xkilhchanima xlatamat, nema nipara tsinu lakgalhamanka akxni makgnika. Xkitaxtu la xkgalhni Abel xtasaskinima Dios xmalakgaxokgelh tiku makgnilh (Hebreos 12:24).

4 Akxni xtitaxtunitta Munkaklat, Dios kawanilh latamanin pi tlan xwakgolh xliway animales, pero na kawanilh: «Liway nema kgalhijku xkgalhni ni miliwatkan, xlakata kgalhni, latamat. Nachuna, nakkaskiniyan kuenta xlakata latamat nema wi kminkgalhnikan» (Génesis 9:4, 5). Asta la uku, xlakata na kxfamilia Noé minitanchaw, na kilimakgantaxtitkan uma limapakgsin, nema limasiya tuku xwanita Dios akxni tachuwinalh Caín. Pulana, uma tastakyaw masiya pi putum animales chu latamanin, kxkgalhnikan wi xlatamatkan. Chu alistalh limasiya pi Jehová, tiku Malakatsukilh latamat, nakamalakgaxokge tiku nitu liʼakxilhkgo latamat chu kgalhni (Salmo 36:9).

5, 6. ¿La limasiya xLimapakgsin Moisés pi kgalhni xasanto chu lu lanka xtapalh? (Na kaʼakxilhti recuadro « Xlakaskinka kaʼakxilhwi xlatamat animales».)

5 Uma akgtiy tastakyaw nema lu xlakaskinka na tsokgwilika kxLimapakgsin Moisés. Jehová wan kLevítico  17:10, 11: «Komo chatum chixku [...] nawa katuwa kgalhni nema anan, akit naklakgmakgan ama lataman, chu xlikana nakmasputu kxitat kxkachikin. Xlakata xlatamat makni wi kkgalhni, chu akit kwilinit niku mastakan tamakamastan xlakata nalilakgmaxtukan milatamatkan, xlakata wa kgalhni tuku tlan lilakgmaxtunankan xlakata kgalhi latamat» (kaʼakxilhti recuadro « Kgalhni xapa talakgalhin».) *

6 Kgalhni kaj tlan xtamaklakaskin kpumakamastan, komo ni chuna, xtalakaskin natamakgan. Chuna xlimasiyakgo pi xmaspitnikgo latamat tiku Malakatsukilh (Deuteronomio 12:16; Ezequiel 18:4). Na kilikatsitkan pi israelitas ni xkaskinikan namaxtunikgo putum xkgalhni tantum animal. Kaj xtalakaskin napixchukukgo chu tlan xmakganikgolh xlakata tlan xwakgolh chu alistalh nitu xlimakgkatsikgolh kxtalakapastaknikan, akxni chuna xtlawakgo xlimasiyamakgo pi maxkikgo kakni tiku Masta latamat.

7. ¿La limasiyalh David pi xasanto xliʼakxilha kgalhni?

7 Chatum tiku liwana akgatekgsli tastakyaw nema xmasta xtachuwin Dios xlakata kgalhni wa David, tiku Dios “lu xlakgati sampi xla tlan xtapuwan” (Hechos 13:22TXS, 1999). Makgtum wa pi lu xkgalhputixnima o xkgalhtixtima. Akxni kgaxmatkgolh chatutu xsoldados, xafuerza titaxtukgolh xlakgstipankan tiku xtalatlawamakgolh, chu kimakutukgolh chuchut chu linikgolh David. ¿Tuku tlawalh? Xla wa: «¿Naklikgotnan xkgalhni umakgolh lakchixkuwin tiku  kalipekua wilikgolh xlatamatkan?». David xʼakxilha pi ama chuchut xkitaxtu la xkgalhni o xlatamatkan soldados. Wa xlakata maski lu xkgalhputima, «puxtakgamakgalh kxlakatin Jehová» (2 Samuel 23:15-17).

8, 9. ¿Talakgpalilh chuna la akxilha Dios latamat chu kgalhni akxni lakatsukulh congregación xla kstalaninanin Cristo? Kawanti.

8 Akxni xtitaxtunita max akgtiy mil akgtati ciento kata akxni Noé makglhtinalh uma limapakgsin xlakata kgalhni, chu max akgtum mil akgkitsis ciento kata akxni israelitas kamaxkika Limapakgsin. Tamakxtumikgolh tiku xpulalinkgo congregación xla kstalaninanin Cristo chu Jehová kamalakpuwanilh natsokgnankgo: «Espíritu santo chu akinin lu tlan kakxilhnitaw ni nakkaskiniyan atanu kajwatiya uma tuku lu xlakaskinka: katamakgatlinitit tuku makamastanikanit ídolos, kgalhni, tuku ni stajmakgankanit xkgalhni, chu talakgxtumit nema ni xlitatlawat» (Hechos 15:28, 29TNM).

9 Liwana tasiya pi Lakgkgolotsin tiku xPulalinkgo xkachikin Jehová xalak xapulana siglo xkatsikgo pi kgalhni xasanto chu akxni nitlan xtalimaklakaskin, akgtum lanka talakgalhin xtachuna kakninanikan ídolos chu tlawakan talakgxtumit nema ni xlitatlawat. La uku chuntiyaku kgalhakgaxmataw uma limapakgsin. Akxni kgalhiyaw taʼakglhuwit niku max natalakaskin nalimaklakaskinkan kgalhni, akxilhaw xtastakyaw Biblia xlakata natlawayaw tuku makgapaxuwa Dios.

AKXNI LIMAKLAKASKINKAN KGALHNI KLIKUCHUN

¿La xakwanilh chatum makuchina tuku klakapastaka xlakata maklakaskinkan kgalhni akxni pulaklhuwata mapitsikanita?

10, 11. 1) ¿Mastayaw talakaskin xtatayananin Jehová nakinkawilinikan kgalhni o pulaktati tuku litatlawanit kgalhni? 2) ¿Tuku kiakstukan nalakapastakaw komo namakglhtinanaw o ni namakglhtinanaw xlakata kgalhni?

10 Xlakata kgalhakgaxmataw limapakgsin «ni nawayatit  nkgalhni» xtatayananin Jehová ni mastayaw talakaskin nawilinikan achatum kinkgalhnikan, chu ni mastayaw talakaskin nakinkawilinikanan kgalhni o wi niku namastokgwilikan chu alistalh nakinkawilinikanan. Na ni mastayaw talakaskin nakinkawilinikanan: glóbulos rojos, glóbulos blancos, plaquetas chu plasma nema litatlawanit kgalhni.

11 Pero la uku, uma pulaktati tuku litatlawanit kgalhni pulaklhuwa kamapitsiparakan chu katuwa tuku limaklakaskinkan. ¿Chuntiya la «kgalhni» naliʼakxilhaw? ¿Tlan namakglhtinanaw? Kiakstukan nalakapastakaw komo namakglhtinanaw. Nachuna akxni limaklakaskinkan hemodiálisis, hemodilución chu akxni akgtum máquina saktilha kgalhni, chu uma tlan nalimaklakaskinkan akxni xkgalhni tiku makuchimaka tlawama kʼuma máquina chu ni alakatanu niku mastokgwilikan (kaʼakxilhti xtatakgatsin uma libro, nema wanikan «Akxni makglhuwata mapitsikanit kgalhni chu la limaklakaskinkgo makuchinanin»).

12. Akxni wi tuku kiakstukan nalaksakaw, ¿tuku kilitlawatkan chu tuku nakinkamakgtayayan chuna natlawayaw?

12 ¿Pi kawa ni lu xlakaskinka akxilha Dios tuku kiakstukan laksakaw xlakata kgalhni? Ni, xlakata kuentajtlawa tuku lakapastakaw chu tuku xlakata chuna tlawamaw (kalikgalhtawakga Proverbios 17:3; 24:12). Wa xlakata, ¿tuku kilitlawatkan akxni nina a wanaw pi makglhtinanaw o ni likuchun nema litlawakanit akxni pulaklhuwata mapitsikanit kgalhni o akxni nalimaklakaskinkan kinkgalhnikan? Pulana natlawaniyaw oración Dios chu nalakputsananiyaw tuku natlawayaw chu alistalh natlawayaw tuku nakinkawaniyan kintalakapastaknikan nema limasiyaninitaw tastakyaw xalak Biblia (Romanos 14:2, 22, 23). Nila namastayaw talakaskin pi achatum  nakinkawaniyan tuku natlawayaw chu na ni nakgalhskininanaw: «¿Chu wix tuku xtlawa?». «Xlakata chatunu chatunu nalin xtakuka.» (Gálatas 6:5TNM; Romanos 14:12; kaʼakxilhti recuadro « ¿Xasanto kakxilha kgalhni?».) *

XLIMAPAKGSIN JEHOVÁ LIMASIYA PI KINKAPAXKIYAN

13. ¿Tuku limasiya xlakata Jehová, limapakgsin chu tastakyaw nema wi kBiblia? Kawanti akgtum liʼakxilhtit.

13 Limapakgsin chu tastakyaw xalak Biblia limasiya pi Jehová xaskgalala Tiku Masta Limapakgsin, chu chatum Tlat xapaxkina tiku lakaskin pi xkamanan tlan natawilakgo (Salmo 19:7-11). Maski limapakgsin xalak Biblia niku wan «ni nawayatit nkgalhni», ni mastaka xlakata ni nakinkapasayan akgtum tajatat, makgtayanan xlakata ni natitaxtuyaw tuku tuwa akxni wi tiku wilinikan kgalhni (Hechos 15:20). Chu lhuwa makuchinanin tiku lu katsinikgo wankgo pi akxni wi tiku chukukan chu ni wilinikan kgalhni wa tuku tlakg tlan natlawakgo makuchinanin xala uku. Xaxlikana kstalaninanin Cristo akxilhparayaw pi Jehová chatum Tlat xapaxkina chu lu skgalala (kalikgalhtawakga Isaías 55:9; Juan 14:21, 23).

14, 15. 1) ¿Tukuya limapakgsin limasiya pi Dios kapaxkilh xkachikin? 2) ¿La tlan nalimaklakaskinaw tastakyaw nema lichuwinan xlakata la nakuentajtlawayaw latamat?

14 Dios putum kilhtamaku lakaskin pi tlan katawi xkachikin. Chuna limasiya lhuwa limapakgsin nema kamaxkilh israelitas. Akgtum liʼakxilhtit, kamapakgsilh xʼakgstin chiki xtlawakgolh aktsu patsaps. Xlakata lhuwa tuku xlimaklakaskinkan xʼakgstin chiki, uma  limapakgsin xmakgtayanan niti xlanilh tuku nitlan (Deuteronomio 22:8; 1 Samuel 9:25, 26; Nehemías 8:16; Hechos 10:9). Nakamapakgsilh liwana xkalakgachinukgolh xalakluku toros (Éxodo 21:28, 29). Tiku ni kuenta xtlawa umakgolh limapakgsin lu nitlan tuku xtlawa chu komo wi tuku xlalh wa xlitayalh kgalhni nema kstajtamakgalh.

15 ¿La tlan nalimaklakaskinaw tastakyaw nema kgalhi uma limapakgsin? Akxni max kuenta natlawayaw kimputlawkan chu la matlawaniyaw, la wi kinchikkan,  nakuentajtlawayaw nitu natlawakgo kiʼanimaleskan chu akxni laksakaw takgaman. Kmakgapitsi kachikinin, tuku tlakg kamakgni lakgkgawasan wa tuku lakapala kaʼakgspula, xlakata ni liwana lakapastakkgo tuku tlawakgo. Wa xlakata, komo chatum kgawasa tamakgxtakgputun kxtapaxkit Dios, lanka xtapalh akxilha chu ni kalipekua wili xlatamat kaj xlakata nalipaxuwa. Ni lakpuwan pi nitu katilanilh. Chu xlakata tamakgatlini tuku natlawani tuku nitlan, tlakg lipaxuwa latamat (Eclesiastés 11:9, 10).

16. ¿Tukuya tastakyaw xalak Biblia likatsiyaw pi nitlan makgnikan aktsu skgata akxni nina a lakachin? (Na kaʼakxilhti nota.)

16 Dios lu xlakaskinka akxilha latamat, asta xla lakgskgatan nema nina a lakachinkgo. Kxlimapakgsin Moisés xwan tuku xlitatlawat akxni wi tiku nitlan xtlawani chatum puskat tiku kxpan xkgalhi kskgata. Komo puskat o aktsu skgata xnilh, tiku chuna tlawalh makgnina xlitaxtu chu na xmakgnikan, “latamat xlixokgokan latamat” (kalikgalhtawakga Éxodo 21:22, 23). * Xlakata tuku akxilhwi, akgatekgsaw la makgkatsi Jehová akxni akxilha pi kata kata kamakgnikan lhuwa millones lakgskgatan akxni nina a lakachinkgo, makglhuwa kaj xlakata ni kgalhiputunkgo, o kamakgnikgo xlakata tanu tanu chixku natalatamakgo.

17. ¿La tlan namakgtayayaw chatum puskat tiku makganit kskgata akxni nina xlakgapasa tuku wan xlimapakgsin Dios?

17 Pero ¿komo chatum puskat makgalh kskgata nema nina xlakachin chu ni xkatsi tuku wan Biblia? ¿Nalakpuwan pi Dios nialh katitapatilh? Ni. Putum  tiku xlikana nitlan limakgkatsi xtalakgalhin chu makgxtakga, Jehová kalitapati xkgalhni Jesús nema tastajtamakgalh (Salmo 103:8-14; Efesios 1:7). Jesús wa, ni «kminkgonit tasanikgoy wanti akgstitum xlatamatkan nkgalhikgo, wampi wa klakgminkgonit lakgalhinanin» tiku nialh tlawakgo tuku nitlan (Lucas 5:32).

KAMASPUTUW NIXATLAN TALAKAPASTAKNI

18. Chuna la masiya Biblia, ¿tuku tlawa lhuwa nalamakgnikan?

18 Jehová ni kaj lakaskin nitu nakatlawaniyaw kintalatamankan. Na lakaskin liwana namaxtuyaw kkinakujkan nixatlan talakapastakni nema tlawa pi lhuwa nalamakgnikgo: wa ni nalaʼakxilhputunaw. Jehová limaklakaskilh apóstol Juan akxni kinkawaniyan: «Nti xkajniy [o ni akxilhputun] xtala, makgnina» (1 Juan 3:15). Uma ni wamputun kaj akxni wi tiku ni talalinaw, kilhchanima akxni lakaskinaw kanilh. Xlakata ni akxilhputunaw max nalimawakayaw taʼakgsanin o pi tlawalh tuku lu nitlan chu lakgchan namalakgaxokge Dios (Levítico 19:16; Deuteronomio 19:18-21; Mateo 5:22). Xlikana, talakaskin liwana namaxtuyaw kkinakujkan nixatlan talakapastakni nema kgalhiyaw (Santiago 1:14, 15; 4:1-3).

19. ¿Tukuya tastakyaw maxki Salmo 11:5 chu Filipenses 4:8, 9 chatum lataman tiku lilatama tastakyaw xalak Biblia?

19 Komo akxilhaw latamat la akxilha Dios, chu tamakgxtakgputunaw kxtapaxkit Dios, ni nakatlawaniyaw amakgapitsin tuku nitlan. Salmo 11:5 Salmos Ixtatlincan Ti Talipawan Dios wan pi Jehová «ni akxilhputun ti [...] lakgati matsuki tasitsi». Pero uma tuku tawan ni kaj limasiya tuku makgkatsi Dios, na kinkamaxkiyan akgtum tastakyaw xlakata tlan nalinaw kilatamatkan:  komo paxkiyaw Dios, ni lilakgastananaw niku latlawani tuku nitlan. Nachuna akxni likgalhtawakgayaw pi Jehová «Dios nti mastay ntatanksni», katsiniyaw pi talakaskin nalimatsamayaw kiakskititkan xatlan  talakapastakni, xaʼakgstitum, nema tlan lichuwinankan chu tlawa kaʼanalh takaksni (kalikgalhtawakga Filipenses 4:8, 9).

XTAMAPAKGSINKAN LAKCHIXKUWIN KAMAKAPASANIT KGALHNI

20-22. ¿Tuku ni makgtanukgo kstalaninanin Cristo, chu tuku xlakata?

20 Kxlakatin Dios, xkakilhtamaku Satanás kamakapasanit xkgalhni latamanin nema ni tlawakgonit tuku nitlan. Biblia katamalakxtumi xmapakgsinanin lakluku lapanit, kamakgnikgonit lhuwa millones latamanin, chu lhuwa xlakskujnin Jehová (Daniel 8:3, 4, 20-22; Apocalipsis 13:1, 2, 7, 8). Lhuwa laklanka stananin chu lakgskgalalan lakchixkuwin kamakgtayakgonit laklanka kachikinin xlakata natlawakgo lu laklanka limakgnin, chu lhuwa tumin litlajamakgolh. Xlikana, «putum kakilhtamaku wa akgchipanit tiku lixkajni likatsi» (1 Juan 5:19TNM).

21 Pero, kstalaninanin Jesús ni linkgo kuenta xlakata lhuwa kgalhni tamakganit. ¿Tuku xlakata? Ni «katuxawat [o kakilhtamaku] ntapakgsikgoy» wa xlakata ni makgtanukgo kpolítica chu kʼguerra (Juan 15:19; 17:16). * Nachuna, akxni kaputsastalanikan, tlawakgo la tlawalh Cristo, ni lakapala sitsikgo, wata tlan kalikatsinikgo tiku ni kaʼakxilhputunkgo chu asta tlawakgo oración xpalakatakan (Mateo 5:44; Romanos 12:17-21).

22 Kstalaninanin Cristo ni makgtanukgo «Babilonia xaLanka», putum nixaxlikana takanajla xlikalanka kakilhtamaku,  uma tamapakgsin tlakg lin kuenta xlakata lhuwa tiku kamakgnikanit. Biblia wan pi tlawalh katamakgalh «xkgalhnikan xpalakachuwinanin Dios, chu xla ksantujlanin, chu xla xlipakskan wanti makgnikgokanit nkatiyatna». Wa xlakata Dios kinkawaniyan: «Kalakgtaxtunitit wixin, wanti nkintalaksaknin» (Apocalipsis 17:6; 18:2, 4, 24).

23. ¿Tuku kilhchani nataxtuya kBabilonia xaLanka?

23 Tiku kgalhakgaxmata limapakgsin nataxtu kBabilonia xaLanka, ni kaj skin naxapakan xtukuwani niku wan pi anta tapakgsi. Wi tuku atanu tlawa. Xkajni tuku nixatlan tlawakgo nixaxlikana takanajla, nema wankgo pi tlan o asta wankgo pi xlitatlawat, la tiku akgskgawi xchixku o xpuskat, makgtanukan kpolítica chu lhuwa tumin namastokgwilikan (kalikgalhtawakga Salmo 97:10; Apocalipsis 18:7, 9, 11-17).  ¡Lhuwa kgalhni tamakganit kaj xlakata tayat nema malakgatumi Babilonia!

24, 25. 1) ¿Tuku akxilha Jehová akxni katapati tiku nitlan limakgkatsikgo xtalakgalhinkan xlakata wi tiku makgnikgolh? 2) ¿Tuku xkilhchanima tuku xlakkaxwilikanit kʼIsrael?

24 Akxni nina xtanuyaw kxaxlikana takanajla, kimputumkan wi tuku xlimakgtayananaw kkakilhtamaku nema akgchipanit Satanás. Wa xlakata na xlinaw tsinu kuenta. Pero tiyaw tanu tiji, kanajlaniw xtamakamastan Jesús chu makamastaniw Dios kilatamatkan. Chuna makglhtinaw xtalakgalhaman Dios chu kuentajtlawa kintakanajlakan (Hechos 3:19). Chuna la naʼakxilhaw, uma kinkamalakapastakayan kachikinin niku putatsekgni xwanit (Números 35:11-15; Deuteronomio 21:1-9).

25 ¿La xkalimaklakaskinkan umakgolh kachikinin? Anta tlan xtatsekgli chatum israelita akxni wi tiku xmakgni pero ni xlakapastaknit chuna natlawa anta xʼan xlakata ni namakgnikan. Akxni xchan kʼakgtum kachikin, mapakgsinanin tiku anta xwilakgolh xputsananikgo, chu xtalakaskin anta natawila asta akxni xapuxku sacerdote xnilh, tlan xʼalh niku xamputulh. Uma tuku Dios xlakkaxwilinit xlimasiya pi lu xalakgalhamana chu lhuwa xtapalh akxilha latamat. ¿Tuku xkilhchanima umakgolh kachikinin niku tlan xtatsekgkgo? Tuku lakkaxwilinit Dios la uku xlakata nakinkakuentajtlawayan. ¿Tuku uma? Xlakata xtamakamastan Cristo, Jehová ni masta talakaskin naniyaw akxni ni xlakpuwanitaw natlawayaw akgtum talakgalhin, xlakata ni xasanto akxilhwi latamat chu kgalhni. ¿Chu la limasiyayaw pi paxtikatsiniyaw tuku lakkaxwilinit Dios? Pulaktum wa nakawaniyaw latamanin kalitamakgtayakgolh tuku Dios lakkaxwilinit. La uku tlakg xlakaskinka  xlakata lakatsu wi «ntlanka takatsanajwat» (Mateo 24:21; 2 Corintios 6:1, 2).

AKXNI LICHUWINANAW TAMAPAKGSIN LIMASIYAYAW PI LHUWA XTAPALH AKXILHAW LATAMAT

26-28. ¿Tuku xlakata wanaw pi nachuna wilaw la xwi palakachuwina Ezequiel, chu la tlan natamakgxtakgaw kxtapaxkit Dios?

26 La uku xkachikin Jehová wilakgolh chuna la xwi Ezequiel, chatum palakachuwina tiku Jehová wililh xlakata nakuentajtlawa xtakanajla kachikin Israel. Makglhtinalh uma taskujut: «Akxni nakgaxpata akgtum tachuwin nema akit nakwan talakaskin nakamakatsiniya tuku naktlawa». Komo Ezequiel ni xmakgantaxtilh taskujut, xlimawakaka kgalhni nema xtastajtamakgalh akxni Dios xkatatlawalh kuenta Jerusalén (Ezequiel 33:7-9). Pero la katsiyaw, Ezequiel makgantaxtilh xtaskujut chu ni lilh kuenta akxni kamakgnika tiku xalak Jerusalén.

27 Nialh makgas, xkakilhtamaku Satanás namalakgsputukan. Wa xlakata xtatayananin Jehová akgtum talakgalhaman akxilhaw nalichuwinanaw «kilhtamaku akxni nakamalakgaxokge» Dios xTamapakgsin (Isaías 61:2; Mateo 24:14). ¿Xatapaxuwan tlawamaw uma taskujut? Chuna tlawalh Pablo, wa xlakata wa: «Nialh kkgalhiy nkit ntalakgalhin mpala pi wixin nti ni nakanajlay. Sampi ni kaj chuna kmakgaxtakgnit mpala ni kkalixakgatliyan aktanks xtalakaskin Dios» (Hechos 20:26, 27). Akinin nachuna kilitlawatkan.

28 Pero natamakgxtakgaw kxtapaxkit kinTlatkan ni kaj talakaskin lhuwa xtapalh naʼakxilhaw latamat chu kgalhni chuna la akxilha Dios. Chuna la naʼakxilhaw kcapítulo 8, talakaskin xasantos chu ni xalixkajni natawilayaw kxlakatin Dios.

^ párr. 5 Revista Investigación y Ciencia wan xlakata uma tachuwin, «xlatamat makni wi kkgalhni»: «Maski ni xtlawaniputuw kuenta tuku pulana min kkintalakapastaknikan akxni kgaxmataw uma tachuwin, uma xlikana: putum células nema litatlawanit kgalhni talakaskin xlakata tlan naʼanan latamat».

^ párr. 12 Na kaʼakxilhti ¡Despertad! xla agosto kata 2006, páginas 3 asta 12, tlawakgonit xtatayananin Jehová.

^ párr. 16 Tiku lhuwa kalakgapaskan chu putsananikgo Biblia wankgo pi tachuwin nema maklakaskinka xahebreo, «uma tachuwin nila nawanaw pi kaj wa kilhchanima tuku nitlan tlawanikan puskat». Nachuna, Biblia nikxni wan pi akxni Jehová xkamalakgaxokge tiku chuna xtlawakgo xtalakgpali komo aktsina o lankata skgata xwanit.

^ párr. 70 Komo tlakg katsiputuna xlakata uma kaʼakxilhti xtatakgatsin uma libro nema wanikan «Akxni makglhuwata mapitsikanit kgalhni chu la limaklakaskinkgo makuchinanin».